ވިލިމާލޭ ދާއިރާއަށް ވާދަކުރައްވާ މުހައްމަދު ޢިސްމާޢީލްގެ ކެންޑިޓޭޓް ނަންބަރަކަށް 4

ރައްޔިތުންގެ މަޖިލީހުގެ އިންތިޚާބުގައި ވިލިމާލޭ ދާއިރާއަށް ވާދަކުރައްވާ ކެނޑިޑޭޓުންގެ ނަންތައް ތަރުތީބުކޮށްފިއެވެ.

މިއަދު މެންދުރު ފަހު 2:00 އިން ފެށިގެން މަޖިލިސް އިންތިޚާބުގައި ވާދަކުރައްވާ ކެންޑިޓޭޓުންގެ ނަންބަރު ގުރުއަތުނެގުން ދަރުބާރުގޭގައި އަންނަނީ ކުރިއަށް ގެންދަމުންނެވެ.

އެގޮތުން ވިލިމާލޭ ދާއިރާއަށް ވާދަކުރާ 4 ކެންޑިޑޭޓުންގެ ގުރު މިހާރު ނަގާފައިވާއިރު، ވެރިކަންކުރާ ޕީޕީއެމް/ޕީއެންސީގެ ފަރާތުން ވިލިމާލޭ ދާއިރާއަށް ވާދަކުރައްވާ، މުހައްމަދު އިސްމާއިލް އަށް ލިބިވަޑައިގެންފައިވަނީ ކެންޑިޑޭޓް ނަންބަރު 4 އެކެވެ.

ސަރުކާރު ކޯލިޝަން، ޕީޕީއެމް/ޕީއެންސީންގެ ފަރާތުން 20 ވަނަ ރައްޔިތުންގެ މަޖިލިހުގައި ވާދަކުރައްވާނެ ކެންޑިޑޭޓެއް ކަނޑައެޅުމަށް އެކޯލިޝަނުން ކުރިއަށް ގެންދިޔަ ޕްރައިމަރީގައި ވިލިމާލޭ ދާޢިރާގެ ޓިކެޓް މުހައްމަދު އިސްމާއިލް ކަށަވަރު ކުރެއްވީ އެ ދާއިރާއަށް ވޯޓްލީ 459 މީހުންގެ ތެރެއިން 300 މީހުން ވޯޓުންނެވެ.

އެ ދާއީރާއަށް ކުރިމަތިލާން ފޯމު ލުމަށްފަހު، ވޮއިސް އަށް ދެއްވި ބަސްދީގަތުމެއްގައި މުހައްމަދު އިސްމާއިލް ވިދާޅުވީ، ބަސްދީގަތުމެއްގައި މުހައްމަދު އިސްމާއީލް ވިދާޅުވީ، ވިލިމާލޭގެ ރައްޔިތުން ތިބީ މިހާރު އެއޮތް މަރުހަލާއިން އެހެން މަރުހަލާ އަކަށް ގެންދިޔުމަށް ބޭނުންވެފައި ކަމަށެވެ. އަދި ރައްޔިތުންގެ ކަންބޮޑުވުންތައް ހުރުމުން އެ ދާއިރާ އަށް ކުރިމަތި ލުމަށް ރައްޔިތުން އެދުނު ކަމަށެވެ.

ހަމައެހެންމެ ވިލިމާލޭގެ އެކި އުމުރުފުރާ ތަކާއި ގުޅޭ ތިމާވެއްޓާއި ރައްޓެހި މާހައުލެއް ދަމަހައްޓައިދީ، ރައީސް ޑރ.މުއިއްޒުގެ ތަރައްގީއަށް ވިލިމާލޭ ރައްޔިތުންގެ އަޑު ސަރުކާރަށް އިއްވަދޭނެ ކަމަށްވެސް އޭނާ ވިދާޅުވި އެވެ.

"އިރާދަކުރެއްވިއްޔާ، ކުރިއަށް އޮތް މުސްތަގުބަލުގައި ކުރިއަށް މިހިނގާ ރައްޔިތުންގެ މަޖިލީހުގައި ، އަޅުގަނޑަށް ރައްޔިތުންގެ މަސައްކަތުން، اللهގެ ރަޙްމަތްފުޅުން ކާމިޔާބު ލިބިއްޖެ ކަމަށްވާނަމަ، އަޅުގަނޑު ވިލިމާލޭގެ ރައްޔިތުން ބޭނުންވާ ތަފާތު ހެޔޮ ބަދަލެއް އަޅުގަނޑު ގެނެސްދޭނަން." މުހައްމަދު އިސްމާއިލް ވިދާޅުވި އެވެ.

18 ވަނަ ރައްޔިތުން މަޖިލިހުގައި ހޯރަފުށި ދާޢިރާ ތަމްސީލް ކުރެއްވި މުޙައްމަދު އިސްމާޢިލް އެންމެ ބޮޑަށް ފާހަގަކުރެވިގެން ގޮސްފައިވަނީ ޕީޕީއެމް/ޕީއެންސީން ކޯލިޝަނުން ކުރިއަށް ގެންދިޔަ "އިންޑިއާއައުޓް" ކެންޕެއިންގައި މަގުމަތީގެ ހަރަކާތްތަކުގައި އެންމެ އިސްދަޢުރެއް އަދާކުރެއްވި ފަރާތުގެ ގޮތުގައެވެ. އެ ހަރަކާތުގެ ތެރެއިން އޭރުގެ ސަރުކާރުން މުހައްމަދު އިސްމާޢިލް ވަނީ އެތައް ފަހަރަކު ބަންދުކޮށް ޖަލަށްވެސް ލައިފައެވެ.

މީގެ އިތުރުން އެންމެ ފަހުން މުހައްމަދު އިސްމާޢިލް ފާހަގަ ކުރެވިގެން ދިޔައީ ރައީސް އިބުރާޙިމް މުހައްމަދު ޞާލިޙްގެ ސަރުކާރުން އިންޑިޔާ އެންބަސީ އާއި ގުޅިގެން ކުރިއަށް ގެންދިޔަ ޔޯގާ ބޮޑު ހަރަކާތް ހުއްޓުވުމަށް ނިކުތް މީހުންނަށް ހިތްވަރުދީ އެކަމަށް މަގުފަހިކޮށްދިން ކަމުގެ ތުހުމަތުގައި ޖަލުގައި ބަންދުކޮށް، އެ މައްސަލާގައި ޓެރަރިޒަމުގެ ދަޢުވާ އުފުލި ފަރާތެއްގެ ގޮތުގައެވެ.