150،000ރ ގެ މުދަލުގެ މައްސަލައިގައި ޑްރައިވަރު އެތަކެތި ހަވާލުކުރަން މަސައްކަތް ކުރި: ފުލުހުން

ޖުމްލަ 150،000 ރުފިޔާގެ އިލެކްޓްރޯނިކް ސާމާނު ގެންދަންޖެހޭ ހިސާބަށް ނުގެންދާކަމުގެ މައްސަލައިގައި، ފުލުހުން ޓެކްސީ ހޯދަން މަސައްކަތް ކުރިއިރު ޓެކްސީ ޑްރައިވަރުވެސް އެތަކެތި ހަވާލު ކުރަން މަސައްކަތް ކޮށްފައިވާކަން އެނގިފައިވާ ކަމަށް ފުލުހުން ބުނެފިއެވެ.

އެ މައްސަލައިގައި މިދިޔަ ހުކުރު ދުވަހު ފުލުހުން ކުރި ޓްވީޓެއްގައި ބުނެފައި ވަނީ، ބުރާސްފަތި ދުވަހު ހަވީރު ވެލާނާ އިންޓަނޭޝަނަލް އެއާޕޯޓުގެ ޓެކްސީ ކިއުއިން ނެގި ކާރަކަށް އެރުވި 150،000 ރުފިޔާގެ އިލެކްޓްރޯނިކް ސާމާނު، ގެންދަންޖެހޭ ހިސާބަށް ނުގެންދާކަމުގެ މައްސަލައެއް ފުލުހުންނަށް ހުށަހަޅާފައިވާ ކަމަށާއި އެކަމާ ގުޅިގެން މާފަންނުގެ ފުލުހުން ވަނީ ސީސީޓީވީ ފުޓޭޖު ބެލުމަށްފަހު އެ ޓެކްސީ ދެނެގަނެ، އެތަކެތި ހޯދުމަށްފަހު އޭގެ ވެރިފަރާތާއި ހަވާލުކޮށްފައި ކަމަށް ބުނެފައިވެއެވެ.

ނަމަވެސް އެކަމާ ގުޅިގެން ޑްރައިވަރު "ވޮއިސް" އަށް ބުނީ އެތަކެތި ފުލުހުން ހޯދައި ވެރިފަރާތަށް ހަވާލުކޮށްފައިވާކަމަށް ފުލުހުން ބުނުމަކީ އޮޅުވާލުން ކަމަށެވެ. އަދި ތަކެތި އަތުގައި ހުރިކަމަށް އަމިއްލައަށް ރިޕޯޓު ކޮށްފައިވާނެ ކަމަށެވެ.

އެކަމާ ގުޅިގެން އޭރު ފުލުހުން ބުނީ، މައްސަލައިގެ ތަހުގީގު ހިނގަމުންދާތީ، ތަހުގީގުގެ ތެރެއިން ބަލަންޖެހޭ ކަންކަން ބަލަމުންދާ ކަމަށެވެ.

ފުލުހުން ރޭ "ވޮއިސް" އަށް މައުލޫމާތު ދެއްވި ގޮތުގައި، ޖޫން 2 ވަނަ ދުވަހު ފުލުހުން ކޮށްފައިވާ ޓުވީޓަކީ އެއާޕޯޓް ކިއުއިން ނެގި ޓެކްސީއަކަށް އެރުވި މުދާ ވެރިފަރާތަށް ހޯދައިދެވިފައިވާކަން ހާމަކުރުމުގެ ގޮތުންނާ އަދި ކަމެއް ދިމާވާ ހިނދު ވީއެންމެ އަވަހަކަށް ފުލުހުންނާ ހިއްސާކޮށް އަދި ރިޕޯޓުކުރުމަށް އިލްތިމާސްކޮށް، ކޮށްފައިވާ ޓުވީޓެއް ކަމަށެވެ.

އެ ޓުވީޓުގައި އެއީ ކޮން ޓެކްސީއެއްކަން ނުވަތަ ޓެކްސީ ސެންޓަރުގެ ނަން ނުވަތަ މީހާގެ ވަނަވަރު ހާމަކޮށްފައި ނުވާނެ ކަމަށް ފުލުހުން ބުންޏެވެ.

އެ މައްސަލައިގައި، މުދާ ގެއްލިގެން މާފަންނު ޕޮލިސް ސްޓޭޝަނަށް ރިޕޯޓު ކޮށްފައި ވަނީ ޖޫން 1 ވަނަ ދުވަހުގެ 17:27 އެހައިކަންހާއިރު ކަމަށް ފުލުހުން ބުންޏެވެ.

ނަމަވެސް މައްސަލަ ހުށަހެޅި ފަރާތަށް، ތަކެތި އެރުވި ޓެކްސީގެ ރަޖިސްޓްރީ ނަމްބަރު ފިޔަވައި އިތުރު މައުލޫމާތެއް އެނގިފައި ނުވާތީ އެ ޓެކްސީ ދެނެގަތުމަށް ސީސީޓީވީ ފުޓޭޖު ބަލައި ޓެކްސީ ދެނެގަނެވި، ޓެކްސީ ދުއްވި ފަރާތާ ގުޅި، 18:00 އެހައިކަންހާއިރު ވެރިފަރާތާ އެތަކެތިވަނީ ހަވާލުކޮށްފައި ވާނެ ކަމަށް ފުލުހުން ބުންޏެވެ.

"ފުލުހުން އެ ޓެކްސީ ހޯދުމަށް މަސައްކަތްކުރަމުން ދިޔައިރު، ވެރިފަރާތާ ތަކެތި ހަވާލުކުރުމަށް، ޓެކްސީ ދުއްވި ފަރާތުން ވެސް މަސައްކަތްކޮށްފައިވާކަން މިހާތަނަށް އެނގިފައިވޭ. އަދި މިކަން ހިނގާފައިވަނީ ކާރަށް މުދާ އެރުވުމަށްފަހު ދެ ފަރާތުން ކުރަންޖެހޭ މުއާމަލާތް ރަނގަޅަށް ނުކުރެވި އޮތުމުންކަމަށްވެސް މިހާތަނަށް ބެލިބެލުމުން އެނގިފައިވޭ" ފުލުހުން ބުންޏެވެ.

އެ މައްސަލައިގައި މީގެ ކުރިން "ވޮއިސް"އާ ވާހަކަ ދައްކަމުން ކާރުގެ ޑްރައިވަރު މުހައްމަދު ހުސައިންވެސް ބުނެފައި ވަނީ ދެފަރާތުން ނަންބަރު ބަދަލު ނުކުރުމަކީ މިކަންތައް ދިމާވުމަށް މެދުވެރިވި ސަބަބު ކަމަށެވެ.

"ދެފަރާތުން ކުރެ ފަރާތަކުން ނަންބަރެއް ބަދަލެއް ނުކުރަން. އަޅުގަނޑުވެސް ޑަންލާފަ ނައްޓާލީ، ނައްޓާލާފަ އެ އައިގޮތަށް އައިސް ބިސްބުރު ކައިރީ އެބުރުނުއިރުވެސް (އެބުނާ) މީހަކު ނުފެނުނު" ހާދިސާ ކިޔައިދެމުން މުހައްމަދު ބުންޏެވެ.

މުހައްމަދު ބުނީ މުދާ ހަވާލު ކުރުމަށްފަހު އެރޭވެސް މުދަލުގެ ވެރިފަރާތަށް ގުޅި ކަމަށާއި އަދި މުދާ ހަމަކަން ޔަގީންކުރި ކަމަށެވެ. އެ މައްސަލައިގައި ފުލުހުން ޓުވީޓު ކޮށްފައިވާ ގޮތުން ޑްރައިވަރު ވަރަށް ބޮޑަށް ބަދުނާމުވާ ކަމަށް މުހައްމަދު ބުނެފައިވެއެވެ.