ކަޅުވަކަރު މިސްކިތް ބަހައްޓަން އެންމެ ރަނގަޅީ ހުޅުމާލޭގައި - ޢާންމުންގެ ހިޔާލް

ކަޅުވަކަރު މިސްކިތް ހުޅުމާލެ ފަދަ ބިން ތަނަވަސް ތަނަކަށް ބަދަލުކުރުމަކީ އެންމެ ރަނގަޅުގޮތްކަމަށް ރޭ ބޭއްވުނު ޢާންމުގެ ހިޔާލު ހޯދުމަށް ބޭއްވި ފޯރަމްގައި ޢަންމުން ޚިޔާލު ހުށަހަޅައިފިއެވެ.

މި ފޯރަމް އިންތިޒާމްކޮށްފައިވަނީ މިސަރުކާރުން އަލަށް އުފެއްދި މިނިސްޓްރީއެއް ކަމުގައިވާ މިނިސްޓްރީ އޮފް އާރޓްސް ކަލްޗަރ އެންޑް ހެރިޓޭޖުންނެވެ.

ކަޅުވަކަރު މިސްކިތް ބަހައްޓާނެ ތަނެއް ކަނޑައެޅުމާއި ގުޅޭ ގޮތުން ޢާންމުންގެ ހިޔާލު ހޯދުމުގެ ފޯރަމް ބާއްވާފައިވަނީ ކުރިން ކަޅުވަކަރު މިސްކިތް ހުރި އަދި އެންމެ ދުވަސް ވީ ޕާކު ކަމުގައިވާ ސަލްޓަންޕާކު، މިހާރުގެ ރަސްރަނި ބަގީޗާގައެވެ.

ކަޅުވަކަރު މިސްކިތް އަލުން ބެހެއްޓުމަށް ހުޅުމާލެ ރަނގަޅުކަމަށް ޢަންމުން ހުށަހަޅާފައިވާ އިރު ރައީސް ޔާމީންގެ ވެރިކަމުގައި ކަޅުވަކަރު މިސްކިތް ރޫޅާލުމަށް ފަހު މިސްކިތް ފުރަތަމަ ބަހައްޓަން ނިންމާފައިވީވެސް ހުޅުމާލެ ދެވަނަ ފިޔަވަހީގައިކަން ފާހަގަކޮށްލަންޖެހެއެވެ. ނަމަވެސް ފަހުން ގދ. ތިނަދޫއަށް ކަޅުވަކަރު މިސްކިތް ބަދަލުކުރުމަށް ވަނީ ނިންމާފައެވެ.

މީގެ އިތުރުން މި ފޯރަމްގައި ބައިވެރިވި ބައެއް ޢާންމުން ވަނީ މިސްކިތް ކުރިންވެސް ހުރިތަން ކަމުގައިގަވާ ސަލްޓަން ޕާކުގައި މިސްކިތް ބެހެއްޓުމަށެވެ.

ޔުމްނާ އިތުރަށް ވިދާޅުވިގޮތުގައި ކަޅުވަކަރު މިސްކިތަކީ ރާއްޖޭގެ ޤައުމީ ތަރިކަ ކަމަށްވާއިރު، ކަޅުވަކަރު މިސްކިތް ބަހައްޓާނީ ގިނަ ދުވަހު ރައްކާތެރި ކޮށް ބެލެހެއްޓޭ އަދި ބޭނުންކުރެވޭ ގޮތަށް ކަމަށެވެ.

ކަޅުވަކަރު މިސްކިތް ބިނާކޮށްފައިވަނީ މީލާދީ ގޮތުން 1789 އަހަރުއެވެ. އެފަހުން ތިން ފަހަރެއްގެ މަތިން އެމިސްކިތް ވަނީ އެހެން ތަނަކަށް ބަދަލުކޮށްފައެވެ. އެންމެ ފަހުން އެމިސްކިތް ބަހައްޓާފައިވަނީ ސަލްޓަން ޕާރކުގައެވެ. ނިމިގެންދިޔަ ރައީސް ޔާމީންގެ ސަރުކާރުން ވަނީ ރަސްރަނި ބަގީޗާ ތަރައްޤީކުރުމަށް، 8 މެއި 2016 ގައި އެމިސްކިތް އެތަނުން ނަގައި ރޫޅާލާފައެވެ.

މި ފޯރަމްގައި މިނިސްޓްރީ އޮފް އާރޓްސް ކަލްޗަރ އެންޑް ހެރިޓޭޖް ގެ އިސް ބޭފުޅުންގެ އިތުރުން މާލެ ސިޓީ ކައުންސިލް މޭޔާ، ތާރީހީ އަދި އަދަބީ ކަންކަންމުގައި އިސްކޮށް ހަރަކާތްތެރިވާ ބޭފުޅުންނާއި ތިމާވެށީގެ ދާއިރާގައި ހަރަކާތްތެރިވާ ބޭފުޅުންވެސް ބައިވެރިވެފައިވެއެވެ.