ފުށިދިއްގަރުފަޅު މަޝްރޫއު ބަޖެޓުން އުނިކުރުމަކީ ރައްޔިތުންގެ ބޯހިޔާވަހިކަމުގެ އުންމީދުގައި ކޮޅުފައިން ޖެހުން: ހަމްދާން

ރައީސުލްޖުމްހޫރިއްޔާ ޑރ މުހައްމަދު މުއިއްޒު މާލެ ސަރަހައްދުގެ ރައްޔިތުންގެ ބޯހިޔާވަހިކަން ކަށަވަރުކޮށްދިނުމަށް އިއުލާނުކުރި އެންމެ ބޮޑު މަޝްރޫއު، ފުށިދިއްގަރުފަޅު މަޝްރޫއު މިއަހަރުގެ ބަޖެޓުން އުނިކުރުމަކީ ރައްޔިތުންގެ ބޯހިޔާވަހިކަމުގެ އުންމީދުގައި ކޮޅުފައިން ޖެހުން ކަމަށް ފަހިދިރިއުޅުން ކޯޕަރޭޝަންގެ މެނޭޖިން ޑިރެކްޓަރު ހަމްދާން ޝަކީލު ވިދާޅުވެއްޖެ އެވެ.

މިއަހަރުގެ ބަޖެޓުގައި ފުށިދިއްގަރުފަޅު މަޝްރޫއު ފަށައި، ބިން ހިއްކުމަށް 400 މިލިއަން ރުފިޔާ ވަނީ ހިމަނާފަ އެވެ.

އެހެން ނަމަވެސް ބުރާސްފަތި ދުވަހުގެރޭ ކުރިއަށް ގެންދިޔަ މަޖިލީހުގެ ބަޖެޓު ދިރާސާ ކޮމެޓީން ވަނީ އެ މަޝްރޫއަށް ކަނޑައެޅު ބަޖެޓު އުނިކޮށް އެ ފައިސާ ހުޅުމާލެ، ގުޅިފަޅު އަދި ގިރާވަރު ފަޅު ހިއްކުމުގެ މަޝްއޫއަށް ކަނޑައަޅާފަ އެވެ.

ބަޖެޓު ކޮމެޓީގެ އެ ނިންމުމަށް ފާޑުވިދާޅުވެ ހަމްދާނު ކުރެއްވި ޓްވީޓެއްގައި ވިދާޅުވީ އެމްޕީޑީ މެޖޯރިޓީ ކޮންޓްރޯލު ކުރާ ބަޖެޓު ކޮމެޓީގެ އެ ނިންމުމަކީ ރައްޔިތުންގެ ބޯހިޔާވަހިކަމުގެ އުންމީދުގައި ކޮޅުފައިން ޖެހުން ކަމަށެވެ.

"ދައުލަތުގެ ބަޖެޓުން ފުށިދިއްގަރުފަޅު ޕްރޮޖެކްޓް އުނިކުރަން އެމްޑީޕީ މެޖޯރިޓީ މަޖިލިސް ކޮމިޓީއިން ނިންމި ނިންމުމަކީ ދިވެހި ރައްޔިތުންގެ ބޯހިޔާވަހިކަމުގެ އުންމީދުތަކުގައި ކޮޅުފައިން ޖެހުން"

ހަމްދާނު ޝަކީލް

ފުށިދިއްގަރުފަޅު މަޝްރޫއަކީ މި ސަރުކާރުން ބޯހިޔާވަހިކަން ކަށަވަރުކޮށްދިނުމަށް އިއުލާނުކުރި އެންމެ ބޮޑު މަޝްރޫއެވެ.

މި މަޝްރޫއުގެ ދަށުން 1200 ހެކްޓަރުގެ ބޮޑު ސަރަހައްދެއް ހިއްކައި 11900 އަށްވުރެ ގިނަ ގޯއްޗާއި 26000 ފްލެޓު ދިނުމަށް ސަރުކާރުން ވަނީ ޕްލޭނުގައި ހިމަނާފައެވެ.

މި މަޝްރޫއު މުޅިން ނިމޭއިރު، މާލެ ސަރަހައްދަށް ދިމާވެފައިވާ ބޯހިޔާވަހިކަމުގެ މައްސަލައަށް ދާއިމީ ޙައްލެއް ލިބިގެންދާނެ ކަމުގެ ޔަގީންކަން ދެއްވާކަމަށް ރައީސް ޑރ މުހައްމަދު މުއިއްޒު ވަނީ ވިދާޅުވެފަ އެވެ.