މިދިޔަ 2 އަހަރު ތެރޭ އެކި ދާއިރާތަކުން 541 ޒުވާނުން ތަމްރީނުކޮށްފިން: ޔޫތު މިނިސްޓްރީ

ފާއިތުވި 2 އަހަރު ތެރޭގައި ޒުވާނުން ތަމްރީނު ކުރުމުގެ އެކިއެކި ޕްރޮގްރާމްތަކުގެ ތެރެއިން 541 ޒުވާނުން ތަމްރީނު ކޮށްފައިވާ ކަމަށް ޒުވާނުން ބާރުވެރިކުރުވުމާއި މަޢުލޫމާތާއި ފަންނާ ބެހޭ ވުޒާރާއިން މައުލޫމާތުދީފިއެވެ.

މި ވުޒާރާއިން މައުލޫމާތުދިންގޮތުގައި، ފާއިތުވި 2 އަހަރު ތެރޭގައި އެޕްރެންޓިސްޝިޕް ޕްރޮގްރާމާއި ކޮމިއުނިޓީ އަޕްސްކިލިންގ ޕްރޮގްރާމްތަކުގެ ތެރެއިން 541 ޒުވާނުން ތަމްރީނު ކޮށްފައިވާ ކަމަށެވެ. އޭގެ ތެރޭގައި ހިމެނެނީ 159 އަންހެން ކުދިންނާއި، 382 ފިރިހެން ކުދިންނެވެ. އަދި މިހާރުވެސް 172 ޒުވާނުން ދަނީ، މި ދެ ޕްރޮގްރާމް ފުރިހަމަ ކުރަމުންނެވެ. މި ޕްރޮގުރާމްތަކަކީ ޒުވާނުން ބާރުވެރިކޮށް ޒުވާނުންނަށް މުޖުތަމަޢުގައި ފަހި ފުރުސަތުތައް ހޯދާ ދިނުމަށް ސަރުކާރުން ހިންގަމުންދާ ޕްރޮގުރާމްތަކެކެވެ.

މިނިސްޓްރީއިން މައުލޫމާތު ދޭގޮތުގައި މިދިޔަ 2 އަހަރު 255 ޒުވާނުން ވަނީ އެޕްރެންޓިސްޝިޕް ޕްރޮގުރާމްތައް ފުރިހަމަކޮށްފައެވެ. މީގެ ތެރޭގައި ހިމެނެނީ 30 އަންހެން ކުދިންނާއި 225 ފިރިހެން ކުދިންނެވެ. އަދި މިޕްރޮގްރާމް މިހާރުވެސް 132 ޒުވާނުން ދަނީ ފުރިހަމަ ކުރަމުންކަމަށް މިނިސްޓްރިއިން މައުލޫމާތުދެއެވެ.

މީގެ އިތުރުން މި 2 އަހަރުގެ ތެރޭގައި ޖުމްލަ 286 ކުދިން ވަނީ ކޮމިއުނިޓީ އަޕްސްކިލިންގ ޕްރޮގުރާމްތައް ފުރިހަމަކޮށްފައެވެ. އޭގެތެރޭގައި ހިމެނެނީ 129 އަންހެން ކުދިންނާއި 157 ފިރިހެން ކުދިންނެވެ. އަދި މިހާރުވެސް 93 ޒުވާނުން ދަނީ މި ޕްރޮގްރާމް ފުރިހަމަ ކުރަމުންނެވެ.

މިނިސްޓްރީއިން ކުރިއަށް ގެންދަމުންދާ މި ޕްރޮގުރާމްތަކުގެ މަގުސަދަކީ ރާއްޖޭގައި މަސައްކަތް ކުރާ ބިދޭސީންގެ އަދަދު މަދުކޮށް، އެ މަސައްކަތްތައް އިތުބާރާއެކު ކުރެވޭނެ ފެންވަރަށް ހުނަރުވެރި ދިވެހި ޒުވާނުން މަސައްކަތުގެ ބާޒާރަށް ނެރުމަށާއި، ތެދުވެރިކަމާއި، ނަޒާހަތްތެރިކަމާއެކު މަސައްކަތްކޮށް އަމިއްލައަށް ދިރިއުޅެވޭނެ މީހަކަށް ދިވެހި ކޮންމެ ޒުވާނަކު ވެސް ހެދުމެވެ. އަދި ޒުވާނުން ބާރުވެރިކޮށް އެމީހުންގެ ބައިވެރިވުން އިތުރު ކުރުމެވެ.