އަދަދަށްވުރެ އިތުރަށް ފާހަގަ ޖަހައިފިނަމަ މުޅި ވޯޓު ކަރުދާސް ބާތިލުވާނެ: އިލެކްޝަންސް

ކުރިޔަށް އޮތް ލޯކަލް ކައުންސިލު އިންތިހާބުގައި ކޮންމެ ދާއިރާއަކަށް ވެސް ހޮވަންޖެހޭ އަދަދަށްވުރެ އިތުރަށް ވޯޓް ކަރުދާޙުގައި ފާހަގަ ޖަހައިފިނަމަ، މުޅި ކަރުދާސް ބާތިލުވާނެ ކަމަށް އިލެކްޝަންސް ކޮމިޝަން (އީސީ) އިން ބުނެފިއެވެ.

ރާއްޖެ ޓީވީގެ ''ފަލަސުރުޚީ'' ޕްރޮގްރާމުގައި ވާހަކަދައްކަވަމުން އީސީގެ ނައިބު ރައީސް އަދި ތަރުޖަމާނު އަހުމަދު އަކުރަމު ވިދާޅުވީ، މިފަހަރުގެ އިންތިހާބުގައި ދާއިރާއަކަށް ހޮވަންވާ އަދަދަށްވުރެ އިތުރަށް ފާހަގަ ޖަހާފައިވާ ނަމަ، ވޯޓު ކަރުދާސް އެއްކޮށް ބާތިލުވާނެ ކަމަށެވެ. ރަނގަޅު ފާހަގަ ނޫން އެހެން ފާހަގައެއް ޖަހައިފިނަމަ ވެސް މުޅި ވޯޓު ކަރުދާސް އެއްކޮށް ބާތިލުވާނެ ކަމަށް އަކުރަމު ވިދާޅުވިއެވެ. އެހެންވެ އެކަންކަމަށް ސަމާލުކަން ދިނުމަށް އަކުރަމު އިލްތިމާސްކުރެއްވިއެވެ.

އަކުރަމު ވިދާޅުވީ، ރަށްރަށުގެ ވޯޓު ކަރުދާހުގައި ހަތަރު ބައެއް ހިމެނޭނެ ކަމަށެވެ. އެގޮތުން އެ ކަރުދާހުގައި އަތޮޅު ކައުންސިލުގެ ރައީސާއި ރަށު ކައުންސިލުގެ ރައީސާއި އަންހެން މެންބަރާއި އިތުރު މެންބަރުން ހޮވަން އޮންނާނެ ކަމަށެވެ. އެބައިގައިވެސް ހޮވަންޖެހޭ އަދަދަށްވުރެ އިތުރަށް ފާހަގަޖަހައިފިނަމަ މުޅި ކަރުދާސް ބާތިލުވާނެ ކަމަށް އެނާ ވިދާޅުވިއެވެ.

އަކުރަމް ވިދާޅުވީ، މާލެ ސިޓީ އާއި އައްޑޫ ސިޓީ އަދި ފުވައްމުލަކު ސިޓީގެ ވޯޓު ކަރުދާހާއި ކުޅުދުއްފުށި ސިޓީގެ ވޯޓު ކަރުދާސް ތަފާތުވާނެ ކަމަށެވެ. އެގޮތުން ކުޅުދުއްފުށި ސިޓީގެ ވޯޓު ކަރުދާސްކޮޅުގައި ހދ. އަތޮޅު ކައުންސިލުގެ ރައީސްކަމަށް ވޯޓުލާން އޮންނާނެ ކަމަށެވެ.

''ކުޅުދުއްފުށި ސިޓީގެ ރައްޔިތުން ވޯޓުލާން ޖެހޭނެ ކުޅުދުއްފުށި ހިމެނޭ އަތޮޅުގެ އަތޮޅު ކައުންސިލުގެ ރައީސްކަމަށް ވެސް. ކުޅުދުއްފުށި ސިޓީގެ ވޯޓު ކަރުދާސްކޮޅުގައި ތިން ބައެއް ހިމެނޭނެ. މާނައަކީ އެއް ކަރުދާހެއްގައި ތިން ވޯޓެއް އޮންނާނެ.'' އަކުރަމު ވިދާޅުވިއެވެ.

އޭޕްރީލް މަހުގެ ހަތަރު ވަނަ ދުވަހު ބާއްވާ އިންތިހާބުގައި ވާދަކުރާ ކެންޑިޑޭޓުންގެ ނަންތައް އަންނަ މަހުގެ ހަތަރެއްގައި އިއުލާން ކުރަން މިހާރު ވަނީ ނިންމާފައެވެ.