"ރައީސް ޞާލިހުގެ ސިޓީއާއި ފޯޅަވަހި މައްސަލައާއި ގުޅުމެއް ނެތް ނަމަ މޮރިޝަސްއިން އެ ސިޓީ ޓްރައިބިއުނަލަށް ހުށައެއް ނޭޅިސް"
ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު މޮރިޝަސްގެ ބޮޑުވަޒީރަށް ފޮނުއްވި ސިޓީފުޅާއި، ރާއްޖޭގެ ސަރަހައްދީ އިން ކަނޑައެޅުމާ ގުޅޭ ގޮތުން ޖަރުމަނުގައި ހުންނަ އިންޓަނޭޝަނަލް ޓްރައިބިއުނަލް ފޯ ދަ ލޯ އޮފް ދަ ސީ (އިޓްލޮސް)ގައި ކުރިއަށް ދިޔަ މައްސަލައާއި އެއްވެސް ގުޅުމެއް ނެތްކަމުގައި ވާނަމަ، މޮރިޝަސްގެ ފަރާތުން ކޯޓަށް އެ ސިޓީ ހުށައަޅަން ވެސް ނުޖެހުނީސްކަމަށް ކުރީގެ ބަންޑާރަނައިބު ޑރ މުޙައްމަދު މުނައްވަރު ވިދާޅުވެއްޖެ އެވެ.
ޑރ މުނައްވަރު މިފަދައިން ވިދާޅުވެފައިވަނީ ފޯޅަވައްސަކީ މޮރިޝަސްއަށް ސިޔާދަތު ލިބިގެންދާ ތަނެއްކަމަށް ޤަބޫލުކޮށް ރައީސް ޞާލިހު މޮރިޝަސްގެ ބޮޑުވަޒީރަށް ފޮނުއްވި ސިޓީގެ ސަބަބުން އިޓްލޮސްގައި އޮތް މައްސަލަ ނިމިގެން ދިޔައިރު ރާއްޖޭގެ ކަނޑުގެ ސަރަހައްދުން ބޮޑުބައެއް ގެއްލިގެން ދިއުމާއި ގުޅިގެން ކަންބޮޑުވުން ފާޅުކުރައްވާ ޗެނަލް-13 ގެ ނިއުސް ޓޯކް ޕްރޮގްރާމުގައި ވާހަކަ ދައްކަވަމުން ނެވެ.
ޑރ މުނައްވަރުގެ ވާހަކައިގައި ވަނީ ރައީސް ޞާލިހުގެ ސިޓީފުޅާއި އިޓްލޮސްގައި ކުރިއަށް ދިޔަ މައްސަލައާއި އެއްވެސް ގުޅުމެއް ނެކަމަށް ބުނެ ސަރުކާރުން ދައްކަމުންދާ ވާހަކަތަކަށް ވެސް ރައްދުދެއްވާފަ އެވެ.
އެގޮތުން ޑރ މުނައްވަރު ވިދާޅުވީ އެ މައްސަލައިގައި ބައިނަލްއަގުވާމީ ކޯޓުން ހުކުމް ކުރިއިރު އެ ސިޓީއާއި ހަވާލާ ދީފައިވާކަމަށެވެ. އެއީ ގުޅުމެއް ނެތް ސިޓީއެއް ކަމަށް ވާނަމަ މޮރިޝަސްގެ ފަރާތުން އެ ސިޓީ ކޯޓަށް ހުށައަޅަން ޖެހޭ ވެސް ސަބަބެއް ނެތްކަން އެމަނިކުފާނު ފާހަގަކުރެއްވި އެވެ.
"ދެން އެއްބޭފުޅަކު ވިދާޅުވެދާނެ މިހާރު އެ ސިޓީއަކުން މިޔަށް ކުރާ އަސަރެއް ނެތޭ. އެކަމަކު އެ ޓްރައިބިއުނަލްގެ ނިންމުމުގައި އެ ސިޓީއާއި ހަވާލާ ދީފަ އެބޮތް. އެ ހަވާލާ ދީފަ އޮންނާނީ ހަމަގައިމު ރިލަވަންޓު ވެގެންނެއްނު. އެހެން ނޫން ނަމަ ނުދޭނެ. އެހެން ނޫން ނަމަ މޮރިޝަސްއަކަށް ނުޖެހޭނެ އެ ސިޓީ ޓްރައިބިއުނަލަށް ހުށައަޅަން ވެސް. ހުށައަޅަން ޖެހުނީވެސް ކޮންމެސް ކަމެއް ބަޔާން ކުރުމަށްޓަކައި
ކުރީގެ ބަންޑާރަނައިބު ޑރ މުނައްވަރު
ޑރ މުނައްވަރު އިތުރަށް ވިދާޅުވީ ގޯހެއް ހަދާފައި ނުވާ ނަމަ، ރައީސް ޞާލިހު މޮރިޝަސްއަށް ފޮނުވި ސިޓީފުޅު ރައްޔިތުންނަށް ސިއްރު ކުރަންޖެހޭ ސަބަބެއް ނެތް ކަމަށެވެ.
އެ ސިޓީ ކޮންމެސް ދުވަހަކުން ރައްޔިތުންނަށް އަދި ހާމަވާނެ ކަމަށާއި، އޭގައި ރައްޔިތުންގެ މަސްލަހަތު ގެއްލޭފަދަ ވާހަކައެއް ހިމަނާފައިވާނަމަ ރައީސް ޞާލިހު އެކަމަށް ޒިންމާ ކުރުވާނެކަމަށް ޑރ މުނައްވަރު ވިދާޅުވި އެވެ. އަދި އެމަނިކުފާނު ވިދާޅުވީ ރައްޔިތުންގެ މަސްލަހަތު އޮތް ގޮތަކީވެސް ރައީސް ޞާލިހުގެ އެ ސިޓީފުޅު ހާމަކުރުން ކަމަށެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
