މަހުމޫދު މަރާލިކަމަށް އިއުތިރާފްވީ ތަރުޖަމާނު ބުނެގެން: ސާލިމް

އދ. ދަނގެތީގެ ވިޔަފާރިވެރިޔާ މަހުމޫދު އަބޫބަކުރު މަރާލި ކަމަށް ބަންގްލަދޭޝްގެ ޝާ އޮލަމް މިއާ (ސާލިމް) އެއްބަސްވީ އޭނާއަށް ބަސް ތަރުޖަމާ ކޮށްދޭ ތަރުޖަމާނު ބުނުމުން ކަމަށް އޭނާ ހައިކޯޓުގައި ބުނެފި އެވެ.

ސާލިމްގެ މައްޗަށް އުފުލާފައި ވަނީ ގަސްދުގައި މީހަކު މެރުމުގެ ދައުވާ އާއި، މައްޔިތާގެ ބޭނުން ނަހަމަ ގޮތުގައި ކުރުމުގެ ދައުވާއެވެ. މި ދައުވާތަކަށް އޭނާ ވަނީ ކުރިން އިއުތިރާފްވެފަ އެވެ. ކުށަށް އިއުތިރާފްވުމުގައި އެއްވެސް މަޖުބޫރު ކަމެއް ނެތް ކަމަށް ކޯޓުގައި އޭނާ ބުނެފައިވެ އެވެ.

އަދި މި މައްސަލާގައި މަހުމޫދުގެ ހުރިހާ ވާރިސުންވެސް ވަނީ މަރުގެ ދިޔަ ބޭނުންވާ ކަމަށާއި، ބޭނުމީ މަރަށް މަރު ހިފަން ކަމަށް އިއްތިފާގުވެފައެވެ.

އެއާއެކު، އެ މައްސަލައިގައި ސާލިމް މަރަން ކްރިމިނަލް ކޯޓުން މިދިޔަ ފެބްރުއަރީ 22، 2022 ގައި ހުކުމްކޮށްފައިވެ އެވެ.

ހައިކޯޓުގައި މިހާރު ފަށައިފައިވާ މައްސަލަ އަކީ ދަށު ކޯޓުން އިއްވި މަރުގެ ހުކުމް ކަށަވަރުކުރަން ކްރިމިނަލް ކޯޓުން ހައިކޯޓަށް ހުށަހަޅާފައިވާ މައްސަލަ އެވެ.

އެގޮތުން، ޝަރީއަތުގެ މިއަދުގެ މަޖިލީހުގައި ސާލިމް ވަނީ ތަރުޖަމާނު ބަދަލުކޮށް، އެ މަގާމަށް ބަންގްލަދޭޝް މީހަކު ހަމަޖައްސައި ދިނުމަށެވެ.

"ސަބަބަބެއް ކަމަށް ބުނީ ތިމަންނާ ތަހުގީގު މަރުހަލާގާ ހަލީލް (ތަރުޖަމާނު) ތިމަންނާ ކާރީގަ ބުންޏޯ އިއުތިރާފް ވާށޯ. އެކަމަކު އަޅުގަނޑު ނުބުނަން އެކަހަލަ އެއްވެސް އެއްޗެކޭ. އެހެންވީމަ އިއުތިރާފް ވެއްޖިއްޔާ ތިމަންނާ ޑީޕޯޓްކޮށްފަ ރަށަށް ފޮނުވަ ދޭނެޔޭ ބުނެގެންނޯ އިއުތިރާފްވީ. ތިމަންނައަކީ އެކަހަލަ ކަމެއް ކުރި މީހެއް ނޫނޯ. އެހެންވެގެންނޯ ތިމަންނާ ހަލީލް ބޭނުން ނެތީ،" ސާލިމް ދެއްކި ވާހަކަތައް ތަރުޖަމާކޮށްދެމުން ތަރުޖަމާނު ހަލީލް ބުންޏެވެ.

މީގެ އިތުރުން ސާލިމް ވަނީ އޭނާ ކުރިއަށްދާން ބޭނުންވަނީ ވަކީލަކާ އެކުގައި ކަމަށާ އަދި ދައުލަތުން ވަކީލަކު ހަމަޖައްސައިދިނުމަށް އެދުނެވެ. އެހެންނަމަވެސް ދަށު ކޯޓު މަރުހަލާގައި އޭނާގެ ފަރާތުން ވަކާލާތު ކުރެއްވި ދައުލަތުގެ ވަކީލް އަލީ ނަޖީބް ބޭނުން ނޫން ކަމަށް ސާލިމް ބުނެފައިވެ އެވެ.

ސާލިމް ގެ މައްސަލާގައި މިހާރުގެ ތަރުޖަމާނު ހަލީލު އަކީ ދަށު ކޯޓުގަ އާއި ތަހުގީގުގައި ވެސް މި މައްސަލައިގައި މަސައްކަތްކުރި މީހާ އެވެ. އަދި ވަކީލު ނަޖީބް އަކީ ގާނޫނީ ވަކީލެއްގެ ގޮތުގައި ތަހުގީގު މަރުހަލާގައި އަދި ދަށު ކޯޓު މަރުހަލާގައި މަސައްކަތް ކުރެއްވި ވަކީލެވެ.

މި މައްސަލަ ދެން ކުރިއަށް ގެންދާނީ ސާލިމްއަށް ވަކީލަކު ހަމަޖެހުމުން ކަމަށް ބުނެ ފަނޑިޔާރުން ވަނީ މަޖިލީސް ވަނީ ނިންމާލައިފަ އެވެ.

މަހުމޫދުގެ މަރުވެފައިވާ ހަށިގަނޑު ފެނުނީ 2021 ވަނަ އަހަރުގެ އޮކްޓޫބަރު މަހުގެ 13 ވަނަ ދުވަހުގެ ހަވީރު 3:16 ހާއިރު، އާއިލާއިން އޭނާ ގެއްލިގެން އެ ދުވަހު ހެނދުނު 10:16 ހާއިރު އެންގުމުން، އެ ރަށު މީހުން ނުކުމެ ރަށުތެރެ ހޯދަމުން ދަނިކޮށެވެ.

އެ މައްސަލާގައި ޝާ އަލޮމް މިއާ ހައްޔަރުކުރީ އޭގެ ދެ ދުވަސް ފަހުންނެވެ. އޭނާއަކީ އެ ރަށުގެ ނެދުންގޭގައި ހުންނަ އުމުރުން ދުވަސްވީ މީހެއް ބަލަހައްޓަން ގެނެސްފައި ހުރި މީހެކެވެ.

ފުލުހުން މަހުމޫދުގެ މަރު ތަހުގީގު ކުރަމުން ދަނިކޮށް، ސާލިމް ދިރިއުޅުނު ގޭގެ ތެރެއިން ޝައްކު ކުރެވޭ ކަންތައްތަކެއް ފެނިގެން އެކަން އެ ރަށު މީހަކު ފުލުހުންނަށް ރިޕޯޓު ކުރި އެވެ. ފުލުހުން ކޯޓު އަމުރެއްގެ ދަށުން ސާލިމް ދިރިއުޅުނު ދަނގެތީ ނެދުންގެ ބަލައި ފާސްކުރި އިރު، އެ ގެއިން މަހުމޫދުގެ ބައެއް ތަކެތި ވެސް ފެނިފައިވެ އެވެ. ފަހުން ސާލިމް އިއުތިރާފުވެ، އޭނާ އެކަން ކުރި ގޮތް އަމިއްލައަށް ފުލުހުންގެ ތަހުގީގަށް ކިޔައި ދިނެވެ.