ޗާގޯސް މައްސަލާގައި ދިވެހި ސަރުކާރުން ޓްރައިބިއުނަލްގައި ނުކޮށް ދޫކޮށްލި 3 ސުވާލެއް!
ޗާގޯސްގެ ކަނޑުގެ ސަރަހައްދު ބައިކުރިއިރު، ޓްރައިބިއުނަލްގައި ދިވެހި ސަރުކާރުން މުހިންމު ތިން ސުވާލެއް ނުކޮށް ދޫކޮށްލާފައިވާ ކަން ފާހަގަކުރައްވައި އެ ސުވާލުތައް ނުކުރެއްވީ ކީއްވެތޯ ކުރީގެ ބަންޑާރަ ނާއިބު ޑރ. މުހައްމަދު މުނައްވަރު ސުވާލު ކުރައްވައިފިއެވެ.
ޗެނަލް 13 ގެ ނިޔުސް ޓޯކް ޕްރޮގްރާމްގައި ވާހަކަދައްކަވަމުން ޑރ. މުނައްވަރު ވިދާޅުވީ، ޓްރައިބިއުނަލް އަކުން އިންސާފުވެރިކަމާއިއެކު ނިންމި ނިންމުމަކާއި މެދު އެއްވެސް ޝަކުވާއެއް ނުކުރައްވާ ކަމަށެވެ. އެހެން ނަމަވެސް، ދިމާވެގެން އުޅޭ މައްސަލަ އަކީ، ދިވެހި ސަރުކާރުގެ ފަރާތުން އެ މައްސަލާގައި ވަކާލާތުކުރެއްވި ގާނޫނީ ވަކީލުން، ޓްރައިބިއުނަލްގައި މުހިންމު ތިން ސުވާލެއް ނުކޮށް ދޫކޮށްލާފައިވާތީ އެ މައްސަލަ ކަމަށެވެ.
"ކީއްވެހޭ މި ތިން ސުވާލު ނުކުރީ. ފުރަތަމަ ސުވާލަކީ އެތަނުގައި ގައުމެއް އެބަ އޮތްހޭ ނެތް ހޭ. ތިޔަ ޒޯނު ދެނީ ކާކަށްހެއްޔޭ؟ ހަމަގައިމު ޗާގޯސް އޮތީ މޮރިޝަސް އަތުގައި އެއްނޫން މިވަގުތު. އިނގިރޭސިންގެ އަތްދަށުގައި އޮތީ. ކޮންޓްރޯލް އޮތީ އިނގިރޭސިންގެ އަތްދަށުގައި. އެހެންވީމާ ޒޯންގައި ތި ހަވާލުކުރެއްވި ބައި ހަވާލުކުރެއްވީ ކާކާތޯ؟ މޮރިޝަސް އަށް އަދި ޗާގޯސްވެސް ނުލިބެޔޭ. އިނގިރޭސިން ދިން ދުވަހަކުން ލިބޭނީ. އެހެންވީމާ ތަންކޮޅެއް އަވަސް ނޫންތޯއޭ، ޗާގޯސްގެ މައްޗަށް ސޮވެރެންޓީ ލިބުނު ދުވަހަކުން ނޫންތޯއޭ ކަނޑައަޅަން ޖެހޭނީ."
ޑރ. މުހައްމަދު މުނައްވަރު
މިއާއެކު މުނައްވަރު ވިދާޅުވީ އެކްސްކްލޫސިވް އިކޮނަމިކް ޒޯން އަކީ ސޯޝިއޯ އިކޮނޮމިކް ކޮންސެޕްޓެއް ކަމަށެވެ. އެކަން އައިސީޖޭ ގައިވެސް އޮންނާނެކަމަށެވެ.
"އެއީ އެތާ ދިރިއުޅޭ މީހުންގެ، އިންސާނުންގެ ދިރިއުޅުމަށްޓަކައި ކެއިން ބުއިމަށްޓަކައި މި ޒޯން މި ކަނޑައަޅަނީވެސް ފުރަތަމަ. ކަނޑައަޅާއިރުގައި މީހުން ނޫޅޭ ތަނަކަށް ހަމައެކަނި މިލިޓަރީ ބޭސްއެއް ހިންގާ ތަނަކަށް ކިހިނެއްތޯ އޭ އިކޮނަމިކް ޒޯންއެއް ދޭނީ؟ އަޅުގަނޑު މި އަހަނީ ކީއްވެހޭ އެ އާގިއުމަންޓް ނުދިނީ."
ޑރ. މުހައްމަދު މުނައްވަރު
މުނައްވަރު ވިދާޅުވީ، ދިވެހިންގެ އިގްތިސާދީ ލޭނަރަނީ މަސްވެރިކަން ކަމަށެވެ. އެކަން އެހެން އޮތް އިރު ދިވެހިން ބަސް ބާނަމުންދިޔަ ޒޯން، ދިވެހިން ބައި ކުރަންޖެހެނީ ކީއްވެތޯ އޭނާ ސުވާލު ކުރައްވާފައިވެއެވެ.
"އަޅުގަނޑުމެން މި ކަނޑު މިގޮތަށް ބޭނުން ކޮށްކޮށް ޒަމާނުއްސުރެ، ޓޫނާ ފިޝަރީޒް ބޭސް އަކަށް އޮއްވައި ކީއްވެހޭ؟ އަޅުގަނޑުމެންނަށް ނޫންތޯއޭ ޕްރައޮރިޓީ ލިބޭނީ. އަޅުގަނޑުމެންނަށް 200 މޭލު ދީފައި ދެން ބަކީ އޮތް އެއްޗެއް ނޫންހޭ އެހެން ގައުމަކަށް ލައިސެންސް ދޭން ލިބެންވީ. މޮރިޝަސް އަކީ އިންޑީޖަނަސް ފިޝިން ނޭޝަން އެއްނޫން. މިއީ އެމީހުންގެ ގައުމާއި، އަޅުގަނޑަކަށް ނޭނގޭ ، 2000 މޭލު ދުރުގައި އޮތް ތަނެއް. މިތަނަށް އެމީހުންގެ މަސްވެރިންނެއް ނާދޭ. މިތަނަށް އެމީހުން ދޫކުރާނީ ލައިސެންސް. ލޯންގެ ޑިސްޓެންސް ފިޝިންގ ނޭޝަން ތަކަށް ލައިސެންސް. ލައިސެންސް ދޭން ޒޯން އެއް ލިބިގެން ނުވާނެ ނޫންތޯއޭ އަޅުގަނޑުމެން އެތަނުން ކައިގެން ބޮއިގެން އުޅޭ ބައެއް ތިއްބާ އަޅުގަނޑުމެންގެ ހައްގަށް ނުބަލައި. ކީއްވެހޭ އެ އާގިއުމަންޓް ނުދިނީ؟"
ޑރ. މުހައްމަދު މުނައްވަރު
މުނައްވަރު ވިދާޅުވީ ޓްރައިބިއުނަލް ގައި ދެއްކެވި ހުރިހާ ވާހަކައެއް ފެށުނީއްސުރެ ނިމެންދެން ފެންނަން އޮތް ކަމަށާ، އެހެން ނަމަވެސް، އެ މުހިންމު ތިން ސުވާލު ކޮށް، އެކަމަށް ސަރުކާރުން ވަކާލާތު ކޮށްފައިވެސް ނުވާކަމަށެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
