ފިޔާ ކިލޯއެއްގެ އަގު 18 ރުފިޔާއަށް ތިރިވެއްޖެ

މާލޭ ބާޒާރުގައި ފިޔާ ކިލޯއެއްގެ އަގު ރެކޯޑް މިންވަރަކަށް އުފުލުމަށްފަހު، މިއަދު ބާޒާރުގައި ފިޔާގެ އަގު ދަށަށް ހިނގައްޖެއެވެ.

މޫސުން ގޯސްވެ، ބޯޓުފަހަރުން މުދާ ބޭލުމަށް ހުރަސްތަކެއް ކުރިމަތިވެ، ބާޒާރަށް ނުލިބުމުން މިދިޔަ ދެތިން ދުވަހެއްގެ ތެރޭގައި ފިޔާގެ އަގު ވަނީ މިއިން އަހަރަކު މައްޗަށް ނުދާވަރަށް މައްޗަށްގޮސްފައެވެ. އެގޮތުން ބައެއް ވިޔަފާރިތަކުން ފިޔާ ކިލޯއެއް ވަނީ 75 ރުފިޔާއަށްވެސް ވިއްކާފައެވެ.

ހުޅުމާލެއަށް ބަލައިރު، ފުޅާދާއިރާއެއްގައި ފިޔާ ހޯލްސޭލްކުރާ މުޑުވާލީގައި މިއަދު ސާފްނުކުރާ ބާސްކެޓުން ފިޔާ ކިލޯއެއް 18 ރުފިޔާއަށް ލިބެންހުރިއިރު، ހުޅުމާލޭ ފޭސް ދޭއްގެ ސްޕަމާކެޓްތަކުން ފިޔާ ކިލޯއެއް 25 ރުފިޔާއަށް ލިބެން ހުއްޓެވެ.

ފިޔާގެ އަގު މިއަދު ދަށަށް ގޮސްފައިމިވަނީ އެމްޕީއެލް އިން އިއްޔެ ގިނަ އަދަދަކަށް ފިޔާ ބޯޓުތަކުން ފިޔާ ބާލާފައިވަނިކޮށެވެ. އެމްޕީއެލުން އިއްޔެ އެކަނިވެސް ވަނީ 5 ހާހަށްވުރެ ގިނަ ބަސްތާގެ ފިޔާ ބޯޓުތަކުން ބާލައި ގުދަނަށް ގެންގޮސްފައެވެ.

ބާޒާރުގައި މިއަދު ފިޔާގެ އަގު ދަށަށްދާން ފަށާފައިވާއިރު، ކުރިއަށްމިއޮތް ދުަވސްތަކުގައި ފިޔާގެ އަގު އިތުރަށް ދަށަށްދާނޭކަމަށް ވިޔަފާރިވެރިން ބުނެއެވެ. ބާޒާރުން ފިޔާ ލިބުން ދަތިވެ، އަގު އުފުލުމާ ގުޅިގެން އެސްޓީއޯއިންވެސް ވަނީ ފިޔާ ޝިޕްމަންޓެއް އެތެރެކުރުމުގެ މަސައްކަތް ފަށާފައެވެ.

ފިޔަލަކީ ދިވެހިންގެ ކެއުމުގައި އާއްމުކޮށް ކޮންމެ ދުވަހަކުހެން ބޭނުންކުރާ ބާވަތެކެވެ. މީގެ އިތުރުން ރާއްޖޭގައި އުޅޭ އިންޑިއާ އަދި ބަންގާޅު މަސައްކަތްތެރިންވެސް އެންމެ ގިނައިން ބޭނުންކުރާ އެއް ބާވަތަކީ ފިޔަލެވެ.