ފުށުއަރާ ސަރަހައްދުގައި މަސްވެރިކަން ކުރި ކަމުގެ ހެއްކެއް ނެތް: ރިފްއަތު

ރާއްޖެ އާއި މޮރިޝަސްގެ ކަނޑުގެ ސަރަހައްދު ފުށުއަރާ ސަރަހައްދުގައި ދިވެހިން މަސްވެރިކަން ކޮށްފައިވާ ކަމުގެ އެއްވެސް ހެއްކެއް ދައުލަތުގެ އިދާރާތަކުގައި ޑޮކިއުމެންޓް ކުރެވިފައި ނުވާ ކަމަށް އެޓާނީ ޖެނެރަލް އިބްރާހިމް ރިފްއަތު މިރޭ ވިދާޅުވެއްޖެ އެވެ.

ޗާގޮސް އައިލެންޑްސްގެ އިމުގެ މައްސަލާގައި ރޭ ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި އެ މައްސަލާގައި މޮރިޝަސް ކޮޅަށް ވޯޓު ދިނުމުން ރާއްޖޭގެ ދެކުނުގެ މަސްވެރިކަމަށް ލިބިގެންދާ ގެއްލުންތަކާއިމެދު ސުވާލު ކުރުމުން ރިފްއަތު ވިދާޅުވީ، ރާއްޖޭގެ 200 މޭލުގެ އީއީޒެޑްގެ ތެރެއިން ފުށު އަރައިގެން ހިލާފު އުފެދިފައިވާ 4686 އަކަ ކިލޯމީޓަރުގެ ސަރަހައްދުގައި ދިވެހިން މަސްވެރިކަން ކުރި ކަމުގެ އެއްވެސް ހެއްކެއް ފިޝަރީޒް މިނިސްޓްރީ އަދި ކޯސްޓްގާޑަށް ލިބިފައި ނެތް ކަމަށް ރިފްއަތު ވިދާޅުވި އެވެ.

ރިފްއަތު ވިދާޅުވީ، މަސްވެރިކަމުގެ ހައްގު އޮތް ކަމުގެ މައްޗަށް ބިނާކޮށް، އިން ކަނޑައަޅާ ރޮނގަށް ބަދަލުތަކެއް ގެނެވޭކަމަށެވެ. އެހެން ނަމަވެސް އެފަދަ ހައްގެއް އެ ސަރަހައްދެއްގައި އޮތް ކަމަށް ހެއްކާއި ގަރީނާއިން ސާބިތު ކޮށްދޭންޖެހޭކަމަށް އެނާ ފާހަގަކުރެއްވިއެވެ.

"ހެއްކެއް ނެތް ކަމެއްގައި ކިހިނެެއްތޯ އެއްވެސް ކޯޓެއްގައި ސާބިތު ކޮށްދޭނީ. ފިޝިން ރައިޓްސް އަކީ އިކުއި ޑިސްޓެންސް ލައިން އެޖަސްޓު ކުރުމަށް ބޭނުން ކުރެވޭ ހައްގެއް. އެކަމަކު އެ ހައްގު އޮތް ކަން ސާބިތު ކޮށްދޭން ޖެހޭ،" ރިފްއަތު ވިދާޅުވި އެވެ.

ރިފްއަތު އިތުރަށް ވިދާޅުވި ގޮތުގައި މަސްވެރިކަން ކުރި ކަމުގެ ހެކި ހުރުމުގެ އިތުރުން މަސްވެރިކަން ކުރާ ކަމަށް ރާއްޖޭގެ އިތުރުން މޮރިޝަސް އިން ވެސް ކޮންމެވެސް ސިފައެއްގައި ބަލައިގަނެފައި އޮންނަން ޖެހެ އެވެ.

".. އަދި މޮރިޝަސްގެ ފަރާތުން ދިވެހިން އެތަނަށް ގޮސް އުޅުނު ކަމުގެ އެއްވެސް މައުލޫމާތެއް އެއްވެސް އިއުތިރާފެއް އޮތީކީއެއް ނޫން، ދެން ކިހިނެއްތޯ ކޯޓުގައި އެ މައްސަލަ ބައްލަވަން ތިއްބެވި ނުވަ ޖަޖުން އެކަން ބަލައިގަންނާނީ،" ރިފްއަތު ވިދާޅުވި އެވެ.

ރިފްއަތު މިފަދައިން ވިދާޅުވެފައި ވާއިރު،އިމުގެ މައްސަލައިގައި ގިނަ ފަރާތްތަކުން ފާހަގަކުރާ ގޮތުގައި ސަރުކާރުން ގެންގުޅޭ ސިޔާސަތުގެ ސަބަބުން ދިވެހި މަސްވެރިން އެތަނަކުން މަސްވެރިކޮށް ކޮށް ނަފާ ހޯދަމުން އަންނަ ކަނޑުގެ ބޮޑު ސަރަހައްދެއް (ރާއްޖޭގެ ހާއްސަ އިގްތިސާދީ ކަނޑުގެ ސަރަހައްދު) ގެއްލޭނެ އެވެ.