ޕީޕީއެމްގެ ވެރިކަމެއްގައި ބޭރު މީހުންނަށް ތިލަފުށިން ބިން ވެއްކޭ އުސޫލު ބަދަލުކޮށް، ވިއްކި ބިންތައް އަތުލާނަން: އިދިކޮޅު
ދެން އެންމެ އަވަހަށް އުފެދޭ ޕީޕީއެމްގެ ވެރިކަމެއްގައި ބޭރު ފަރާތްތަކަށް ތިލަފުށިން ބިން ވިއްކޭގޮތަށް އޮތް އުސޫލު އުވާލާނެކަމަށް ޕްރޮގްރެސިވް ކޮންގްރެސް ކޯލިޝަނުން ބުނެފި އެވެ.
އެފަދައިން އެ ކޯލިޝަނުން ހާމަކޮށްފައިވަނީ ބޭރު މީހުންނަށް ތިލަފުށިން ބިން 99 އަހަރަށް ދޫކުރުމާއި އެ ކޯލިޝަން ދެކޮޅުކަން ހާމަކޮށް ނެރުނު ބަޔާނެއްގަ އެވެ.
އިދިކޮޅުން ބުނީ ތިލަފުށީގައި ބަނދަރާއި އެހެނިހެން ވަސީލަތްތައް ގާއިމްކުރުމުގެ ކުރިން އެ ސަރަހައްދުގެ ބިން 99 އަހަރަށް ނުއަގުގައި ބޭރުގެ ފަރާތްތަކަށް ދިނުމަކީ އެ ބިން ލިބޭ ފަރާތްތަކަށް ފައިދާ ބޮޑުވާނެ ކަމެއް ކަމަށެވެ. އަދި އެއީ ދިވެހިރާއްޖޭގެ އުފެއްދުންތެރިކަމަށް ވަރަށް ބޮޑަށް އަސަރުކުރާނެ ކަމެއްކަމަށް އިދިކޮޅުގެ އެ ބަޔާނުގައި ވަނީ ބުނެފަ އެވެ.
އިދިކޮޅުން ބުނީ ބޭރު ފަރާތްތަކަށް ތިލަފުށިން ބިން ފޫކުރެވޭގޮތަށް އޮތް އުސޫލު ނިނުމަކަށް ގެނެސް އެތަންތަން އަނބުރާ ހޯދި ނަމަވެސް، ޕީޕީއެމްގެ ވެރިކަމެއްގައި ރާއްޖޭގައި އިންވެސްޓުކުރަން ބޭނުންވާ ފަރާތްތަކަށް ފަހި ފުރުސަތުތަކެއް ހޯދާދޭނެ ކަމުގެ ޔަގީންކަން ދޭ ކަމަށެވެ.
ޕީޕީއެމްގެ ފުރަތަމަ ވެރިކަމުގައި ރައީސް ޔާމީން އަބްދުލްގައްޔޫމުގެ ޒައާމަތީ ރިކޯޑު އަދަދަކަށް ބޭރުގެ އިންވެސްޓުމަންޓުތައް ރާއްޖޭގައި ކުރިއަށް ގެންދިޔަ ދުވަސްވަރެއްކަން އިދިކޮޅުން ފާހަގަކުރި އެވެ.
އިދިކޮޅުން ބުނީ ރާއްޖެއަކީ ބިމުގެ ވަސީލަތްތައް މަދު ގައުމަކަށް ވާއިރު، ރާއްޖޭގެ ބިންތައް ނުއަގުގައި ބޭރު މީހުންނަށް ދޫކުރުމަކީ ދިވެހި ވިޔަފާރިއަށް ވަރަށް ބޮޑަށް ހީނަރުވެގެންދާނެ ކަމެއް ކަމަށެވެ.
އެއާއެކު އިދިކޮޅު ކޯލިޝަނުން ވަނީ ދުރުރާސްތާ ޕްލޭނެއް ނެތި ރާއްޖެއަށް ބޮޑު ގެއްލުމެއް ވާގޮތަށް ތިލަފުށިން ބޭރު މީހުންނަށް ބިން ދޫކުރުމަށް ސަރުކާރުން ނިންމި ނިންމުން ބަދަލުކުރުމަށް ސަރުކާރަށް ގޮވާލާފަ އެވެ.
ސަރުކާރުން އެ ނިންމުން ބަދަލު ނުކުރާނަމަ ދެން އަންނަ ޕީޕީއެމްގެ ވެރިކަމެއްގައި ޔަގީނުންވެސް އެ އުސޫލު ބަދަލުކުރާނެކަމަށް އިދިކޮޅު ކޯލިޝަނުން ވަނީ ބުނެފަ އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
