ފައްޔާޒުގެ ބޮޑު ތުހުމަތެއް: އަތޮޅުތެރޭގެ 80 އިންސައްތަ މީހުން "އޮރިޔާން ފިލްމު" ބަލާ!
އަތޮޅުތެރޭގައި ދިރިއުޅޭ 80 އިންސައްތަ މީހުން ޕޯން ނުވަތަ އޮރިޔާން ފިލްމުބަލާކަމަށް އިކޮނޮމިކް މިނިސްޓަރު އަދި ސަރުކާރު ހިންގާ މައި ޕާޓީ އެމްޑީޕީގެ ޗެއަރޕާރސަން ފައްޔާޒު އިސްމާއިލް ވިދާޅުވެއްޖެއެވެ.
ފައްޔާޒު އެފަދައިން ތުހުމަތުކުރައްވާ ވާހަކަދައްކަވާފައިވަނީ އެމްޑީޕީގެ ގައުމީ މަޖިލިސް ވަޓްސްއަޕް ގުރޫޕުގައި އެ ޕާޓީގެ ރައީސް އަދި މަޖިލީހުގެ ރައީސް މުހައްމަދު ނަޝީދު ދެއްކެވި ވާހަކަތަކާއި ގުޅިގެންނެވެ.
މާލެއަށް އަތޮޅުތެރެއިން މީހުން އަންނަ ސަބަބާއި ގުޅޭގޮތުން ނަޝީދު ވިދާޅުވީ އަތޮޅުތެރެއިން މީހުން މާލެ އަންނަނީ ރަށްރަށުގައި މުނިފޫހި ފިލުވޭނެ ވަސީލަތްތައް މަދުވުމުންކަމަށެވެ. މިހާރުގެ ޖީލު ރަށްފުށުގެ ދިރިއުޅުމަށްވުރެ ސިޓީއެއްގެ އާބަން ދިރިއުޅުމަށް ވާ ބޮޑަށް ޝައުގުވެރިވާކަމަށް ނަޝީދުވަނީ ވިދާޅުވެފައެވެ.
އެ ވާހަކައިގެ އިތުރު ތަފްސީލުތައް ހާމަކުރައްވަމުން ނަޝީދު ވިދާޅުވީ އަތޮޅުތެރޭގެ އެއްވެސް ރަށެއްގައި ސިނަމާއެއްވެސް ނެތްކަމަށެވެ. ގެސްޓުހައުސް ހިންގާ ރަށްރަށުގައި ކެފޭތައް ހުރި ނަމަވެސް، ގިނަ ރަށްރަށުގައި ކުރާނެ ކަމެއް ނެތްކަމަށް ނަޝީދު ވަނީ ވިދާޅުވެފައެވެ.
އެކަންކަން ފާހަގަކުރައްވާ ނަޝީދު ގައުމީ މަޖިލީހަށް ފޮރުވި މެސެޖަށް ޖަބާބުދެއްވަމުން ފައްޔާޒު ވިދާޅުވީ ނަޝީދުގެ ވާހަކައަަށް އޭނާ ތާއީދުނުކުރައްވާކަމަށެވެ. އަތޮޅުތެރޭގައި ދިރިއުޅޭ 80 އިންސައްތަ މީހުން މުނިފޫހިފިލުވުމަށް ކުރާ ކަމަކީ އޮރިޔާން ފިލްމު ބެލުންކަމަށް ފައްޔާޒު ވިދާޅުވިއެވެ.
ފައްޔަޒީ މީގެ ކުރިންވެސް އޮފީސްތަކުގައި މަސައްކަތްކުރާ ފިރިހެނުންގެ ބޮޑު ބަޔަކީ އެއްޖިންސުން ގުޅުންހިންގާ ބައެއް ކަމުގައި ދޭހަވާ ޓުވީޓެއް ކުރައްވާފައިވާ ބޭފުޅެކެވެ.
އެހެން ނަމަވެސް އެފަދައިން އޭނާ ހިސާބުތައް ހާމަކުރައްވަނީ ކޮން ދިރާސާއަކަށް ބައްލަވާފަކަމެއް ހާމަކުރައްވާފައެއް ނުވެއެވެ.
މިފަހަކަށް އައިސް، ސަރުކާރުގެ އިސް ފަރާތްތަކުން އަތޮޅުތެރޭގެ ރައްޔިތުން ކުޑައިމީސްވާ ގޮތަށް ގިނަ ވާހަކަދައްކަމުންދާކަން ފާހަގަކޮށްލެވެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
