އިނގުރައިދޫގައި ސްލިޕްވޭއެއް ހަދަން ބިން ދޫކުރަން ހުޅުވާަލައިފި

ރ. އިނގުރައިދޫގައި ސްލިޕްވޭއެއް ހަދަން ބިން ދޫކުރަން އެރަށު ކައުންސިލުން ހުޅުވާަލައިފިއެވެ.

އެރަށު ކައުންސިލުން ކުރި އިއުލާނެއްގައި ބުނީ، އޮޑި ދޯނިފަހަރު މަރާމާތުކުރުމަށްޓަކައި ފަސޭހަ ނިޒާމެއް ގާއިމު ކުރުމުގެ ގޮތުން، ސްލިޕްވޭއެއް ހެދުމަށް 35 އަހަރުގެ މުއްދަތަށް ބިމެއް ކުއްޔަށް ދޫކުރުމަށް ނިންމާފައިވާ ކަމަށެވެ.

އެގޮތުން ސްލިޕްވޭ އެޅުމަށް މިހާރު ހުރި ބިމުން 118130 އަކަފޫޓު ގެ ސަރަޙައްދެއް ކަނޑައެޅިފައިވާ ކަމަށާއި އަދި 452676 އަކަފޫޓުގެ ގެ ބިމެއް މޫދުން ހިއްކެންއޮތްކަމަށް އިނގުރައިދޫ ކައުންސިލުން ބުންޏެވެ.

ނަމަވެސް އެ ބިން ހިއްކަން ބޭނުންނަމަ ހިއްކަން ހަމަޖެހިފައި ވަނީ ޕްރޮޖެކްޓް ލިބޭ ފަރާތުންނެވެ.

އިނރުގައިދޫ ކައުންސިލުން އިތުރަށް ބުނީ، ހިއްކާ ބިމަށް ކުލި ހިނގާނީ ބިން ހިއްކާނިމި ބޭނުންކުރަންފަށާތާ ދެ އަހަރު ދުވަސް ވުމުން ކަމަށެވެ.

ބިމުކުލީގެ ގޮތުގައި ނެގުމަށް ހަމަޖެހިފައިވަނީ އަކަފޫޓަކަށް ފަސް ލާރި އެވެ. އަދި ކޮންމެ ފަސް އަހަރަކުން ބިމުކުލީގެ ރޭޓަށް އަކަފޫޓަކަށް 10 ލާރި އިތުރުވާނެ ކަމަށް އިނގުރައިދޫ ކައުންސިލުން ބުނެއެވެ.

މިކަމަށް ޝައުގުވެރިވާ ފަރާތްތަކަށް މަޢުލޫމާތު ދިނުމުގެ ބައްދަލުވުމެއް ބޭއްވުމަށްވަނީ ހަމަޖެހިފައެވެ.

އެހެންކަމުން އެ ބައްދަލުވުމުގައި ބައިވެރިވާން ބޭނުންވާ ފަރާތްތަކުން 21 ޖޫން 2023 ވާ ބުދަ ދުވަހުގެ 14:00ގެ ކުރިން އިނގުރައިދޫ ކައުންސިލް އިދާރާގައި  އެކަމަށް އެދި ނަން ނޯޓް ކުރުމަށް އެ ކައުންސިލުން ކުރި އިއުލާނުގައި އެދިފައިވެއެވެ.

ބައްދަލުވުން ބާއްވާނެ ތާރީޚާއި، ތަނާއި އަދި ގަޑި، ނަންނޯޓް ކުރައްވާފަރާތްތަކަށް ވަކިން އެންގުމަށް ވަނީ ހަމަޖެހިފައެވެ.      ސްލިޕްވޭ ހެދުމުގެ މަސައްކަތް ކޮށްދިނުމަށް ޝައުޤުވެރިވާ ފަރާތްތަކުން، އަންނަ މަހުގެ 09 ވަނަ ދުވަހުގެ 13:00 ގެ ކުރިން އެ އިދާރާއަށް ހުށަހެޅުމަށް އިނގުރައިދޫ ކައުންސިލްގެ އިދާރާއިން ވަނީ އެދިފައެވެ.