ނަގަމުންދާ ލޯނުތައް ދައްކާނެ ގޮތެއްވެސް ރައީސް ޞާލިހަށް އެނގިވަޑައިނުގަންނަވާ: ޝިޔާމް

ދިވެހި ރައްޔިތުންގެ ނަމުގައި ރައީސުލްޖުމުހޫރިއްޔާ އިބްރާހިމް މުހައްމަދު ސާލިހުގެ ސަރުކާރުން އެތައް ލޯނުތަކެއް ނަގަމުންދާއިރު، އެ ލޯނުތައް އަނބުރާ ދައްކާނެ ގޮތެއް ރައީސް ޞާލިހަށް އެނގިވަޑައިނުގަންނަވާ ކަމަށް ޕީޕީއެމްގެ ނައިބު ރައީސް އަދި ނައިފަރު ދާއިރާގެ މެމްބަރު އަހުމަދު ޝިޔާމް ވިދާޅުވެއްޖެއެވެ.

އިދިކޮޅު ކޮންގްރެސް ކޯލިޝަނުން ރޭ ބޭއްވި ޖަގަހަ ޖަލްސާއެއްގައި ވާހަކަދައްކަވަމުން ޝިޔާމް ވިދާޅުވީ ކުރީގެ ރައީސް ޔާމީނަށް ފާޑުކިއުން އަމާޒުކޮށް މިހާރުގެ ސަރުކާރުން ވެރިކަމަށް އައުމުގެ ކުރިން އެންމެ ގިނައިން ދައްކަމުން ދިޔައީ ލޯނުތައް ނެގުން ހުއްޓާލަން ޖެހޭކަމުގެ ވާހަކަތައް ކަމަށެވެ.

އެހެންނަމަވެސް، މި ސަރުކަާރުން ވެސް އެތަކެއް ލޯނު ތަކެއް އިންޑިއާ އިން ނަގަމުންދާއިރު، އެ ލޯނުތައް ނަގައިގެން ކުރަމުންދާ މަސައްކަތްތަކަކީ ސަރުކާރުގެ މުވައްޒިފުންނަށް މުސާރަ ދިނުމާއި ކަރަންޓު ބިލު ދެއްކުން ފަދަ މަސައްކަތްތައް ކަމަށްވެސް އޭނާ ވިދާޅުވިއެވެ.

ޝިޔާމް ވިދާޅުވީ، ރައީސް ސާލިހުގެ ސަރުކާރުން ނަގަމުންދާ ލޯނުތައް އަނބުރާ ދެއްކުމަށް ކުރައްވާނެ ކަމެއްވެސް ރައީސް ސާލިހަށް ނުވިސްނޭ ކަމަށެވެ. އަދި ގިނަ އަދަދެއްގެ ލޯނުތައް ނަގާފައިވާއިރު، ހުރިހާ ލޯނެއްވެސް ނެގީ އިންޑިއާއިން އެކަނިކަން ޝިޔާމް ފާހަގަކުރެއްވި އެވެ.

"ލޯނު ނަގައިފި، ލޯނު ދައްކާނެ ގޮތެއް ނޭނގެ. މިހާރު އިންޑިއާ އެކަނި ލޯނު ދެނީވެސް. އެހެންވީމަ އިންޑިއާގެ ދަންތުރައެއްގަ ޖެހިފަ މިއޮތީ،" ޝިޔާމް ވިދާޅުވި އެވެ.

އެހެން އެއްވެސް ގައުމަކުން ރައީސް ސާލިހުގެ ސަރުކާރަށް ލޯނެއް ދިނުމަށް ބޭނުން ނުވާކަމަށް ތުހުމަތުކޮށް ޝިޔާމް ވިދާޅުވީ، އެގޮތަށް ދިމާވާ ސަބަބަކީ ރައީސް ސާލިހުގެ ސަރުކާރުން ލޯނު ނަގައިގެން ކުރަމުންދާ ކަންކަމުގެ ސަބަބުން ލޯނުތައް އަނބުރާ ދެއްކޭނެ ކަމާއިމެދު ސުވާލު އުފެދިފައި ވުމެވެ. އަދި ލޯނު ދޭން ތިބި މީހުންނަށް އެ ފައިސާ އަނބުރާ ނުދެއްކޭނެކަން ގައުމުތަކަށް އެނގޭކަމަށް ޝިޔާމް ވިދާޅުވި އެވެ.

އެއާއެކު ފަހަރަކު ލޯނު އެއްބަސްވުމެއްގައި ސޮއި ކުރަމުންދާ ކަމަށް އިޝާރާތްކުރައްވާ ޝިޔާމް ވިދާޅުވީ، ސަރުކާރުންވަނީ އިންޑިއާގެ ރިޒާވް ބެންކާއި އެކު ކަރަންސީ ސްވަޕް އެގްރީމެންޓެއްގައި ސޮއިކޮށްފައިކަމަށެވެ.

"1.2 ބިލިއަންގެ ކްރެޑިޓް ލައިނެއްގައި ޖެހިފައި އޮއްވަ އަނެއްކާ 200 މިލިއަން ޑޮލަރުގެ ކަރަންސީ ސްވެޕެއްގައި މި ޖެއްސީ. ދެން އިހަކަށްއދުވަހު އަނެއްކާ 100 މިލިއަން ޑޮލަރުގެ ލޯނެއް ކަމެއް، ހިލޭ އެހީއެއް ކަމެއް މީ ކިހިނެއްވާ އެއްޗެއް ކަމެއްވެސް ސަރުކާރަށް ބުނެނުދެވުނު."

މީގެ އިތުރުން ޝިޔާމް ވިދާޅުވީ، ރައްޔިތުންގެ ނަމުގައި ނަގަމުންދާ ލޯނުތަކާއި ގުޅޭ މައުލޫމާތުތައް ދޭންޖެހޭކަމަށެވެ. އަދި މި ސަރުކާރު އައި ދެ ފުއް ފެންނަ ގޮތަށް ވެރިކަން ކުރަންކަމަށް ވީ ނަމަވެސް މިހާރު ފެނިގެންދަނީ ސުވާލު ކުރުމުން ޖަވާބު ނުދީ ފިލާ މަންޒަރުކަމަށްވެސް އެނާ ވިދާޅުވިއެވެ.