"އިންޑިއާ އައުޓް" ކެންޕެއިނަކީ ނެތެމުންދާ ޚުދުމުހުތާރު ވެރިއެއްގެ ފަހު ގޮވާލުން: ޝާހިދު

އިދިކޮޅު ކޮންގްރެސް ކޯލިޝަންގެ “އިންޑިއާ އައުޓް” ހަރަކާތަކީ ނެތެމުންދާ ޚުދުމުހުތާރު ވެރިއެއްގެ ފަހު ގޮވާލުން ކަމަށް ވިދާޅުވެ އިދިކޮޅުގެ ސިޔާސަތު ތަކަށް ފޮރިން މިނިސްޓަރު އަބްދުالله ޝާހިދު ވަރަށް ބޮޑަށް ފާޑުވިދާޅުވެއްޖެ އެވެ.

އިންޑިއާގެ އޭބީޕީ ލައިވް އަށް ޝާހިދު ދެއްވި ބަސްދީގަތުމެއްގައި ވިދާޅުވީ، ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ ވެރިކަމުގެ ފާއިތުވި ހަތަރު އަހަރުތެރޭގައި ރާއްޖޭގެ ތަރައްގީއަށް ގިނަ ގުނަ މަސައްކަތްތަކެއް ކޮށްދެއްވާފައިވާ ކަމަށެވެ. އެހެންކަމުން، ކުރިއަށް އޮތް ރިޔާސީ އިންތިހާބުވެސް ފަސޭހަކަމާއި އެކު އެމަނިކުފާނަށް ކާމިޔާބުވާނެ ކަމަށް ޝާހިދު ވިދާޅުވި އެވެ.

"މިހާރުވެސް ސަރުކާރުގެ ކޯލިޝަންގެ ބައިވެރިން ރައީސް ޞާލިހުގެ ފަހަތަށް އަރަފި. އެމީހުން އެފަދައިން އެ ނިންމީ ރައީސް ޞާލިހުގެ ވެރިކަމުގައި ކޮށްފައިވާ ރަނގަޅު ކަންކަން ފެނުމުން."

މިނިސްޓަރު އަބްދުالله ޝާހިދު

މީގެ އިތުރުން، ރާއްޖޭގެ ސިޔާސީ މަޝްރަހުގައި ހިނގަމުންދާ ހަމަނުޖެހުންތަކާއި، އިދިކޮޅުން ކުރިއަށް ގެންދާ އިންޑިޔާ އައުޓް ކެންޕެއިނަށްވެސް ޝާހިދުގެ ވާހަކައިގައި ވަނީ އަލިއަޅުވާލައްވާފައެވެ.

އެގޮތުން ޝާހިދު ވިދާޅުވީ، “އިންޑިއާ އައުޓް” ގެ ނަމުގައި ކުރިއަށް ގެންދާ ހަރަކާތަކީ އެއްވެސް އުސޫލެއް އަދި އަސާސެއް ނެތް އަދި ރައްޔިތުންނަށް ވިއްކޭނެ ސިޔާސަތެއް ނެތް ޕާޓީއަކުން ނަފްރަތު އުފެއްދުމަށް ކުރިއަށް ގެންދާ ހަރަކާތެއްކަމަަށެވެ. އަދި ސަރުކާރާ އިދިކޮޅު ފަރާތްތަކުން އިންޑިއާ އައުޓުގެ ހަރަކާތުގެ އިތުރުން އެއްވެސް ހަރަކާތެއް ނުހިންގާ ކަމަށްވެސް ޝާހިދު ވިދާޅުވި އެވެ.

"އިންޑިއާ އައުޓް ކެންޕެއިނަކީ ނެތެމުންދާ ހުދުމުތާރު ވެރިއެއްގެ ފަހު ގޮވާލުން. އެމީހުން (އިދިކޮޅު ކޯލިޝަން) އިންޑިއާ އައުޓް ހަރަކާތް ކުރިއަށް އެ ގެންދަނީ، ރާއްޖޭގެ ރައްޔިތުންނަށްޓަކައި ހަރުދަނާ ސިޔާސަތެއް އެމީހުންގެ ނެތުމުން. އެހެންވެ އެމީހުން އެ އުޅެނީ ރާއްޖޭގެ އެންމެ ގާތް އަދި އަވަށްޓެރި ރަހުމަތްތެރިޔާ އާއި މެދު ނަފްރަތު އުފައްދަން. އެކަންތައް ކުރުން ނޫން އެހެން ކަމެއް ނެތް އެމީހުން ކުރާނެ. އެމީހުން އުޅެނީ ނަފްރަތާއި ބިރުވެރިކަން އުފައްދަން. އެކަމަކު ދިވެހިންނަކީ އެއަށްވުރެ މާ ވިސްނޭ ބައެއް."

މިނިސްޓަރު އަބްދުالله ޝާހިދު

މީގެ އިތުރުން ރައީސް ޔާމީންނަށް ކުރިއަށް އޮތް އިންތިހާބުގައި ވާދަކުރުމުގެ ޖާގަ ލިބުމާއިމެދު އެނާ ދެކިވަޑައިގަންނަވާ ގޮތާއިމެދު ސުވާލުކުރުމުން ޝާހިދު ވަނީ، އެކަމާއި މެދު ވިދާޅުވާނެ އެއްޗެއް ނެތްކަމަށް ވިދާޅުވެފައެވެ. އަދި ރައީސް ސާލިހުގެ ސަރުކާރާއިމެދު ހިތްހަމަޖެހެންވީ މައި އެއް ސަބަބަކީ، ޝަރުއީ ދާއިރާއަށް ނުފޫޒު ނުފޯރުވާތީކަމަށް ޝާހިދު ވަނީ ވިދާޅުވެފައެވެ.