އިމްރާންގެ ރިޓަޔަމެންޓް މެޗް އަންނަ އާދީއްތަ ދުވަހު ބާއްވަނީ

ދިވެހިރާއްޖޭގެ ގައުމީ ފުޓްބޯޅަ ޓީމުން އެއް ނަންބަރު ގޯލްކީޕަރ އިމްރާން މުހައްމަދު (އިންމަ) ރަސްމީގޮތުން ރިޓަޔަރ ކުރާ މެޗް އަންނަ އާދީއްތަ ދުވަހު ބޭއްވުމަށް ހަމަޖައްސައިފިއެވެ.

ޑިސެމްބަރު މަހުގެ 28 ވަނަ ދުވަހު ބޭއްވުމަށް ހަމަޖެހިފައިވާ މޯލްޑިވްސް ފުޓުބޯޅަ އެވޯޑު ހަފްލާއާ ދިމާކޮށް އެފްއޭއެމްއާއި މޯލްޑިވްސް ސޮކަރ ގުޅިގެން އިންތިޒާމްކުރާ މި މެޗުގެ ޓިކެޓްތައް މާދަމާއިން ފެށިގެން ވިއްކަމުންދާނެއެވެ.

މި މެޗަށް ސިޑިބަރި ސަރަހައްދުން 50 ރުފިޔާއަށް ޓިކެޓެއް ވިއްކާއިރު، ގޮނޑިބަރި ސަރަހައްދުން ޓިކެޓެ ވިއްކާނީ 100 ރުފިޔާއަށްކަމަށް އެފްއޭއެމްއިން މައުލޫމާތުދެއެވެ.

މި މެޗުގެ ޓިކެޓް ވިއްކައިގެން ލިބޭ ފައިސާއިން ބައެއް އިމްރާން ވަނީ ބްލައިންޑް އެންޑް ވިޝުއަލީ އިމްޕެއާޑް ސޮސައިޓީ އޮފް މޯލްޑިވްސް އަށް ހަދިޔާކުރުމަށް ނިންމާފައެވެ. މި މެޗުގައި ކުޅޭނީ އިމްރާންގެ ޓީމަކާއި އެފްއޭއެމްގެ ޓީމެކެވެ. އިމްރާންގެ ޓީމުގައި އަލީ އަޝްފާގު (ދަގަނޑޭ) ކުޅުމަށް ހަމަޖެހިފައިވާއިރު، އެޓީމަށް ކޯޗުކޮށްދިނުމަށް ހަމަޖެހިފައިވަނީ ބަލްގޭރިޔާގެ ޔޮރްދާން ސްޓޮއިކޯފް އިވަނޯފްއެވެ.

މި މެޗުގައި އެފްއޭއެމްގެ ޓީމްގައިވެސް ޚާއްސަ ކުޅުންތެރިން ކުޅޭނެއެވެ. އެގޮތުން ދުނިޔޭގައި އުފެދުނު އެންމެ މޮޅު އެއް ގޯލު ކީޕަރުކަމުގައިވާ މެންޗެސްޓާ ޔުނައިޓެޑުގެ ލެޖެންޑް ޕީޓާ ޝުމައިކަލް އާއި ރެއާލް މެޑްރިޑްގެ ކުރީގެ ތަރި މިޝެލް ސަލްގާޑޯ ފާހަގަކޮށްލެވެއެވެ.