ރާއްޖޭގައި ވިހާ އުމުރުފުރާ ދޮށީވެއްޖެ
ލިޔުންތެރިޔާ
އަބްދުﷲ ހުސައިން
ރާއްޖޭގައި ވިހާ އުމުރުފުރާ ނިސްބަތުން މައްޗަށްގޮސްފައިވާކަމަށް ދައުލަތުގެ ކަމާބެހޭ އިދާރާތަކުން އާއްމުކުރި ތަފާސްހިސާބުތަކުން ދައްކައިފިއެވެ.
ސިއްހީ ވުޒާރާ އާއި ސްތެޓިސްޓިކް މޯލްޑިވްސް އިން އާއްމުކުރި ތަފާސް ހިސާބަށް ބަލާއިރު، މީގެ ކުރިއާ ހިލާފަށް ރާއްޖޭގައި މީހުން ވިހާ އުމުރުފުރައަށް މިހާރު ވަނީ ބޮޑެތި ބަދަލުތަކެއް އައިސްފައެވެ. އެގޮތުން މިހާރު އެންމެގިނައިން ވިހާ އުމުރުފުރައެއްގެ ގޮތުގައި ރެކޯޑް ކުރެވިފައިވަނީ، އުމުރުން 30 އަހަރާއި 34 އަހަރާ ދެމެދުގެ މީހުންނެވެ.
މިދިޔަ އަހަރު ރާއްޖޭގައި 5،625 ކުދިން އުފަންވިކަމަށް ދައްކާއިރު، އޭގެ ތެރޭގައި ހިމެނެނީ 2،835 ފިރިހެން ކުދިންނާއި 2،789 އަންހެން ކުދިންނެވެ. ތަފާސްހިސާބަށް ބަލާއިރު އުމުރުން 30 އަހަރާއި 34 އަހަރާ ދެމެދުގެ އުމުރުފުރާއިން ދަރިން ހޯދި މީހުންގެ އަދަދު 1،794 ގައި އުޅޭއިރު ދެން އެންމެ ގިނައިން ދަރިން ހޯދި އުމުރުފުރައަކީ 25 އަހަރާއި 29 އަހަރާ ދެމެދެވެ. އެ އުމުރުފުރާއިން 1،561 މީހުން ދަރިން ހޯދިއިރު އެންމެ ދަށް އުމުރުފުރައަކީ 15 އަހަރާއި 19 އަހަރާ ދެމެދެވެ. އެ އުމުރުފުރައިން ވިހޭ މީހުންގެ އަދަދު އުޅެނީ 65 ގައެވެ.
ދިވެހިރާއްޖޭގެ އާބާދީއަށް ބޮޑު ބަދަލުތަކެއް އަންނަމުންދާއިރު، 2050 ވަނަ އަހަރުގެ ނިޔަލަށް ރާއްޖޭގެ އާބާދީގެ 14 އިންސައްތަ އުމުރުން ދޮށީ މީހުންނަށް ވާނެކަމަށް ސަރުކާރުގެ ކަމާބެހޭ އިދާރާއިން ވަނީ ލަފާކޮށްފައެވެ. ރާއްޖޭގެ އާބާދީގެ ކުރިމަގަށް ބަލާއިރު ސީރިއަސް މައްސަލަތަކެއް ހުރިކަމަށް ކަމާބެހޭ އިދާރާގެ ލަފާކުރުންތަކުން ވަނީ ހާމަވެފައެވެ. މީގެ ތެރެއިން އެންމެ ފާަހގަކޮށްލެވެނީ ކުރިއަށްއޮތް 10 އަހަރު ފަހުންވެސް ރާއްޖޭގައި މަސައްކަތްކުރާ ބިދޭސީންގެ އާބާދީ އިތުރުވަމުންދާ ދިއުމެވެ. މީގެ އިތުރުން ރާއްޖޭގެ އާބާދީގައި ނުކުޅެދުންްްްްތެރިކަން ހުންނަ މީހުންގެ އަދަދު އަހަރުން އަހަރަށް އިތުރުވެ އެކަމަށް ކުރާ ހޭދަ އިތުރުވަމުންދާކަމަށްވެސް ތަފާސްހިސާބުތަކުން ދައްކައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
