ރިޔާސަތުން މަޖިލިސް ބޭނުން ކުރަނީ ސިޔާސީ ހަސަދަ ފިލުވަން: ޝަރީފް
ރައްޔިތުންގެ މަޖިލީހަކީ ސިޔާސީ ހަސަދަ ފިލުވާތަނަކަށް ރިޔާސަތުން ހައްދަވައިފިކަމަށް މަޖިލީހުގެ އައްޑޫ މަރަދޫ ދާއިރާގެ މެންބަރު އިބްރާހީމް ޝަރީފް (މަވޯޓާ) ވިދާޅުވެއްޖެއެވެ.
ޝަރީފް މިއަދު ކުރެއްވި ވިދާޅުވީ، މަޖިލީހަކީ ރައްޔިތުންގެ ގެ ކަމަށެވެ. އަދި އެ މަޖިލީހުގެ ތަޅުން ބޭނުންކުރެވެން ވާނީ ރައްޔިތުންގެ ލާބަޔާ މަންފާއަށްޓަކައި ކަމަށާ އަދި ގައުމުގެ ސަލާމަތްތެރިކަން ދަމަހައްޓައި، މުޅި ދައުލަތުގެ އެންމެ މަތީ މަސްލަހަތު ހިމާޔަތްކުރުމަށް ކަަމަށްވެސް އޭނާ ވިދާޅުވި އެވެ.
"ނަމަވެސް ރިޔާސަތުން މަޖިލީހަކީ ސިޔާސީ ހަސަދަ ފިލުވާ ތަނަކަށް ހައްދަވައިފި." ޝަރީފު ވިދާޅުވިއެވެ.
ޝަރީފު މިފަދައިން ވިދާޅުވެފައި ވާއިރު, އިއްޔެ ކުރިއަށް ދިޔަ ރައްޔިތުންގެ މަޖިލީހުގެ ޖަލްސާގައިވެސް އޭނާ ވަނީ ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް އެފަދަށް ތުހުމަތު ތަކެއް ކުރައްވާފައެވެ.
އެގޮތުން، ޕްލޭނިންގެ މިނިސްޓަރު މުހައްމަދު އަސްލަމް އާއި މެންބަރަކު ކުރެއްވި ސުވާލަށް ފުރިހަމައަށް ޖަވާބު ނުދެއްވުމުން ނަޝީދު ވަނީ މެމްބަރުންގެ ސުވާލުތަކަށް ސާފު ޖަވާބު ދެއްވުމަށާއި، އިތުރު ވާހަކަތައް މަދުކުރެއްވުމަށް މިނިސްޓަރު އަސްލަމްއަށް އިރުޝާދު ދެއްވާފައެވެ.
ނަޝީދަށް ރައްދު ދެއްވައި އަސްލަމް ވިދާޅުވީ، ޖަވާބު ދިނުމުގައި ގާބިލުކަން ހުރި މިންވަރަކުން ޖަވާބުދެއްވަމުންދާކަމަށެވެ.
އަސްލަމް އެފަދައިން ވިދާޅުވުން އޭނާ އަށް ރައްދު ދެއްވައި ރައީސް ނަޝީދު ވަނީ، "ޖަވާބު ދިނުމުގައި ތެދު ޖަވާބު ސާފު ކޮށް ދެއްވީމާ ނިމުނީ" ކަމަށާ އަދި މިނިސްޓަރު ގެ ގާބިލްކަން އެ ޖަވާބުގެ ތެރެއަށް ވަނުމަކީ ބޭނުންތެރިކަމެއް ނޫންކަމަށް ވިދާޅުވެފައެވެ.
އެއާއި ގުޅިގެން، ރައީސް ނަޝީދުގެ ވާހަކަތަކަށް "ރައްދު ދޭކަށް ނެތިން" ކަމަށް އަސްލަމް ވިދާޅުވެ ވާހަކަ ކުރިއަށް ގެންދަވަނިކޮށް، ޝަރީފް ނިޒާމީ ނުކުތާއެއް ނެންގެވިއެވެ.
އަދި ފަހަކަށްއައިސް ވަޒީރުން މަޖިލީހަށް ގެނައުމަށްފަހު "ހާރުވާ ރޭރުކުރަން" އުޅުއްވާކަން ފާހަގަކުރެއްވޭކަމަށް އޭނާ ވިދާޅުވި އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
