ޤާސިމަށް ޓިކެޓު ދޭ ޖަލްސާ ވާނީ އެންމެ ބޮޑު އެންމެ ފުރިހަމަ ޖަލްސާއަށް: ރިޔާޒު

ޖުމްހޫރީ ޕާޓީގެ ރިޔާސީ ކެންޑިޑޭޓު ޤާސިމް އިބްރާހިމަށް ރިޔާސީ ޓިކެޓު ހަވާލުކުރެއްވުމަށް ބާއްވާ ޖަލްސާ ވެގެންދާނީ، މިހާތަނަށް ސިޔާސީ ޕާޓީއަކުން ބާއްވާ އެންމެ ބޮޑު އަދި އެންމެ ފުރިހަމަ ޖަލްސާއަށް ކަމަށް ޖޭޕީގެ އެޑްވައިޒަރު އަދި މަޖިލީހުގެ ވިލިފުށީ ދާއިރާގެ ކުރީގެ މެންބަރު ރިޔާޒް ރަޝީދު ވިދާޅުވެއްޖެ އެވެ.

އޭނާ މިފަދައިން ވިދާޅުވެފައިވަނީ ހުކުރު ދުވަހުގެރޭ ބޭއްވުމަށް ހަމަޖެހިފައިވާ ޖޭޕީގެ ޖަލްސާއާއި ގުޅޭގޮތުން މައުލޫމާތު ދިނުމަށް ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ނެވެ.

"މި ޖަލްސާގައި އަޅުގަނޑުމެންނަށް މި ޤަބޫލުކުރެވެނީ ގާތްގަނޑަކަށް 4000 ވަރަކަށް މީހުން ބައިވެރިވާނެ ކަމަށް. އަދަދު އިތުރުވުމަކީ އެކަށީގެންވާ ކަމެއް. މިހާތަނަށް ބޭއްވޭ އެންމެ ބޮޑު ޖަލްސާއަށް، ސިޔާސީ ޕާޓީއަކުން ބާއްވާ އެންމެ ބޮޑު ޖަލްސާއަށް މި ޖަލްސާ ވެގެންދާނެ. އަދި ހަމަ އެއާއެކު ރިޔާސީ ޓިކެޓެއް އެރުވުމަށްޓަކައި ބޭއްވޭ އެންމެ ފުރިހަމަ، އެންމެ އާދަޔާއި ޚިލާފު އެއް ޖަލްސާއަށް މި ޖަލްސާ ވެގެންދާނެ"

ޖޭޕީގެ އެޑްވައިޒަރު ރިޔާޒް ރަޝީދު

ރިޔާޒު ވިދާޅުވީ ޤާސިމަށް ރިޔާސީ ޓިކެޓު ހަވާލުކުރުމަށް ބާއްވާ ޖަލްސާގެ ތައްޔާރީތައް ޕާޓީން ވެފައިވާ ކަމަށެވެ. އަދި ޖަލްސާގެ ތެރޭގައި ވަރަށް ތަފާތު ކަންތައްތަކެއް ކުރިއަށް ދާނެ ކަމަށެވެ.

ރިޔާޒު ވިދާޅުވީ ޓިކެޓު ޖަލްސާއަށް އަތޮޅުތެރެއިން މީހުން ނުގެންނާނެ ކަމަށެވެ. އެހެން ނަމަވެސް ޖޭޕީ ތަމްސީލުކުރައްވާ އިންތިޚާބީ މަގާމުތަކުގައި ތިއްބެވި ފަރާތްތައް މި ޖަލްސާގައި ބައިވެރިވެވަޑައިގަންނަވާނެކަމަށް އޭނާ ވިދާޅުވި އެވެ.

އެކަން ފާހަގަކުރައްވާ ރިޔާޒު ވިދާޅުވީ މި ޖަލްސާގައި ބައިވެރިވުމުގެ ފުރުސަތު ރައްޔިތުންނަށް ހުޅުވާލާފައިވާކަމަށެވެ. އަދި ޤާސިމަށް ތާއީދުކުރައްވާ ވީހާވެސް ގިނަ ބަޔަކު މި ޖަލްސާގައި ބައިވެރިވެވަޑައިގަތުމަކީ ޕާޓީގެ ވަރަށް ބޮޑު އެދުމެއްކަމަށް ރިޔާޒު ވިދާޅުވި އެވެ.