އަސްލަމް އައްޑޫއަށް ބަދަލު ވުމަކީ ކޮން ބާވަތެއްގެ ލާމަރުކަޒީ ވިސްނުންފުޅެއްތޯ؟: ވަހީދު
އައްޑޫ ސިޓީ މޭޔަރަކާއި ކައުންސިލެއް އޮތް އިރު، މަގު ހެދުމުގެ މައްސަލަތައް ހައްލު ކުރަން ޕްލޭނިންގ މިނިސްޓަރު މުހައްމަދު އަސްލަމް އެ ރަށަށް ދުވަސް ކޮޅަކަށް ބަދަލުވާތީ ރައްޔިތުންގެ މަޖިލީހުގެ އުނގޫފާރު ދާއިރާގެ މެންބަރު މުހައްމަދު ވަހީދު ފާޑުވިދާޅުވެއްޖެއެވެ.
އައްޑޫގައި ސަރުކާރުން ހިނގާ މަޝްރޫއުތައް ބަލަހައްޓަވައި މަސައްކަތް އަވަސްކުރަން މިނިސްޓަރު އަސްލަމް ދުވަސްކޮޅަކަށް އައްޑު އަށް ބަދަލުވާން ނިންމަވާފައިވާ ކަމަށް އިއްޔެ އޮތް ރައްޔިތުންގެ މަޖިލީހުގެ ޖަލްސާގައި އެމަނިކުފާނު ވަނީ ވިދާޅުވެފަ އެވެ.
އެކަމާއި ގުޅިގެން ވައްޑެ ކުރެއްވި ޓްވީޓެއްގައި އޭނާ ވަނީ އައްޑޫ ސިޓީގައި މޭޔަރަކާ ކައުންސިލެއް އޮވެ، މަސައްކަތްތައް އެފަރާތްތަކަށް ހަވާލު ނުކުރާން އެތަނުގައި މިނިސްޓްރީގެ ސްޓޭޓް މިނިސްޓަރުން / ޑެޕިޔުޓީ މިނިސްޓަރުން ލައްވާފައި، އަނެއްކާ މިނިސްޓަރުވެސް އެކޮޅަށް ބަދަލުވަނީތޯ ސުވާލު ކުރައްވާފައެވެ. އަދި އެއީ ކޮން ބާވަތެއްގެ ލާމަރުކަޒީ ވިސްނުންފުޅެއްތޯ ވެސް އޭނާ ވަނީ ސުވާލު ކުރައްވާފައެވެ.
އިއްޔެގެ މަޖިލީހުގެ ޖަލްސާގައި އައްޑޫގެ މަގު ހެދުމުގެ މަޝްރޫއު ކުރިއަށް ގެންދާ ގޮތާ މެދު އެ ސިޓީގެ މީހުންގެ ހިތްހަމަނުޖެހުންތަކެއް އެބަހުރި ކަމަށް އަސްލަމް ވަނީ ވިދާޅުވެފައެވެ. އެގޮތުން މަގު ހަދަން އެއްފަހަރާ ހުރިހާ މަގެއް ކޮނެފައި އޮތުމުން މީހުންނަށް ދިމާވާ ދަތިތަކާއި އެތައް މައްސަލަތަކެއް އެބަހުރި ކަން އޭނާ ފާހަގަކުރެއްވިއެވެ.
"އެ ކަންކަން ހައްލު ކުރުމަށްޓަކައި އަޅުގަނޑު ދުވަސްކޮޅަކަށް އައްޑޫގައި ބޭސްވުމަށް އަޅުގަނޑު އައްޑު އަށް މޫވް ކުރާނަން،" އޭނާ ވިދާޅުވި އެވެ.
އަސްލަމް އައްޑު އަށް ވަޑައިގަންނަވަނީ އަންނަ ހޮނިހިރު ދުވަހު އެވެ. އަނބުރާ މާލެ ވަޑައިގަންނަވާނެ ދުވަހެއް އޭނާ ވިދާޅެއް ނުވެ އެވެ.
އަސްލަމް އައްޑުއަށް ބަދަލުވާން ނިންމެވުމާއި ގުޅިގެން ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވެސް ވަނީ އެކަމަށް ފާޑުވިދާޅުވެޒ އައްޑޫއަށް އަތޮޅުވެރިއެއް ފޮނުވަނީތޯ ސުވާލު ކުރައްވާފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
