76 މަޝްރޫޢަކަށް އިންވަސްޓަރުން ހޯދުމަށް އެމްޑީޕީގެ "ރަށްވެހި ތަރައްޤީ" ފޯރަމް ފަށައިފި

ލޯކަލް ކައުންސިލްތަކުން ހިންގުމަށް ރާވާފައިވާ 76 މަޝްރޫޢަކަށް އިންވެސްޓްމެންޓް ހޯދުމުގެ ފުރުޞަތު ހުޅުވައިލައި "ރަށްވެހި ތަރައްޤީ" ގެ ނަމުގައި އެމްޑީޕީން މިއަދު އިންވެސްޓްމެންޓް ފޯރަމެއް ފަށައިފިއެވެ.

މި ފޯރަމަކީ ކައުންސިލްތަކުން ތަރައްޤީގެ ގޮތުގައި ރާވާފައި ހުރި މަޝްރޫޢުތަކަށް ފައިސާ ހޯދުމުގެ މަގު ފަހިކޮށްދިނުމުގެ ބޭނުމުގައި ބާއްވާ ހަރަކާތެކެވެ. ހުށަހަޅާ 76 ޕްރޮޕޯސަލްގެ ތެރެއިން 40 ޕްރޮޕޯސަލެއްގައި ބޭނުންވާ އިންވެސްޓްމެންޓްގެ ޢަދަދު ބަޔާންކޮށްފައިވާއިރު އެ ހުށަހެޅުންތަކުގެ ޖުމުލަ އަގު 306 މިލިއަން ޑޮލަރަށް އަރައެވެ.

އަގުގެ ގޮތުން އެންމެ ބޮޑު ހުށަހެޅުން ގެނެސްފައިވަނީ ތިނަދޫ ސިޓީ ކައުންސިލުންނެވެ. އެ ކައުންސިލުން ހުށަހެޅީ ކާޑެއްދޫ އެއާޕޯޓު ތަރައްޤީކުރުމާއި ދެކުނުގެ ސީޕްލޭން ހަބެއް ޤާއިމުކުރުމެވެ. ތިނަދޫ ކައުންސިލުން ޖުމުލަ 6 މަޝްރޫޢެއް ހިމެނޭހެން ޕްރޮޕޯސަލް ހުށަހަޅާފައިވެއެވެ.

މީގެ އިތުރުން، މާލޭ ސިޓީ ކައުންސިލުން ވަނީ ކްލައިމެޓް ޕާކަކާއި ވޯޓާފްރޮންޓް ކްލައިމްބިން ވޯލެއް އަދި ކަސްރަތުކުރާ ސަރަޙައްދެއް ޤާއިމުކުރުމުގެ ހުށަހެޅުން ހުށަހަޅައިފައެވެ.

ހަކަތައާ ގުޅުން ހުރި މަޝްރޫޢުތަކަށް ބެލިޔަސް ކައުންސިލްތަކުގެ ޝައުޤުވެރިކަން ބޮޑެވެ. އައްޑޫ ސިޓީ ކައުންސިލާއި ފުވައްމުލަކު ސިޓީ ކައުންސިލުން ސޯލާ ހޯމް ބެޓެރީ މަޝްރޫޢެއް ހިންގުމަށް އިންވެސްޓަރުން ހޯދާއިރު ކުޅުދުއްފުށީ ސިޓީ ކައުންސިލުން ހުށަހެޅީ "ގޭދޮށު އިންޖީނުގެ" ނަމުގައި އަވިން ހަކަތަ އުފައްދާ މަޝްރޫޢެކެވެ.

އައްޑޫ އަދި ފުވައްމުލަކު ދެ ކައުންސިލް ގުޅިގެން ޖުމުލަ 8 މަޝްރޫޢަކަށް ފައިސާ ހޯދުމަށް ހުށަހަޅާފައިވާއިރު އޭގެ ތެރޭގައި އައްޑޫގައި ކޮންވެންޝަން ސެންޓަރެއް ބިނާކުރުން ހިމެނެއެވެ.

ސިޓީ ކައުންސިލްތަކުގެ އިތުރުން 27 ރަށު ކައުންސިލަކުން ވެސް މި ފޯރަމަށް ޕްރޮޕޯސަލް ހުށަހަޅައިފައިވެއެވެ.