ރައީސް ޔާމީން އަށް ކުރި ހުކުމް އިސްތިއުނާފް ނުކުރެވިފައިވާ ސަބަބު ހާމަކޮށްފި

ވ. އާރަށުގެ މައްސަލައިގައި ކުރީގެ ރައީސް ޔާމީން ޖަލަށްލާން ހުކުމް ކުރިތާ ދެ ހަފުތާވި އިރު ވެސް އެމަނިކުފާނުގެ ފަރާތުން ހުކުމް އިސްތިއުނާފު ކުރަން ހައި ކޯޓަށް ހުށަނޭޅިފައިވާ ސަބަބު ހާމަކޮށްދީފިއެވެ.

ވ. އާރަށް މައްސަލާގައި އެއް މިލިއަން ޑޮލަރު ރިޝްވަތުގެ ގޮތުގައި ގަބޫލުކުރައްވައި އަދި އެ ފައިސާ ލޯންޑާ ކުރެއްވިކަން ސާބިތުވެ، ޔާމީން 11 އަހަރަށް ޖަލަށްލައި، ފަސް މިލިއަން ޑޮލަރުން ޖޫރިމަނާކުރަން ކްރިމިނަލް ކޯޓުން ހުކުމް ކުރީ މިދިޔަ ޑިސެމްބަރު 25ގަ އެވެ.

ހުކުމް އިސްތިއުނާފް ކުރަން ލިބެނީ 60 ދުވަހެވެ.

އެ ހުކުމް އިސްތިއުނާފު ކުރައްވާނެ ކަމަށާ، އަދި އިސްތިއުނާފް ކޮށްގެން ރައީސް ޔާމީން މިނިވަންވެ ވަޑައިގަންނަވާނެ ކަމުގެ ޔަގީންކަން އޮތް ކަމަށްވެސް އެމަނިކުފާނުގެ ވަކީލުންގެ ޓީމުން ވަނީ ބުނެފަ އެވެ.

އެހެން ނަމަވެސް އަދިވެސް ހުކުމް އިސްތިއުނާފް ނުކުރެވޭއިރު، އިސްތިއުނާފް ނުކުރެވޭ ސަބަބު ހާމަ ކުރައްވައި އެމަނިކުފާނުގެ ވަކީލުންގެ ޓީމުގައި ހިމެނިވަޑައިގަންނަވާ ގާނޫނީ ވަކީލު، ސިޔާޒު ވިދާޅުވީ، ކުރިމިނަލް ކޯޓުން ރައީސްޔާމީންގެ މައްޗަށް އިއްވާފައިވާ ހުކުމްތައް އިސްތިއުނާފު ކުރުމަށްޓަކައި ޝަރީއަތް ނިމުނު ގޮތުގެ ރިޕޯރޓު މަޙްޟަރު ބަޔާން ތަކާއެކު ހޯދުމަށް 2022 ޑިސެމްބަރު 25 ވަނަ ދުވަހު އެދިފައިވީ ނަމަވެސް މިއަދާހަމައަށްވެސް އެ ރިޕޯރޓް ނުލިބޭ ކަމަށެވެ.

އަދި ޙުކުމް  އިއްވި  ދުވަހު  ޚުލާސާރިޕޯރޓު  ދޭންޖެހޭނެކަމަށް  ޤާނޫނުގައި  އޮތް  ނަމަވެސް،  އެ  ރިޕޯރޓު ނުދީ ލަސްކުރާތީ  އިޙްތިޖާޖު  ކުރުމުން  ޖެހިގެން  އައި ދުވަހު ޚުލާސާ ރިޕޯރޓު ކޯޓުން ދޫކުރި ކަމަށާ، އެ ރިޕޯރޓުގައި ހިމެނޭނީ ޝަރީއަތުގެ ޚުލާސާއެއް ކަމަށް އޭނާ ވިދާޅުވި.

މީގެ އިތުރުން، އިސްތިއުނާފްގެ އެއް މަސްދަރަކަށްވާނީ، ދެފަރާތުން ޝަރީއަތުގައި ދެއްކި ވާހަކަ ހިމެނޭ މަޙްޟަރު ބަޔާންތަށް ކަމަށް ވާއިރު، ކޯޓުން ދޫކުރި ރިޕޯރޓުގައި ދެފަރާތުން ދެއްކި ވާހަކަ އަދި ޝަރީއަތުގައި ކަން ހިނގި ގޮތް ފުރިހަމައަށް ލިޔެފައި ނެތް ކަމަށްވެސް ސިޔާޒު ވިދާޅުވި އެވެ.

"ޚުލާސާ ރިޕޯރޓު ދިނުމުގައި ކޯޓުން ޢަމަލުކުރި ގޮތަށް ބަލާއިރު، ޝަރީއަތް ނިމުނުގޮތުގެ ރިޕޯރޓު ދޫކުރުމަށް ވެސް ޤާނޫނުގައި ބަޔާންކޮށްފައިވާ އެންމެ ދިގު މުއްދަތު ކޯޓުން ބޭނުން ކުރާނެ ކަމަށް ބެލެވެއެވެ." ސިޔާޒު ވިދާޅުވި އެވެ.

ޔާމީނަށް ހުކުމް ކުރި ދުވަހާއި ޖެހިގެން އައި ދުވަހު، ކޯޓުން ހުކުމުގެ ހުލާސާ ރިޕޯޓު ނުދީގެން އިސްތިއުނާފު ނުކުރެވި ލަސްވާ ކަމުގެ ކަންބޮޑުވުން ވަކީލުން ފާޅުކުރި އެވެ. އަދި ޕީޕީއެމް ލީޑަޝިޕްގެ ބޭފުޅުން އެ ރިޕޯޓް ލަސްވެގެން ކަމަށް ވިދާޅުވެ، ކްރިމިނަލް ކޯޓަށް ވެސް ވަޑައިގަތެވެ.