ޕޭ ފްރޭމްވޯކްގެ މިންގަނޑަށް އިސްލާޙުގެނެސް ޢަމަލުކުރަން ފަށައިފި

ދިވެހި ދައުލަތުގެ ޕޭ ފްރޭމްވޯކްގެ މިންގަނޑަށް ހިޖުރަކުރުމުގެ ޢާންމު މިންގަނޑަށް އިސްލާޙުގެނެސް އެއަށް ޢަމަލުކުރަން ފަށައިފިއެވެ.

މިއަދު ސަރުކާރުން ގެޒެޓްކުރި މި އިސްލާޙު ގައި ބުނެފައިވަނީ އިދާރާތަކުގެ އޮނިގަނޑުތަކުގައި ހިންގުމުގެ ޒިންމާއާއި ވަކި ހާއްސަ ޒިންމާއެއް އަދާކުރުމަށް ކަނޑައަޅައިފައިވާ މަގާމުތައް ދައުލަތުގެ ޕޭ ފްރޭމްވޯކަށް ހިޖުރަކުރުމުގައި އަމަލުކުރާނެ ގޮތެއް ކަނޑައެޅުމަށް ނޭޝަނަލް ޕޭ ކޮމިޝަނަށް ހުށަހެޅުމުގެ އިހްތިޔާރު އެ އިދާރާއަކަށް ލިބިގެންވާ ކަމަށެވެ.

މީގެ އިތުރުން މަރުކަޒީ އިދާރާއަކުން ރެކްރޫޓްމަންޓުގެ މަސައްކަތްތައް ރެގިއުލޭޓްކުރާ ހާލަތްތަކުގައި އެ ކަމެއް ހުށަހަޅާނީ އެފަދަ މަރުކަޒީ އިދާރާއަކުން ކަމަށެވެ. އަދި އެފަދަ މަގާމުތައް ދައުލަތުގެ ޕޭ ފްރޭމްވޯކަށް ބަދަލުކުރާނީ، ނޭޝަނަލް ޕޭ ކޮމިޝަނުން ނިންމާ ގޮތެއްގެ މަތިން ކަމަށެވެ.

ހަމަމިޔާއެކު މި މިންގަނޑުގެ ދަށުން މުވައްޒަފުން ދައުލަތުގެ ޕޭ ފްރޭމްވޯކަށް ހިޖުރަ ކުރުމުގައި ޖޮބް މެޓްރިކްސްގައި ކަނޑައަޅައިފައިވާ މަގާމަށް ހިޖުރަ ކުރެވޭނީ އެ މުވައްޒަފަކު ދައުލަތުގެ ޕޭ ފްރޭމްވޯކަށް ބަދަލުކުރުމުގެ ކުރިން ހުރި މަގާމުގައި އަދާކުރާ މަސްއޫލިއްޔަތުތަކަކީ ހިޖުރަ ކުރެވޭ ޖޮބް މެޓްރިކްސްގެ ފަންނުގެ މަސްއޫލިއްޔަތުތަކަށް ވާނަމަ ކަމަށް ބުނެފައިވެއެވެެ.

އަދި މި މިންގަނޑުގެ ދަށުން މުވައްޒަފުން ދައުލަތުގެ ޕޭ ފްރޭމްވޯކަށް ހިޖުރަކުރުމުގައި، މުވައްޒަފަކު ހިޖުރަ ކުރާ މަގާމަކީ ވަކި ހާއްސަ ލައިސަންސެއް އޮންނަންޖެހޭ މަގާމަކަށް ވެފައި، މުވައްޒަފުގެ އަތުގައި އެފަދަ ލައިސަންސެއް ނެތް ހާލަތުގައި، އެ މުވައްޒަފަކު ދައުލަތުގެ ޕޭ ފްރޭމްވޯކަށް ބަދަލުވުމަށްފަހު ކަނޑައެޅޭ ވަކި މުއްދަތެއްގެ ތެރޭގައި އެ ލައިސަންސް ނަގަންޖެހޭނެ ކަމަށް އެއިސްލާހުގައި ވެއެވެ.

އިސްލާހުގައި ވާގޮތުން "ރަސްމީ ބަންދު ދުވަސް" ތައް ފިޔަވައި އެހެން ދުވަސްދުވަހު އިތުރުގަޑީގެ ފައިސާ ހިސާބުކުރާނީ ދައުލަތުގެ ޕޭ ފްރޭމްވޯކްގެ "މަގާމަށް ކަނޑައަޅައިފައިވާ މުސާރައާއި އިނާޔަތްތަކުގެ މިންގަނޑު" ގައިވާ ގޮތުގެ މަތިން އަސާސީ މުސާރައިން ގަޑިއަކަށް ޖެހޭ މިންވަރު 1.25 އާ ގުނަކޮށްގެން އަންނަ އަދަދު، އެ މުވައްޒަފު އަށް ގަޑިއިރަށްވުރެ އިތުރަށް މަސައްކަތްކޮށްފައިވާ ވަގުތާ ގުނަކޮށްގެންނެވެ.

އަދި "ރަސްމީ ބަންދު ދުވަސް" ތަކުގެ ތެރޭގައި ހިމެނޭ ދުވަހެއް ނަމަ، އިތުރުގަޑީގެ ފައިސާ ހިސާބުކުރާނީ ދައުލަތުގެ ޕޭ ފްރޭމްވަރކްގެ "މަގާމަށް ކަނޑައަޅައިފައިވާ މުސާރައާއި ޢިނާޔަތްތަކުގެ މިންގަނޑު" ގައިވާ ގޮތުގެ މަތީން އަސާސީ މުސާރައިން ގަޑިއަކަށް ޖެހޭ މިންވަރު 1.5 އާ ގުނަކޮށްގެން އަންނަ އަދަދު، އެ މުވައްޒަފެއްގެމަސައްކަތްކޮށްފައިވާ ވަގުތާ ގުނަކޮށްގެން ކަމަށްވެސް ބުނެފައިވެއެވެ..

ހުކުރު ދުވަސްތަކާއި ރަސްމީ ދުވަސްތައް ފިޔަވައި އެހެން ދުވަސްތަކުގެ ތެރެއިން، އިދާރާއިން އާންމުކޮށް މަސައްކަތް ކުރުމަށް ކަނޑައަޅައިފައިވާ ދުވަސްތަކާއި ކަނޑައަޅައިފައިނުވާ ދުވަސްދުވަހު މުވައްޒަފު އިދާރާއަށް ހާޒިރުވެ، އާންމު އުސޫލުން އިދާރާގެ ރަސްމީ މަސައްކަތު ގަޑީގެ ގޮތުގައި ކަނޑައަޅައިފައިވާ ޖުމުލަ ވަގުތުގެ މަދުވެގެންދެބައިކުޅައެއްބައި ވަގުތު މަސައްކަތްކުރާ ހާލަތްތަކުގައި، ހާޒިރީ އިނާޔާތް ލިބޭނެ ކަމަށް އިސްލާހުގައި ބުނެފައިވެ އެވެ..

އަދި ދައުލަތުގެ ބަޖެޓުން ހަރަދުކޮށްގެން ނުވަތަ ހުރިހާ ހަރަދެއް ބޭރުގެ ފަރާތްތަކުން ފޯރުކޮށްދީގެން ރާއްޖެއިން ބޭރަށް ކުރާ ރަސްމީ ދަތުރުތަކާއި، ކުރުމުއްދަތުގެ ޓްރޭނިން ކޯސްތަކާ ގުޅިގެން ވިސާ ނެގުމަށް ރާއްޖެއިން ބޭރަށް ފޮނުވާ މުވައްޒަފުންނަށް ޕޮކެޓްމަނީ ނުލިބޭނެ ކަމަށް ވެސް އިސްލާހުގައި ބުނެފައިވެއެވެ.  .