މުވައްޒަފުންގެ ހާޒިރީ ބޯނަސް ނުދެވެނީ ސަރުކާރުން ހުއްދަ ނުދީގެން: ޑރ. މުއިއްޒު

މާލޭ ސިޓީ ކައުންސިލްގައި މަސައްކަތް ކުރާ މުވައްޒަފުންނަށް ހާޒިރީ ބޯނަސް ނުދެވެނީ މިނިސްޓަރީ އޮފް ފިނޭންސާއި ޕޭ ކޮމިޝަނުން ލިބެންވާ ހުއްދަ ނުލިބިގެން ކަމަށް މާލެ ސިޓީ ކައުންސިލްގެ މޭޔަރ ޑރ މުޙައްމަދު މުޢިއްޒު ވިދާޅުވެއްޖެއެވެ.

މިއަދު ބޭއްވުނު ސިޓީ ކައުންސިލްގެ ބައްދަލު ވުމެއްގައި ވާހަކަ ދައްކަވަމުން މޭޔަރ ވިދާޅުވީ މުވައްޒަފުންނަށް ހާޒިރީ ބޯނަސް ދިނުމަށް ފާސްކުރިތާ އަހަރެއްހާ ދުވަސް ވީއިރު ވެސް އެކަން ހަމަނުޖެހި އޮތީ ސަރުކާރުން އެކަމުގެ ހުއްދަ ނުދީގެންކަމަށެވެ. އެގޮތުން އެ ހުއްދަ ދިނުމަށް މިހާރު ތިންވަނަ ފަހަރަށް ވާނީ އެދެވިފައި ކަމަށް މުޢިއްޒު ވިދާޅުވިއެވެ.

ސިޓީ ކައުންސިލުން ވަނީ އެ ކައުންސިލްގެ ކޮންމެ މުވައްޒަފަކަށް ހާޒިރީ ބޯނަހުގެ ގޮތުގައި 75 ރުފިޔާ ދިނުމަށް ނިންމައި ފާސްކޮށްފައެވެ. އެކައުންސިލުން ބުނެފައިވަނީ ސިވިލް ސާވިސް މުވައްޒަފުންގެ މުސާރައިގެ އޮނިގަނޑުގެ ދަށުން ސިޓީ ކައުންސިލްގެ މުވައްޒަފުންނަށް އެ ފައިސާ ލިބޭނެ ގޮތް ހަމަޖެއްސުމަށް ޕޭ ކޮމިޝަނަށާއި ފިނޭންސް މިނިސްޓްރީއަށް ކައުންސިލުން ހުށައަޅައިފައިވާކަމަށެވެ.

މިއަދުގެ ބައްދަލުވުމުގައި މުޢިއްޒު ވިދާޅުވީ ހާޒިރީ ބޯނަހުގެ ފައިސާ އަކީ ކައުންސިލުގެ މުވައްޒަފުންނަށް އެ ކައުންސިލުން ދޭން ނިންމި ފައިސާއެއްކަމަށާއި އެއީ ކައުންސިލްގެ ބަޖެޓްގައި ހިމެނިފައި އޮތް ފައިސާއެއްކަމަށެވެ..

އެހެންކަމުން އެއީ ކައުންސިލްގެ މުވައްޒަފުންނަށް ދޭން ޖެހޭނެ ފައިސާއެއްކަމަށާއި ސަރުކާރުން އެކަމަށް ހުރަސް އަޅައިގެން ނުވާނެކަމަށް ވެސް ޑރ. މުއިއްޒު ވިދާޅުވިއެވެ.

ސިޓީ ކައުންސިލްގެ ބައްދަލުވުމުގައި މިކަމާއި މެދު ވާހަކަ ދައްކަވަމުން ސިޓީ ކައުންސިލްގެ ސެކްރެޓަރީ ޖެނަރަލް މުޖުތަބާ ޖަލީލް ވިދާޅުވީ ކައުންސިލްގެ މުވައްޒަފުންނަށް ބޯނަސް ދިނުމާ ގުޅޭގޮތުން އެކަމުގެ ހުއްދައަށް އެދި ޕޭ ކޮމިޝަނަށް މިދިޔަ އަހަރުގެ މޭ މަހު ފޮނުވި ކަމަށެވެ.

ނަމަވެސް ސަރުކާރުގެ ހުރިހާ އިދާރާއެއްގެ މުސާރައިގެ އޮނިގަނޑަށް ބަދަލު ގެނައުމުގެ މަސައްކަތް ކުރާތީ އެކަން މިވަގުތު ވާން ނެތް ކަމަށް އެ ކޮމިޝަނުގެ ރައިސްގެ އިތުރުން ފިނޭންސް މިނިސްޓަރު އިބްރާހިމް އަމީރު ސޮއިކުރައްވައި ކައުންސިލަށް ސަރުކާރުން ޖަވާބު ދެއްވި ކަމަށާއި ހަމަ އެޖަވާބު ދެވަނަ ފަހަރަށް އެކަމަށް އެދި ހުށައެޅުމުންވެސް ލިބިފައިވާ ކަމަށް މުޖުތަބާ ވިދާޅުވިއެވެ.

.