ބިކިނީގައި އުޅެނިކޮށް މާފުށިން ހައްޔަރުކުރި މީހާގެ ކިބައިން ނަޝީދު މައާފަށް އެދިވަޑައިގެންފި

ކ. މާފުށީގައި ބިކިނީލައިގެން ރަށު ތެރޭގައި އުޅެނިކޮށް، ހައްޔަރުކުރި އިނގިރޭސިވިލާތުގެ ފަތުރުވެރިޔާގެ ކިބައިން، ރައްޔިތުންގެ މަޖިލީހުގެ ރައީސް މުހައްމަދު ނަޝީދު މައާފަށް އެދިވަޑައިގެންފިއެވެ.

މިމަހުގެ ހަވަނަ ދުވަހު މާލެ އަތޮޅު މާފުށީގައި މަސްތުގެ ހާލަތުގައި ހުރެގެން ރަށުތެރޭގައި ނިވާކަން ކުޑަ ގޮތަކަށް އުޅުނު އިނގިރޭސިވިލާތުގެ އަންހެނެއް ކަމަށްވައި އުމުރުން 26 އަހަރުގެ ސިސީލިޔާ ހައްޔަރުކުރީ ނިވާ ނުކުރުމަށް ތަކުރާރުކޮށް ފުލުހުން ނަސޭހަތް ދިނުމުންވެސް އެކަން ނުކުރުމުންނެވެ.

އޭނާ ހައްޔަރުކުރުމުން އެކަން ދުނިޔޭގެ ބައެއް މީޑިއާތަކުގެ ސަމާލުކަމަށްވެސް އައިސްފައިވެއެވެ. ބޭރުގެ ބައެއް މީޑިއާތަކުން ރިޕޯޓުކޮށްފައިވާ ގޮތުގައި ރާއްޖެއަކީ މުސްލިމު ގައުމެއް ކަމަށާއި ނިވާކަން ކުޑަކޮށް އުޅުމަކީ ރާއްޖޭގެ ގާނޫނުތަކާ ހިލާފު ކަމެއް ކަމަށެވެ. އެހެންވެ ރާއްޖެ އަންނަ ފަތުރުވެރިން އެކަން ގަބޫލުކޮށް، ރާއްޖޭގެ ގާނޫނުތަކަށް ބޯލެނބުމަށް ބޭރުގެ މީޑިއާތަކުގައި ބުނެފައިވެއެވެ.

އަދި ސިސީލިޔާ ހައްޔަރުކުރުމުން އެކަމާ މެދު ރާއްޖޭގެ ބައެއް މީހުންގެ މެދުގައިވެސް ހިޔަލުތަފާތުވުންތައް އުފެދިފައިވެއެވެ. އެންމެ ފުރަތަމަވެސް އަންހެންމީހާ ހައްޔަރުކުރުމުން އެކަން ކުށްވެރިކުރެއްވީ މަޖިލީހުގެ ރައީސް މުހައްމަދު ނަޝީދެވެ. ނަޝީދު ވިދާޅުވި ގޮތުގައި އެކަމުގެ ސަބަބުން ރާއްޖޭގެ ފަތުރުވެރިކަން ހަރާބުވެގެންދާނެއެވެ.

މިއަދު ބޭއްވި ރައްޔިތުންގެ މަޖިލީހުގެ ޖަލްސާގައި އިނގިރޭސި ބަހުން ދެއްކެވި ވާހަކަފުޅުގައި ރައީސް ނަޝީދު ވިދާޅުވީ، ސިސީލިޔާ އަށް އަލުން ރާއްޖެ އައިސް، މާފުށީގައި ޗުއްޓީ ހޭދަކުރުމަށް ޓޫރިޒަމް މިނިސްޓަރު ދައުވަތު ދެއްވާނެ ކަމަށް ވަރަށް ބޮޑަށް އުންމީދު ކުރައްވާ ކަމަށެވެ. އަދި ސިސީލިޔާ ހައްޔަރުކުރުމުން އޭނާގެ ކިބައިން ނަޝީދު ވަނީ މައާފަށް އެދިވަޑައިގެންފައެވެ.

އަދި ޕޮލިސް ކޮމިޝަނަރުވެސް ސިސީލިޔާގެ ކިބައިން މާފަށް އެދިވަޑައިގެންފައިވާކަން ވެސް ނަޝީދު ފާހަގަ ކުރެއްވި އެވެ. އަދި ވިދާޅުވީ، އެކަން ހިނގާ ދިޔަގޮތުގެ ތަފްސީލް ހޯމް މިނިސްޓަރުގެ ކިބައިން ވެސް ލިބިވަޑައިގެންފައިވާ ކަމަށެވެ.

ރާއްޖޭގައި މީހުން ދިރިއުޅޭ ރަށްރަށުގައި ނިވާކަންކުޑަ ހެދުން އަޅައިގެން އުޅުމަކީ ގާނޫނާއި ގަވައިދުގެ ތެރެއިން މަނާކަމެކެވެ.

ރާއްޖެ އަންނަ ޓޫރިސްޓުން މީހުން ދިރިއުޅޭ ރަށްރަށުގައި ބިކިނީގައި އުޅޭ މައްސަލައިގައި އާންމުގެ ފަރާތުން ޝަކުވާތައް ހުށަހަޅާކަން ފާހަގަކުރައްވައި، ޓޫރިޒަމް މިނިސްޓަރު އަލީ ވަހީދު މީގެކުރިން ވިދާޅުވެފައިވަނީ، ގެސްޓުން ބިކިނީގައި އާންމުންގެ ތެރޭގައި އުޅޭއިރު އެރަށްރަށުގައި ކުޑަކުދިންވެސް އުޅޭކަމަށާއި، ދިވެހިންގެ ސަގާފަތާއި އިސްލާމީ އާދަކާދައިގެ ތެރެއަށް އެފަދަ ކަންކަން ވަދެގެން ނުވާނެކަމަށެވެ.

އަދި ކަނޑައަޅާފައިވާ ގަވާއިދުތަކާއި ޚިލާފަށް އަމަލު ކުރާ މީހުންނާއި މެދު ފިޔަވަޅު އަޅާނެ ކަމަށްވެސް އަލީ ވަހީދު ވިދާޅުވެފައިވެއެވެ.

ނަމަވެސް މިފަހަރުވެސް ކުށްކުރެވިފައިމިވަނީ، ބިކިނީގައި އުޅުނު އަންހެންމީހާ ހައްޔަރުކުރި ފުލުހުންނެވެ. އިނގިރޭސިވިލާތުގެ މީހާ ހައްޔަރުކުރި މައްސަލަ މިހާރު ދަނީ ފުލުހުން ބަލަމުންނެވެ.