ނެށުމާއި ދެކޮޅު ހެދި ޓީޗަރުންގެ ތެރެއިން އެކަކު ވަޒީފާއިން ވަކިކޮށް އަނެއް ދެޓީޗަރުންނަަށް ފިޔަވަޅުއަޅައިފި

އުކުޅަހު ސުކޫލު ޕްރީސުކޫލް ދަރިވަރުން ލައްވައި މިއުޒިކާއި އެކު ނަށުވަން ދެކޮޅު ހެދި ތިން ޓީޗަރުންގެ ތެރެއިން ވަގުތީ ޓީޗަރުގެ ވަޒީފާއާއި ބެހޭ އެއްބަސްވުން އުވާލައި، އަނެއް ދެ ޓީޗަރުންނަށް އިސްލާހީ ފިޔަވަޅު އަޅައިފިއެވެ.

އުކުޅަހު ސުކޫލު ކިޔަވައި ދެމުންދާ އެ ތިން ޓީޗަރުންގެ މައްސަލަ ފެންމަތިވެގެން ގޮސްފައިވަނީ އެ ތިން ޓީޗަރުން ޕްރީސްކޫލް ދަރިވަރުންނަށް އަމާޒުކޮށްގެން ބޭއްވުމަށް ހަމަޖެހިފައިވާ ކޮންސާޓެއްގައި މިއުޒިކާއި އެކު ދަރިވަރުން ނެށުވުމަށް އިންކާރު ކުރުމާއި ގުޅިގެން، އެ ސުކޫލު ޕްރިންސިޕަލް ޝަހުލާ ޢިމާދު، އެ ޓީޗަރުންނަށް އެކި ފަހަރު މަތިން އިންޒާރުދީ، އެޑިޔުކޭޝަން މިނިސްޓްރީން އެ ތިން ޓީޗަރުން ސަސްޕެންޑްކުރުމާއި ގުޅިގެންނެވެ.

އެގޮތުން އެ ތިން ޓީޗަރުން އެންމެ ފުރަތަަމަ ސަސްޕެންޑު ކުރީ ނޮވެންބަރު މަހުގެ 16 ވަނަ ދުވަހު އެވެ. އެފަހަރު ދަރިވަރުން ސަސްޕެންޑު ކުރީ 7 ދުވަހަށެވެ. އެއަށްފަހު ތިން ޓީޗަރުންގެ ސަސްޕެންޝަން އިތުރުވެސް ކޮށްފައިވާއިރު، އެ ސަސްޕެންޝަނުގެ މުއްދަތު މިދިޔަ މަހުގެ 30 ވަނަ ދުވަހު ވަނީ ހަމަވެފައެވެ.

އެއަށްފަހު މިހާރު އެތަނުން ވަގުތީ ޓީޗަރުގެ ވަޒީފާއާއި ބެހޭ އެއްބަސްވުން އުވާލާފައިވާއިރު ދާއިމީ ދެޓީޗަރުންނަަށް ވަނީ އިސްލާހީ ފިޔަވަޅު އަޅާފައެވެ.

ވަގުތީ ޓީޗަރުގެ ވަޒީފާއާއި ބެހޭ އެއްބަސްވުން މިނިސްޓްރީން އުވާލާފައިވާއިރު، އެ ޓީޗަރުގެ އެއްބަސްވުމުގެ މުއްދަތު ހަމަވަނީ އަންނަ އަހަރުގެ ޖޫން މަހުގެ 22 ވަނަ ދުވަހަށް ކަމަށް 'ވޮއިސް'އަށް ވަނީ މައުލޫމާތު ލިބިފައެވެ. އަދި އަނެއް ދެ ޓީޗަރުންގެ މައްސަލަ އެއް އަހަރު ވަންދެން ފައިލް ކޮށްފައިވާއިރު، ދެން އެ ޓީޗަރުންގެ އެފަދަ މައްސަލައެއް ފެންމަތިވެއްޖެ ނަމަ، ޓީޗަރުން ވަޒީފާއިން ވަކިކުރަން މިނިސްޓްރީއަށް ފުރުސަތު ލިބިގެންދާނެއެވެ.

މިއުޒިކާއި ދެކޮޅަށް ތެދުވި ޓީޗަރުންނަކީ ކަރިކިއުލަމް އާއި އެއްގޮތަށް ޢަމަލު ނުކުރާކަމަށް ބުނެ މިފަދައިން އެ ޓީޗަރުންނާއިމެދު މިނިސްޓްރީން އަމަލުކޮށްފައިވާއިރު، ޕްރީ ސްކޫލް ގެ ކަރިކިއުލަމް ގައި މިއުޒިކް އަކީ އޮޕްޝަނަލް ނުވަތަ އިޚްތިޔާރީ އެއްޗެކެވެ. އަދި މިއުޒިކް ނުލައި ވެސް ކޮންސާޓުގައި ދަރިވަރުންގެ ހުނަރު ދެއްކޭނެ ގިނަ ހަރަކާތްތަކެއް އެ ޓީޗަރުންވަނީ ހިމަނާފައެވެ. އަދި އޭގެ އިތުރުން، ޕްރީސްކޫލް ބެލެނިވެރިންގެ މެޖޯރިޓީވެސް ތިބީ މިއުޒިކް ލައިގެން ދަރިވަރުން ނަށުވާ ނަމަ އޭގައި ދަރިވަރުން ބައިވެރި ނުކުރާ ގޮތަށް ކަމަށް އެ ސުކޫލުގެ ބެލެނިވެރިއެއް ވަނީ 'ވޮއިސް'އަށް މައުލޫމާތު ދީފައެވެ.