އިޒްރޭލާއި ރާއްޖެއާއި ދެމެދު ދަތުރުތައް ފަށާކަށް ނުވިސްނަން: މިއުވާން
ދިވެހިރާއްޖެއާއި އިޒްރޭލާއެކު ދަތުރުތައް ފެށުމުގެ ވިސްނުމެއް ސަރުކާރުގެ ނެތް ކަމަށް ރައީސް އޮފީހުގެ ތަރުޖަމާނު މިއުވާން މުހައްމަދު ވިދާޅުވެއްޖެ އެވެ.
މިއުވާން މިފަދައިން ވިދާޅުވެފައިވަނީ އިޒްރޭލުގެ އެއާލައިނަކުން ރާއްޖެއަށް ދަތުރުތައް ކުރުމުގެ ޝައުގުވެރިކަން ފާޅުކޮށްފައިވާއިރު، އެފަދަ އެއްވެސް މަޝްވަރާއެއް ކުރެވިފައި ވޭ ތޯ އާއި، ރާއްޖެއިން އިޒްރޭލަށް ދަތުރުކުރެވޭނެ އިންތިޒާމު ހަމަޖެއްސުމުގެ ވިސްނުން ސަރުކާރުން ގެންގުޅޭތޯ ސާފުކޮށްދިނުމަށް މިއަދު އޮތް ނޫސްވެރިންގެ ބައްދަލުވުމުގައި، ނޫސްވެރިއަކު ކުރި ސުވާލަށް ޖަވާބު ދެއްވަމުން ނެވެ.
އެ ސުވާލާއި ގުޅިގެން މިއުވާން ވިދާޅުވީ އިޒްރޭލުގެ އެއާލައިނަކުން ރާއްޖެއަށް ދަތުރުތައް ކުރުމުގެ ޝައުގުވެރިކަން ފާޅުކޮށްފައިވީ ނަމަވެސް ރަސްމީކޮށް އެފަދަ ހުށައެޅުމެއް އައިސްފައި ނުވާކަމަށެވެ. އަދި އެފަދަ ހުށައެޅުމެއް އައި ނަމަވެސް ދިވެހި ސަރުކާރުން އެކަން ގަބޫލުކޮށް އިޒްރޭލާއެކު ދަތުރުތައް ނުފަށާނެކަމަށް މިއުވާން ވިދާޅުވި އެވެ.
"ކޮންމެސް ވަރަކަށް ނޫސްތަކުން ފެނުނު، އެފަދަ ހުށައެޅުމެއް އިޒްރޭލުގެ ފަރާތުން ނުވަތަ އެ އެއާލައިނުގެ ފަރާތުން ހުށައަޅާފައެއް ނެތް. އަދި އެނގިވަޑައިގަންނަވާނެ ވިޔަފާރީގެ ގުުމެއް ރާއްޖެއާއި އިޒްރޭލާއި ދެމެދަކު ނޯންނާނެ، އެހެންވީމަ އެފަދަ އެއްބަސްވުމަކަށް ނުވަތަ އެފަދަ ދަތުރުތަކެއް ކުރެވޭނެ އިންތިޒާމުތަކެއް ހަމައެއް ނުޖެހޭނެ އަދި ހަމަ އެއާއެއްކޮށް ދެ ގައުމުގެ ދެމެދުގައި އެއާ ސާވިސް އެގްރިމަންޓެއްވެސް ނޯންނާނެ"
ރައީސް އޮފީހުގެ ތަރުޖަމާނު މިއުވާނު މުހައްމަދު
އިޒްރޭލާއެކު ދިވެހިރާއްޖެއިން ވިޔަފާރީގެ އަދި ޚާރިޖީ ގުޅުންތައް ކަނޑާލާފައި ވަނީ ފަލަސްތީނުގެ މުސްލިމުންނަށް އިޒްރޭލުން ކުރާ އަނިޔާތަކާއި ދިވެހި ސަރުކާރު ދެކޮޅުކަން ހާމަކުރުމުގެ ގޮތުން ނެވެ.
މިއަދުގެ ނޫސްވެރިންގެ ބައްދަލުވުމުގައި ރައީސް އޮފީހުގެ ތަރުޖަމާނު މިއުވާނުވެސް އެކަން ފާހަގަކުރެއްވި އެވެ. އަދި ވިދާޅުވީ ރާއްޖެއާއި އިޒްރޭލާއި ދެމެދު ވިޔަފާރީގެ އެއްވެސް ގުޅުމެއް ނޯންނާނެ ކަމަށެވެ. އަދި އެކަން ބަދަލުކުރުމުގެ އެއްވެސް ވިސްނުމެއް މި ސަރުކާރުންވެސް ނުގެންގުޅޭކަމަށް މިއުވާނު ވިދާޅުވި އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
