ތުޅާދޫ އެއާޕޯޓާއި ހޮސްޕިޓަލް އަޅަން ވީ ވައުދު ވަރަށް އަވަހަށް ފުއްދައިދޭނަން: ރައީސް

ތުޅާދޫ އެއާޕޯޓާއި ހޮސްޕިޓަލް އަޅަން ވީ ވައުދު ވަރަށް އަވަހަށް ފުއްދައިދެއްވާނެ ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވެއްޖެއެވެ.

ބ. އޭދަފުށީގައި މިއަދު އޮތް ރައީސް ޞާލިހުގެ ރިޔާސީ ޕްރައިމަރީ ކެންޕެއިން ޖަލްސާގައި ވާހަކަ ދައްކަވަމުން އެމަނިކުފާނު ވިދާޅުވީ، މިހާތަނަށް ރައްޔިތުންނަށް ހޯދައިދީފައި ނުވާ އަސާސީ އެތައް ޚިދުމަތް ތަކެއް ފޯރުކޮށްދިނުމުގެ މަސައްކަތް އެމަނިކުފާނުގެ ސަރުކާރަށް މިވީ 4 އަހަރު ދުވަހުގެ ފަށައި އެކަންކަން ކުރިއަށްދާ ކަމަށެވެ.

އަދި ތަރައްގީގެ އެފަދަ މަޝްރޫއުތައް ހުއްޓުމެއްނެތި ކުރިއަށް ގެންގޮސް އިތުރު މަޝްރޫއުތައް ފެށޭނީވެސް ކުރިއަށް އޮތް ދައުރުގައިވެސް މި ސަރުކާރަށް ވެރިކަން ކުރުމުގެ ފުރުސަތު ލިބިގެން ކަމަށް އެމަނިކުފާނު ވިދާޅުވިއެވެ.

މިއާއެކު އެމަނިކުފާނު ވަނީ ރަށްތައް ތަރައްގީ ވުމަށް ދަތުރުފަތުރުގެ ނިޒާމްގެ މުހިންމު ކަން ފާހަގަކުރައްވައި، ކަނޑު ދަތުރުފަތުރާއި އެއްގަމު ދަތުރުފަތުރުގެ އިތުރުން ވައިގެ މަގުން ދަތުރުފަތުރު ކުރިއެރުވުމުގެ މުހިންމުކަން ފާހަގަކުރައްވާފައެވެ.

"އަޅުގަނޑުމެން ވާނެ ރިޔާސީ އިންތިހާބުގައި ކޮންމެ ރަށަކުން ފުރައިގެން އެއާރޕޯޓަކަށް 20-30 މިނިޓް ތެރޭ ދެވޭނެ ވަރަށް އެއާޕޯޓްތައް ތަރައްގީ ކުރާނެ ވާހަކަ ދަންނަވާފައި. މިހާރުވެސް އެ މަޝްރޫއު ގެ ދަށުން 4 އެއާޕޯޓެއްގެ މަސައްކަތް ކުރިއަށްއެބަދޭ. އޭގެތެރެއިން ހޯރަފުށި ނިމިފައި. މުލީ ކުރިއަށް. ފަރެސްމާތޮޑާ ކުރިއަށް. މަގޫދޫ ކުރިއަށް އެދަނީ. އިތުރަށް އަޅުގަނޑުމެން ވާނެ 4 އެއާޕޯޓް އެޅުމުގެ މަޝްރޫއު ކުރިއަށް ގެންދާނެ ކަމުގެ ވާހަކަ ދަންނަވާފައި."

އެގޮތުން ބ. ތުޅާދޫ ގައިވެސް އެއާޕޯޓެއް އެޅުމަށް މި ސަރުކާރުން ވައުދުވެފައިވާކަން ފާހަގަކުރައްވައި ރައީސް ވިދާޅުވީ އެ ވައުދު ފުރިހަމަ ކުރުމަށްޓަކައި މިހާރު އޮތީ ކުޑަ ދުވަސްކޮޅެއް ކަމަށެވެ.

"އިރާދަކުރެއްވިޔާ ކުރިއަށް މިއޮތް ދެތިން ހަފްތާ ތެރޭގައި އަޅުގަނޑުމެން އެކަން ކުރުމަށްޓަކައި ބަޔަކާއި ހަވާލު ކުރެވޭނެ ކަމުގެ ޔަގީންކަން އަޅުގަނޑުމެން އަރުވަން. އަޅުގަނޑުމެންގެ އަމާޒަކީ އަހަރުގެ މެދުތެރެއަށް އަރާއިރު، އެތަނުގެ ބިން ހިއްކައި އެތަނުގެ އިމާރާތް ކުރުމުގެ މަސައްކަތް ފައްޓަން. އިރާދަކުރެއްވިޔާ އަހަރު ނިމޭއިރު، އެތަން ބޭނުން ކުރެވޭވަރު ކުރުމަކީ އަޅުގަނޑުމެންގެ އަމާޒު." ރައީސް ޞާލިހު ވިދާޅުވިއެވެ.

މީގެ އިތުރުން ތުޅާދޫގައި ހޮސްޕިޓަލެއް ބިނާ ކުރުމަކީވެސް މިސަރުކާރުގެ ވައުދެއްކަން ފާހަގަކުރައްވައި ރައީސް ވިދާޅުވީ އެ ވައުދުވެސް ފުއްދުމުގެ މަސައްކަތް ކުރިއަށް އޮތް މަސްތެރޭގައި ފަށްޓަވާނެކަމަށެވެ.

"އެވައުދުވީ މިތާ ހުރެ އަޅުގަނޑު. މިއަދު އަނެއްކާވެސް އަޅުގަނޑު ޔަގީންކަން މި އަރުވަނީ، ލަސްވަމުން އެދާ ހޮސްޕިޓަލް، އިރާދަކުރެއްވިޔާ ޑައިރެކްޓް އެވޯޑެއްގެ ގޮތުގައި ސަރުކާރުގެ ކުންފުންޏަކާއި ހަވާލުކޮށްގެން ނަމަވެސް، ކުރިއަށް އޮތް މަސް ތެރޭގައި އެކަމުގެ އަމަލީ މަސައްކަތް ފެށުމަށްޓަކައި ކުންފުންޏާ ހަވާލު ކުރާނެ ވާހަކަ ދަންނަވަން." ރައިސް ޞާލިހް ވިދާޅުވިއެވެ.

ރައީސް ޞާލިހު ވިދާޅުވީ، އެ އެންމެހައި ވާހަކަތައްވެސް އެމަނިކުފާނު ދައްކަވަނީ، "ހަމަ ވާހަކަ" އެއް ދެއްކުމުގެ ގޮތުން ނޫން ކަމަށާއި، އެކަންކަން ކޮށްދެއްވާނެ ކަމަށެވެ.