އެންމެ ލަސްވެގެން ޑިސެމްބަރު މަހުގެ 25 އަށް 2 މިލިޔަން ފަތުރުވެރިން ހަމަކުރެވޭނެ: ވަޒީރު ފައިޞަލް

އެންމެ ލަސްވެގެން ޑިސެމްބަރު މަހުގެ 25 އަށް 2 މިލިޔަން ފަތުރުވެރިންގެ އަމާޒު ހާސިލްވާނެކަމަށް ފަތުރުވެރިކަމާއި ބެހޭ ވަޒީރު އިބްރާހީމް ފައިޞަލް ވިދާޅުވެއްޖެއެވެ.

ވަޒީރު ފައިޞަލް މިފަދައިން ވިދާޅުވީ، ވޯލްޑްސް ލީޑިންގ ޑެސްޓިނޭޝަން އެވޯޑް ޖެހިޖެހިގެން 5 ވަނަ ފަހަރު ރާއްޖެއަށް ލިބުމާއި ގުޅިގެން އެކަން ފާހަގަކުރުމަށް ބޭއްވި ހަފްލާގައި ނޫސްވެރިންނަށް މައުލޫމާތުދެއްވަމުންނެވެ.

މިގޮތުން ވަޒީރު ވިދާޅުވީ، ފަތުރުވެރިކަމާއި ބެހޭ ވުޒާރާގެ  ތަފާސްހިސާބުތައް ދައްކާގޮތުން އަދި މިހާރު އެރައިވަލްސް ހުރި ވަރަށް ބަލާއިރު، އެންމެ ލަސްވެގެން މިއަހަރުގެ ޑިސެމްބަރު މަހުގެ 25 ގައި 2 މިލިއަން ފަތުރުވެރިން ގެނައުމަށް ސަރުކާރުން ހިފާފައިވާ އަމާޒު ހާސިލްވާނެ ކަމަށެވެ.

ކުރިއަށްއޮތް ދުވަސްތައް ފެށުމުން ޑެއިލީ އެވްރެޖް ވަރަށް ބޮޑަށް އިތުރުވެގެންދާނެކަމަށް ގަބޫލުކުރެއްވޭ ކަމަށާއި، މިއާއިއެކު، އެއަށްވުރެ އަވަސްވުމަކީވެސް އެކަށީގެންވާ ކަމެއްކަމަށް ވަޒީރު ވިދާޅުވިއެވެ.

"ޓޫރިޒަމް މިނިސްޓްރީގެ ތަފާސްހިސާބުތައް ދައްކާގޮތުން އަދި މިހާރު އެރައިވަލްސް ހުރި ވަރަށް ބަލާއިރު އަޅުގަނޑުމެންނަށް ޑިސެމްބަރު މަހުގެ 25 އެންމެ ލަސްވެގެން 2 މިލިޔަން ހަމަކުރެވޭނެކަމަށް. އެކަމަކު އަޅުގަނޑަށް ގަބޫލުކުރެވެނީ ކުރިއަށްއޮތް ދުވަސްތައް ފެށުމުން ޑެއިލީ އެވްރެޖް ވަރަށް ބޮޑަށް އިތުރުވެގެންދާނެކަމަށް. އެހެންވީމަ އެއަށްވުރެ އަވަސްވުމަކީވެސް އެކަށީގެންވާ ކަމެއް."

ވަޒީރު ފައިޞަލް ވިދާޅުވިއެވެ.

ފަތުރުވެރިކަމާއި ބެހޭ ވުޒާރާއިން އާންމުކުރާ ފަތުރުވެރިކަމުގެ ޑެއިލީ އަޕްޑޭޓްތަކުން ދައްކާގޮތުގައި، މިމަހުގެ 24 ވަނަ ދުވަހާއި ހަމައަށް ރާއްޖެއަށް 1,803,823 ފަތުރުވެރިން ވަނީ ޒިޔާރަތްކޮށްފައެވެ. މިއީ މިދިޔަ އަހަރުގެ މި މުއްދަތާއި އަޅާ ބަލާއިރު 9.2 އިންސައްތަ އިތުރު އަދަދެކެވެ.