އިއްޔެ އިޒްރާއިލުން ހިންގި ޢަމަލުތަކާއި ދެކޮޅަށް ފަލަސްޠީނުގައި މުޒާހަރާކުރަނީ

އިއްޔެ އިޒްރާއިލުން ހިންގި އަނިޔާވެރި ޢަމަލުތަކާއި ދެކޮޅަށް ފަލަސްޠީނުގެ ރައްޔިތުން މުޒާހަރާ ކުރަން ފަށައިފިއެވެ.

އިޒްރާއިލުން ފަލަސްޠީނުގެ ޖެނީންގައި އިއްޔެ ހިންގި މިލިޓަރީ ރެއިޑެއްގައި ވަނީ ފަލަސްޠީނުގެ 6 މީހަކު ޝަހީދުކޮށްލައިފައިވެއެވެ. ހުޅަނގު އައްސޭރީގައި ފަލަސްޠީނުގެ ރައްޔިތުން މުޒާހަރާ ކުރަން ފަށައިފައިމިވަނީ އެ ކަމާއި ގުޅިގެންނެވެ.

ޖެނީން އާއި ނާބުލުސް އާއި ރާމައްﷲ ގެ ވިޔަފާރިތައް ބަންދުކޮށް ވިޔަފާރިވެރިން ވެސް ވަނީ މުޒާހަރާގައި ބައިވެރިވެފައެވެ. ސްކޫލްތަކާއި ޕަބްލިކް އިންސްޓިޓިޔުޝަންތައްވެސް މުޒާހަރާ ތަކުގައި ބައިވެރިވުމުގެ ގޮތުން ބަންދު ކުރަން ނިންމިއެވެ. ނަމަވެސް ބައިނަލްއަޤްވާމީ އަންހެނުންގެ ދުވަހާއި ގުޅުވައިގެން ބުދަ ދުވަހަކީ ބަންދު ދުވަހަކަށް ވަނީ ސަރުކާރުން ހަދައިފައެވެ.

"މި މުޒާހަރާއަކީ ޖެނީންގައި އިއްޔެ އިޒްރާއިލު ސިފައިން ޖެނީންގެ ރެފިޔުޖީ ކޭމްޕްގައި ހިންގި އަނިޔާވެރި ޢަމަލުތައް ކުށްވެރިކޮށް އެކަމަށް ދެކޮޅު ހެދުމުގެ ގޮތުން ކުރެވޭ މުޒާހަރާއެއް،  އިއްޔެގެ ރެއިޑްގައި 6 މީހަކު ޝަހީދުކޮށްލައިފައިވޭ އަދި އެތައް ބަޔަކު ވަނީ ޒަހަމްވެފައި" ފަލަސްޠީނުގެ ރައްޔިތުންގެ ފަރާތުން ވާހަކަ ދެއްކި އިސާމް ބަކްރް ބުނެފައިވެއެވެ.

އަންގާރަދުވަހުގެ ރޭ އިޒްރާއިލް ސިފައިން ޖެނީންގެ ރެފިޔުޖީ ކޭމްޕަށް ވަދެ ވަނީ ވަރުގަދަ ހަމަލާތަކެއް ދީފައެވެ. މި ހަމަލާތަކުގެ ސަބުބުން 6 މީހަކު ޝަހީދުވެ 26 މީހަކު ޒަހަމްވެފައިވާއިރު ވަޒަން އެރުމުގެ ސަބަބުން 3 މީހެއްގެ ހާލު ވަނީ ވަރަށް ބޮޑަށް ގޯސްވެފައެވެ.

ފަލަސްޠީނުގެ ޖެނީން އިން ރިޕޯޓު ކުރި އަލްޖަޒީރާގެ ރިޕޯޓަރު ބުނެފައިވަނީ ފިހާރަތައް ބަންދުކޮށްފައި ވާކަމަށާއި، ފަލަސްޠީނުގެ މަގުތަކުގައި ރުޅިވެރިކަމުގެ އިހްސާސްތައް ފެތުރުފައިވާ ކަމަށެވެ.

މިއަހަރުގެ މިހާތަނަށް އިޒްރާއިލް ސިފައިން ފަލަސްޠީނުގެ 68 މީހަކު ޝަހީދު ކޮށްލައިފައިވާއިރު، އިޒްރާއިލްގެ ޔަހޫދީ ރައްޔިތުން ފަލަސްޠީނުގެ ފަސް މީހަކު ޝަހީދު ކޮށްލައިފައިވެއެވެ.