ކުޑަކުއްޖަކާއެކު ސައިކަލެއްގައި އިން މީހަކު ހައްޔަރުކުރި މައްސަލަ ބަލަން އިދިކޮޅުން ގޮވާލައިފި!

ހުކުރު ދުވަހު އިދިކޮޅު ކޯލިޝަނުން އިހުތިޖާޖު ކުރަމުން ދިޔަ ސަރަހައްދުން ދަތުރުކުރި މީހަކަށް އެއްވެސް ބެލުމެއް ނެތި، އޭނާއާއެކި އިން ކުޑަކުއްޖާގެ ކުރިމަތީގައި އަނިޔާވެރިކަމާއެކު ހައްޔަރުކުރި ކުރުން އިދިކޮޅު ކޯލިޝަނުން ކުށްވެރިކޮށްފި އެވެ.

އެކަން ކުށްވެރިކޮށް އިދިކޮޅުން ނެރުނު ބަޔާނެއްގައި ބުނެފައިވަނީ، އިދިކޮޅުގެ ސުލްޙަވެރި އިޙުތިޖާޖު ހިނގަމުން ދަނިކޮށް އެސަރަޙައްދުން ކުޑަކުއްޖަކާއެކު ސައިކަލެއްގައި ދަތުރު ކުރަމުން ދިޔަ މީހަކު އެއްވެސް ބެލުމެއް ނެތި، ވީނުވީއެއް ނޭނގި ކުޑަ ކުއްޖެއްގެ ކުރިމަތިން އަނިޔާވެރިކަމާއެކު ހައްޔަރު ކުރި ކުރުމަކީ އެ ކޯލިޝަނުން އެއްވެސް ހާލެއްގައި ބަލައިގަންނާނެ ކަމެއް ނޫން ކަމަށެވެ. އަދި ފުލުހުންގެ އެޢަމަލު އެންމެ ހަރުކަށި ޢިބާރާތުން އިދިކޮޅުން ވަނީ ކުށްވެރިކޮށްފަ އެވެ

"ސުލްޙަވެރިކަމާއެކު ކުރިއަށް ގެންދެވުނު އިޙުތިޖާޖު ހިނގަމުން ދިޔަ ސަރަހައްދުން ސައިކަލެއްގައި ކުޑަ ކުއްޖަކާ އެކު ދަތުރު ކުރި ފިރިހެނަކު އެސަރަޙައްދަށް މަޑުކޮށް އޭނާގެ ފޯނުން ފޮޓޯއެއް ނެގުމަށްފަހު ސަރަޙައްދުން ދިޔުމަށް މަސައްކަތް ކުރަނިކޮށް އެ ފިރިހެން މީހާގެ ސައިކަލުގައި އިން އެކުއްޖާއާއި ޙަވާލުވަނީ ކާކުތޯވެސް ބެލުމެއް ނެތި، އެކުއްޖާގެވެސް ކުރިމަތީ އެ މީހާއަށް ފުލުހުން އަނިޔާކޮށް، އަނިޔާވެރިކަމާއެކު ހައްޔަރުކުރި ކުރުން އެއީ ވަރަށްވެސް ޒިންމާދާރުކަން ކުޑަކޮށް ފުލުހުން ހިންގި ޢަމަލެއް ގޮތުގައި މިކޯލިޝާނުން ސިފަ ކުރަމެވެ"

އިދިކޮޅު ކޯލިޝަންގެ ބަޔާން

އިދިކޮޅުން ބުނީ ރާއްޖޭގެ މަގުތަކަކީ ޢާންމުންނަށް އަމާން ތަނެއް ކަމުގައި ހެދުމުގެ ޒިންމާ ޙަވާލުވެފައިވާ ދިވެހި ފުލުހުންގެ ޚިދުމަތުގެ ފަރާތުން ހިނގާ ބިގާވެ ދަތުރުކޮށް އުޅޭ މީހުންނަށް ސަބަބު ނޭނގި ފުލުހުން އަނިޔާކުރަން ފެށުމަކީ މާލޭގެ މަގުތަކުގެ އަމާންކަމާމެދު ރައްޔިތުން ސުވާލު އުފައްދާނެ ކަމެއްކަމަށް އެ ކޯލިޝަނުން ދެކޭ ކަމަށެވެ.

އޭގެ އިތުރުން އެމީހާ ހައްޔަރުކުރި މައްސަލަ ވަރަށް ސީރިއަށް މައްސަލައެއްގެ ގޮތުގައި ތަޙުޤީޤުކޮށްދިނުމަށް ހިޔުމަންރައިޓްސް ކޮމިޝަން އޮފް ދަ މޯލްޑިވްސްއާއި ނޭޝަނަލް އިންޓެގްރިޓީ ކޮމިޝަނަށް ގޮވާލާ ކަމަށާއި، މިމައްސަލައަކީ ފުލުހުންގެ މުއައްސަސާއިންވެސް ބަލަންޖެހޭ މައްސަލައެއްކަމަށް ފެންނާތީ، މިމައްސަލަ ބަލާ މިކަން ހިނގާ ދިޔަ ގޮތް ޢާންމުނާއި ޙިއްސާކޮށްދިނުމަށް ކޮމިޝަނަރ އޮފް ޕޮލިސްއަށް ވެސް ގޮވާލަކަމަށް އިދިކޮޅުން ވަނީ ބުނެފައެވެ.

އެއާއެކު އިދިކޮޅުން ވަނީ ސުލްޙަވެރި އިޙުތިޖާޖުގެ ތެރެއިން ހައްޔަރުކޮށްފައިވާ ކުށެއް ނެތް އެންމެންނާއި އިޙުތިޖާޖު ހިނގަމުން ދަނިކޮށް އެސަރަޙައްދުން ކުޑަކުއްޖެއްގެ ކުރިމަތިން އަނިޔާވެރިކަމާއެކު ހައްޔަރު ކުރި މީހާ ވަގުތުން ވަގުތަށް ދޫކޮށްލުމަށް ގޮވާލައިފަ އެވެ.