ޕޯޑިއަމްއެއް އަތުގައި ޖެހުނީމާ މޮޅު ވާހަކަ ދައްކަވާނެ ރައީސް ޞާލިހު: ޝިޔާމް

ޕޯޑިއަމްއެއް އަތުގައި ޖެހުމުން ޑިމޮކްރަސީ އޭ ކިޔައި މޮޅެތި ވާހަކަ ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ދައްކަވާނެ ކަމަށް ވިދާޅުވެ ރައްޔިތުންގެ މަޖިލީހުގެ ނައިފަރު ދާއިރާގެ މެންބަރު އަދި ޕީޕީއެމްގެ ނައިބުރައީސް އަޙްމަދު ޝިޔާމް ރައީސް ޞާލިހަށް ފާޑުވިދާޅުވެއްޖެއެވެ.

ޗެނަލް-13ގެ ޗީފް އެގްޒެކެޓިވް އޮފިސާ (ސީއީއޯ) މުޙައްމަދު ސަމާޙު ގޭ ބަންދުކުރުމާއި ގުޅިގެން ޝިޔާމް ކުރެއްވި ޓްވީޓެއްގައި ވިދާޅުވީ، ޕޯޑިއަމެއް އަތުޖެހުމުން ރައީސް އިބްރާހީމް މުޙައްމަދު ޞާލިޙު ދައްކަވަނީ މޮޅުވާހަކަ ކަމަށެވެ.

އަދި ފުލުހުން ސަމާހު ހައްޔަރުކުރިއިރު ތަކުރާރުކޮށް އޭނާގެ މީޑިއާ ފާސް ދައްކައި އޭނާއަކީ ޗެނަލް-13ގެ ނޫސްވެރިއެއްކަމަށް ބުނަމުން އައި ކަމަށެވެ.

"ހައްޔަރު އެކަންޏެއްނޫން ޤާނޫނު އަސާސީން ކަށަވަރުކޮށްދޭ ނޫސްވެރިކަން ކުރުމުގެ ޙައްޤުވެސް ހިފެހެއްޓީ. ޑިމޮކްރަސީ ހޭކިލާފަވެސް ނެތް" ޝިޔާމް ވިދާޅުވި އެވެ.

ފުލުހުން ސަމާޙު ހައްޔަރުކުރީ ރައީސް ޔާމީން 11 އަހަރަށް ޖަލަށް ލުމަށް ހުކުމް ކުރުމާއި ގުޅިގެން އެކަމާއި ދެކޮޅަށް އިދިކޮޅު ޕްރޮގްރެސިވް ކޮންގުރެސް ކޯލިޝަނުގެ ފަރާތުން މާލޭގައި ކުރިއަށްގެންދާ ސިލްސިލާ މުޒާހަރާ ކަވަރުކުރަން މަސައްކަތްކުރަނިކޮށެވެ.

ސަމާޙު ހައްޔަރުކޮށް، ބަންދާމެދު ގޮތެއް ނިންމަން ކޯޓަށް ހާޒިރުކުރުމުން ކުރިމިނަލް ކޯޓުން ނިންމާފައިވަނީ 30 ދުވަހުގެ މުއްދަތަކަށް އިރުއޮއްސި 6:00އިން ފެށިގެން ފަތިހު 6:00 އާ ހަމައަށް ގޭ ބަންދުކުރުމަށެވެ. ސަމާހު ހައްޔަރުކޮށް ފުލުހުން އޭނާއަށް ތުހުމަތުކުރީ ފުލުހުންގެ ޒިންމާއަށް ހުރަސްއަޅާކަމަށެވެ.