މޫސަ އެނބުރި އެމްޑީޕީއަށް އައުމަކީ ލިބުނު އިތުރު ހިތްވަރެއް: ރައީސް ސާލިހު
އެމްޑީޕީގެ ކުރީގެ ޗެއަރ ޕަރސަން އަދި ރައްޔިތުންގެ މަޖިލީހުގެ ކުރީގެ ނައިބު ރައީސް ރީކޯ މޫސާ މަނިކު އެނބުރި އެމްޑީޕީއާ ގުޅިވަޑައިގަތުމަކީ ޕާޓީއަށް ލިބުނު އިތުރު ހިތްވަރެއްކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ވިދާޅުވެއްޖެއެވެ.
ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ ލީޑަރޝިޕްގައި 2016 ވަނަ އެމްޑީޕީން ވަކިކުރި ރީކޯ މޫސަ އަލުން އެމްޑީޕީއަށް ސޮއިކޮށް، ފޯމް ޙަވާލުކޮށްފައިވަނީ މުލިއާގޭގައި މިއަދު ބޭއްވި ބައްދަލުވުމެއްގައެވެ.
މި ބައްދަލުވުމުގައި ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙާއި އެމްޑީޕީގެ ޗެއަރޕަރސަން އަދި އިކޮނޮމިކް މިނިސްޓަރ ފައްޔާޒް އިސްމާޢިލްއާއި ހާރިޖީ މިނިސްޓަރ ޝާހިދުއާއި ޑިފެންސް މިނިސްޓަރ މާރިޔާ އަޙްމަދު ދީދީއާއި އެމްޑީޕީގެ ޕަލިމަންޓްރީ ގްރޫޕްގެ ލީޑަރ މުޙައްމަދު އަސްލަމް ބައިވެރިވެވަޑައިގެންނެވިއެވެ.
މޫސަ އަލުން އެމްޑީޕީއާ ގުޅިވަޑައިގަތުމާއި ގުޅިގެން މަރުހަބާ ދަންނަވައި ރައީސް ސާލިހު ކުރެއްވި ޓުވީޓެއްގައި ވިދާޅުވީ، އެމްޑީޕީއަށް ގިނަ ޚިދުމަތްތަކެއް ކޮށްދެއްވާފައިވާ، ކުރީގެ ޗެއާޕާސަން މޫސަ ޕާޓީއާ އަލުން ގުޅިވަޑައިގަތުމަކީ، ޕާޓީ އަށާއި އެންމެނަށް ލިބުނު އިތުރު ހިތްވަރެއްކަމަށެވެ. އަދި މޫސަ އަކީ އަބަދުވެސް އިސްލާހަށް މަސައްކަތްކުރައްވާ ބޭފުޅެއްކަމަށްވެސް ރައީސް ވިދާޅުވިއެވެ.
އެމްޑީޕީގެ އެތެރޭގައި ހިނގައިދިޔަ ހަމަނުޖެހުންތަކެއްގެ ތެރެއިން ރައީސް ނަޝީދާއި ރީކޯ މޫސާގެ ގުޅުން ހީނަރުވެފައި ވީނަމަވެސް ރައީސް ޞާލިހާއިއެކު އޭނާ އަންނަނީ ގާތް ގުޅުމެއް ބާއްވަމުންނެވެ. އެގޮތުން، ރައީސް ޞާލިހުގެ ތައިރޮއިޑް ސާޖަރީއަށްފަހުވެސް ފުރަތަމަ ފެނިފައިވަނީ ރީކޯ މޫސާ އާއި އެކު ނަގާފައިވާ ފޮޓޯ އަކުންނެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
