އުސް އިމާރާތްތަކުގައި ރޯވެއްޖެނަމަ އަލިފާން ނިންވަން ޑްރޯން ބޭނުންކުރަން ފަށަނީ
އުސް އިމާރާތްތަކުގައި ހިނގާ އަލިފާނުގެ ހާދިސާތަކުގައި އަލިފާން ނިންވުމަށް ޑްރޯން ބޭނުންކުރަން ފަށަން ތައްޔާރުވަމުންދާ ކަމަށް ޑިފެންސް މިނިސްޓަރު ހަސަން ރަޝީދު ވިދާޅުވެއްޖެ އެވެ.
މިނިސްޓަރު މިހެން ވިދާޅުވީ "އަހާ" ފޯރަމްގައި ވާހަކަ ދައްކަވަމުންނެވެ. މިނިސްޓަރު ވިދާޅުވީ މާލޭގައި މަގުތަކުގެ ދަތިކަމުގެ ސަބަބުން ފަޔާ ވެހިކަލް ގެނެސް އަލިފާން ނިއްވުމަށް ގިނަ ހުރަސްތަކެއް ކުރިމަަތިވާ ކަމަށެވެ.
އެހެން ކަމުން އުސް އިމާރާތްތަކުގައި ހިނގާ އަލިފާނުގެ ހާދިސާތަކުގައި އަލިފާން ނިންވުމަށް ޑްރޯން ބޭނުންކުރަން ފަށަން ތައްޔާރުވަމުންދާ ކަމަށެވެ. އެކަމަށްޓަކައި އެސެސްމަންޓް ހަދާ ނިމިފައިވާ ކަމުގައިވެސް ވިދާޅުވި އެވެ.
އަދި ވިދާޅުވީ އެކަން އަންނަ އަހަރުގެ ކުރީކޮޅު އަދި މި އަހަރުގެ ފަހުކޮޅު ތަންފީޒު ކުރަން ނިންމާފައިވާ ކަމަށެވެ.
މީގެ އިތުރުން މިނިސްޓަރު ވިދާޅުވީ އުސް އިމާރާތްތަކުގައި ހިނގާ އަލިފާނުގެ ހާދިސާތަކާއި ގުޅިގެން އަލިފާން ނިއްވަން ބޭނުންކުރާ އިތުރު ވެހިކަލްތައް ހޯދުމުގެ މަސައްކަތް ކުރަމުންދާ ކަމަށެވެ. އެގޮތުން ޓްރެކްޓަރުތަކާއި ބައުސަރުތައް ހޯދުމުގެ މަސައްކަތް ކުރަމުންދާ ކަމަށް ވިދާޅުވި އެވެ. އެ ތަކެތި ހޯދުމަށް އެސްޓީއޯއާ ހަވާލުކޮށްފައިވާ ކަމަށް ވިދާޅުވި އެވެ.
ހިޔާ ޓަވަރުފަދަ އުސް އިމާރާތްތަކުގައި ދިިރިއުޅޭ ރައްޔިތުން ހޭލުންތެރި ކުރުވުމަށް މެދުނުކެނޑި ގިނަ މަސައްކަތްތަކެއް ކުރަމުންދާ ކަމަށްވެސް މިނިސްޓަރު ވިދާޅުވި އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
