ކ.ހުރާއިން ބަންޑާރަ ގޯއްޗަށް އެދި ފޯމް ހުށަހެޅުމުގެ ފުރުސަތު ހުޅުވާލައިފި

ކ.ހުރާއިން ދޫކުރުމަށް ނިންމާފައިވާ ބަންޑާރަ ގޯތިތަކަށް ކުރިމަތިލުމުގެ ފުރުސަތު އާއްުކޮށް ހުޅުވާލައިފިއެވެ.

ގެޒެޓްގައި އާއްމުކޮށްފައިވާ އިއުލާނަށް ބަލާއިރު ރާއްޖޭގެ ކޮންމެ ރަށެއްގެ ރައްޔިތަކަށްވެސް ހުރާއިން ދޫކުރާ ބަންޑާރަ ގޯއްޗަށް އެދި ކުރިމަތިލެވެއެވެ. ނަމަވެސް ޕޮއިންޓް ދE އުސޫލްތަކަށް ބަލާއިރު، ޕޮއިންޓް ހޯދުމަށް އޮންނަ ފުރުސަތު ހަނިކަން ފާހަގަކޮށްލެވެއެވެ.

ހުރާ ކައުންސިލުން ބުނީ ބަންޑާރަ ގޯތީގެ ގޮތުގައި ދޫކުރުމަށް ނިންމާފައިވަނީ، 1500 އަކަފޫޓްގެ 150 ގޯތި ކަމަށެވެ. ގޯތިތައް ދޫކުރުމަށް ނިންމާފައިވަނީ އެރަށު ކައުންސިލްގެ އިހްތިސާސްގެ ތެރޭގައި ހިމެނޭ ފަޅުތެރެއިން ހުރާގެ ރައްޔިތުންނަށް ބޯހިޔާވަހިކަންދިނުމަށް ހިއްކާފައިވާ ބިމުގެ ސަރަހައްދުންކަމަށް ކައުންސިލުން ބުނެއެވެ.

ހުރާއިން ގޯތި ދޫކުރުމުގެ އުސޫލަށް ބަދަލުގެނައުމަށްފަހު އަލުން ބަންޑާރަ ގޯއްޗަށް ލުމަށް ހުޅުވާލިނަމަވެސް، ކުރިން ލާފައިވާ އެއްވެސް ފޯރމެއް ބާޠިލް ނުވާނެކަމަށެވެ. ނަމަވެސް މިފަހަރު ލާ ފޯމަށް މާކްސް ދިނުމުގައި ބަލާނީ އިސްލާހްކުރި އުސޫލްތަކަށްކަމަށް މި އިއުލާނުގައި ވެއެވެ.

އިއުލާންގައި ވާގޮތުން މިމަހުގެ 15 ވަނަ ދުވަހުގެ ނިޔަލަށް ފޯމް ދޫކުރުމަށް ނިންމާފައިވާއިރު، ފޯމް ހުށަހެޅޭނީ 11 އިން ފެށިގެން 15 ވަނަ ދުވަހާ ހަމައަށެވެ.