އީސީއިން ރައީސް ޔާމީންގެ ކެންޑިޑެސީ ބަލައިނުގެންފިނަމަ ސްޕްރީމް ކޯޓަށް ވެސް ދާނަން: ޢަބްދުއްރަޙީމް

އިލެކްޝަންސް ކޮމިޝަން (އީސީ) އިން ޕީޕީއެމް ޕީއެންސީ ކޯލިޝަންގެ ރިޔާސީ ކެނޑިޑޭޓް ރައީސް އަބްދުالله ޔާމީން އަބްދުލްގައްޔޫމުގެ ކެނޑިޑެސީ ބަލައިނުގެންފިނަމަ ސުޕްރީމް ކޯޓަށް މައްސަލަ ހުށަހަޅާނެ ކަމަށް ޕީއެންސީގެ ލީޑަރު ޢަބްދުއްރަޙީމް އަބްދުالله (އަދުރޭ) ވިދާޅުވެއްޖެއެވެ.

އަބްދުއްރަހީމް މިހެން ވިދާޅުވެފައިވަނީ މިއަދު އެ ކޯލިޝަނުން އީސީއާއިއެކު ބައްދަލު ކުރެއްވުމަށްފަހު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުންނެވެ.

އެގޮތުން އަބްދުއްރަހީމް ވިދާޅުވީ އިލެކްޝަންސް ކޮމިޝަނުން ރިޔާސީ އިންތިޚާބަށް ކުރިމަތިލުމަށް ހުޅުވައިލުމުން ރައީސް ޔާމިންގެ ކެންޑިޑެސީ ފައިލް ކުރާނެ ކަމަށެވެ.

އަދި މިކަމުގައި ގާނޫނީ ހުރަހެއް ނެތް ކަމަށް ގަބޫލް ކުރައްވާ ކަމަށް އަބްދުއްރަހީމް ވިދާޅުވިއެވެ.

"ދެން މިސާލަކަށް މިތަނުން ނިންމާ ގޮތެއްގެ މަތިން ދެން އަޅުގަނޑުމެން ކުރަންޖެހޭ މަސައްކަތެއްވެސް އަޅުގަނޑުމެން ކުރާނަމޭ. އެއީ ސުޕްރީމް ކޯޓަށް ދާން ޖެހެންޏާ ދިޔުން ކަމަށް ވިޔަސް."

އަބްދުއްރަހީމް އަބްދުالله

އެގޮތުން ގާނޫނުގައި ހުންނަ ބައެއް ކަންތައްތަކަކީ އެއްބާވަތުގެ ކަންތައްތަކުގެ ގޮތުގައި ކުރިން ސުޕްރީމް ކޯޓުން ނިންމާފައި ހުންނަ ކަންތައްތައް ދެން އަންނަ އެބާވަތުގެ ކަންތައްތަކާއި ބެހޭ ގޮތުން އަމަލު ކުރުމުގަ ބައްލަވާ މިންގަނޑެއް ކަމަށް އަބްދުއްރަހީމް ވިދާޅުވިއެވެ.

މިކަމުގެ މިސާލެއްގެ ގޮތުން އަބްދުއްރަހީމް ވަނީ 17 ވަނަ ރައްޔިތުންގެ މަޖިލީހަށް ކާށިދޫ ދާއިރާގެ މެމްބަރު އަބްދުالله ޖާބިރު ކުރިމަތިލެއްވިއިރު ޖަލުގައި ހުންނެވި މައްސަލަ ނަންގަވާފައެވެ.

އެގޮތުން އެ ފަހަރު ސުޕްރީމް ކޯޓުން އަންގައިގެން ޖާބިރުގެ ކެނޑިޑެންސީ ބަލައިގެފައިވާކަން އަބްދުއްރަހީމް ވަނީ ފާހަގަކުރައްވާފައެވެ.

"އިލެކްޝަންސް ކޮމިޝަނުން ރައީސް ޔާމީންގެ ކެނޑިޑެންސީ ބަލައިނުގަންނަން ނިންމައިފި ހާލަތެއްގަތާ އަޅުގަނޑުމެން ސުޕްރީމް ކޯޓަށް ދާންޖެހޭނީ. އަޅުގަނޑުމެން ދާންޖެހޭ ތަނަކަށް ދާނަމޭ. އަޅުގަނޑު މިދަންނަވާ ވާހަކައަކީ ސުޕްރީމް ކޯޓުން ބައްލަވާނެއޭ މީގެ ކުރިން އެބޭފުޅުން ނިންމަވާފަ ހުރި ކަންތައްތަކަށް. ގާނޫނުގަ ނިހާއީ ހުކުމެއް ނެތުމެއް ނޫން، އެހެން އޮއްވަތާ މިދެންނެވި ކަންތައްތައް ނިމިފަ މިހުރީ،"

އަބްދުއްރަހީމް އަބްދުالله

މިކަމުގައި އީސީއިން ގާނޫނާ އެއްގޮތަށް ކުރިއަށް ގެންދަވާނެ ކަމަށް މިއަދު ބައްދަލުވުމުގައި ވިދާޅުވެފައިވާ ކަމަށް އަބްދުއްރަހީމް ވަނީ ފާހަގަކުރައްވާފައެވެ.

މިއާއިއެކު އެޕާޓީގެ ރިޔާސީ ކެނޑޭޓް ރައީސް ޔާމީން އިންތިޚާބުގައި ކުރިމަތި ނުލެއްވޭނެ ހާލަތަކަށް ވިސްނާފައި ނުވާ ކަމަށް އަބްދުއްރަހީމް ވަނީ ތަކުރާރު ކޮށް ވިދާޅުވެފައެވެ.

"ކުރުކޮށް ދަންނަވަންޔާ ރައީސް ޔާމީންގެ ނަންފުޅު މިއަހަރުގެ ރިޔާސީ އިންތިޚާބުގެ ވޯޓް ކަރުދާސްކޮޅުގަ އޮންނާނެ."

އަބްދުއްރަހީމް އަބްދުالله

ޕީޕީއެމް އިން ވަނީ ރިޔާސީ އިންތިޚާބަށް ތައްޔާރުވުމަށްޓަކައި ކެންޕެއިން ހަރަކާތްތައް ފައްޓާފައެވެ. މިއާއިއެކު "ދިވެހިންގެ ރާއްޖެ" އެޕާޓީގެ ސްލޯގަންގެ ގޮތުގައި  ވަނީ ކަނޑައަޅާފައެވެ.