އޭޖީގެ އޯޑަރަށް ޕީޕީއެމްގެ ވަކީލުންނަށް ފިޔަވަޅުއަޅަން ކުރާ މަސައްކަތް ކުށްވެރިކުރަން: އިދިކޮޅު

އެޓާނީ ޖެނެރަލް އިބްރާހިމް ރިއްފަތުގެ އެންގުމަށް ޕީޕީއެމްގެ ލީގަލް ޓީމުގައި ހިމެނޭ ވަކީލުންނާއި ދެކޮޅަށް ފިޔަވަޅު އެޅުމަށް ބާ ކައުންސިލުން ކުރަމުންދާ މަސައްކަތް ހަރުކަށި އިބާރާތުން ކުށްވެރިކުރާކަމަށް އިދިކޮޅު ކޯލިޝަނުން ބުނެފިއެވެ.

އިދިކޮޅުން ވަނީ އެކަން ކުށްވެރިކޮށް ބަޔާނެއްވެސް ނެރެފައެވެ.

އިދިކޮޅުގެ އެ ބަޔާނުގައި ބުނެފައިވަނީ ސަރުކާރުގެ ފަރާތުން އެޓަރނީ ޖެނެރަލް އިބްރާހީމް ރިފްއަތުގެ އެންގުމަށް ބާ ކައުންސިލުން ވަކީލުންގެ ޙައްޤުތަކަށް އަރައިގަތުމަށް މަޝްވަރާކޮށްފައިވާ ކަމަށެވެ.

އިދިކޮޅުން ބުނީ ޤާނޫނު އަސާސީގެ، 27 ވަނަ މާއްދާއިން ދިވެހި ރައްޔިތުންނަށް ލިބިދެވޭ ޚިޔާލު ފާޅުކުރުމުގެ މިނިވަންކަމާއި، 32 ވަނަ މާއްދާއިން ލިބިދޭ އެއްވެ އުޅުމުގެ މިނިވަންކަމާއި، 53 ވަނަ މާއްދާއިން ލިބިދޭ ޤާނޫނީ ވަކީލެއްގެ އެހީތެރިކަން ބޭނުންވެއްޖެ ކޮންމެ ހިދެއްގައި ހޯދައި ލިބިގަތުމުގެ ޙައްޤު ކޮންމެ ރައްޔިތަކަށް ލިބިގެންވާ ކަމަށް ޤާނޫނު އަސާސީ ކަށަވަރުކޮށްދޭކަމަށެވެ.

އަދި ހަމަ އެހެންމެ ޤާނޫނު އަސާސީގެ 30 ވަނަ މާއްދާއިން ސިޔާސީ ޕާޓީ އުފައްދައި، ހިންގައި، ޕާޓީތަކުގެ ޙަރަކާތްތަކުގައި ބައިވެރިވުމުގެ ޙައްޤު ކޮންމެ ރައްޔިތަކަށްމެ ލިބިގެންވާ ކަމަށްވެސް ޤާނޫނު އަސާސީ ކަށަވަރުކޮށްދޭ ކަމަށެވެ.

އެހެންކަމުން ޕީޕީއެމް-ޕީއެންސީގެ ލީގަލްޓީމުން ޚިޔާލުފާޅުކުރުމުގެ މިނިވަންކަމުގެ ތެރެއިން ދިވެހި ރާއްޖޭގެ ޤާނޫނު އަސާސީ އާއި ހެދިފަހުރި ޤާނޫނު ތަކާއި ޚިލާފް ނުވާނެ ގޮތުގެ މަތިން ފާޅުކުރަމުންދާ ޚިޔާލުތަކަށް އެފަރާތް ކުށްވެރިކުރަން މިސަރުކާރާއި ގުޅިގެން ބާކައުންސިލުން ކުރަމުންދާ މަސައްކަތަކީ ޢައިރު ދުސްތޫރީ މައްސަލަ ތަކެއްކަމަށްވާތީ އެމަސައްކަތް ކުށްވެރިކޮށް އެމަސައްކަތް މިހާރުން މިމިހާރަށް ހުއްޓަލުމަށް އިދިކޮޅުން ވަނީ ގޮވާލައްވާފަ އެވެ.

އިދިކޮޅުން ބުނީ އެ ފަރާތަށް މައުލޫމާތު ލިބިފައިވާ ގޮތުގައި ވަކީލުންނަށް ބިރުދެއްކުމުގެ ގޮތުން ބާކައުންސިލުން މިހާރު އެ ކޯލިޝަންގައި ހިމެނޭ ދެ ވަކީލެއްގެ މައްސަލަ ބަލަން ތައްޔާރުވަމުންދާ ކަމަށެވެ.

އެގޮތުން ލޯޔަރ އާދަމް އާސިފް އާއި ލޯޔަރ މުހައްމަދު ރާޣީބް އަހުމަދު ގެ މައްސަލަ ބެލުމަށް ވަނީ ތައްޔާރުވެފައިވާކަމަށާއި، އާސިފް ގެ މައްސަލަ ބަލަނީ ސީދާ ކްރިމިނަލް ކޯޓުގެ އެންގެމަށްކަމަށް އިދިކޮޅުން ވަނީ ބުނެފައެވެ. އަދި ރާޣިބް ގެ މައްސަލަ ބަލަނީ އެޓަނީޖެނެރަލްގެ އިސްނެގުމުގެ މަތިން ބާކައުންސިލުންކަންވެސް ފާހަގަކޮށްފައިވެއެވެ.

އެއާއެކު އިދިކޮޅުން ވަނީ ޤާނޫނު އަސާސީން ރައްޔިތުންނަށް ކަށަވަރުކޮށްދީފައިވާ އަސާސީ ޙައްޤުތަކުން ރައްޔިތުން މަޙްރޫމް ކޮށް، ގޮށްމުށުގެ ބާރުން ވެރިކަން ކުރުމަށް ސަރުކާރުން ކުރަމުންދާ މަސައްކަތް ނުރުހުންތެރިކަމާއެކު ކުށްވެރިކުރާކަމަށް ބުނެފައެވެ. އަދި ޤާނޫނު އަސާސީގެ އިމުގެ ތެރޭގައި ވެރިކަން ކުރުމަށް ދިވެހި ސަރުކާރަށް ގޮވާލާފައެވެ.