އަޅުގަނޑުގެ ސަރުކާރު ވާނީ ވައްކަމާއި ކޮރަޕްޝަނާއި އެންމެ ދުރު ސަރުކާރަށް: ޤާސިމް

ޖުމްހޫރީ ޕާޓީއަށް ވެރިކަން ލިބިއްޖެނަމަ އެ ޕާޓީން އުފައްދާ ސަރުކާރު ވެގެންދާނީ ވައްކަމާއި ކޮރަޕްޝަނާއި އެންމެ ދުރު ސަރުކާރަށްކަމަށް ޖޭޕީގެ ރިޔާސީ ކެންޑިޑޭޓު އަދި ޕާޓީގެ ލީޑަރު ޤާސިމް އިބްރާހިމް ވިދާޅުވެއްޖެ އެވެ.

ޤާސިމް މިފަދައިން ވިދާޅުވެފައި ވަނީ ޖުމްހޫރީ ޕާޓީގެ ރިޔާސީ ޓިކެޓު، އެމަނިކުފާނަށް ހަވާލުކުރުމަށް ބޭއްވި ޚާއްސަ ހަފްލާގައި ވާހަކަދައްކަވަމުން ނެވެ.

އެގޮތުން ޤާސިމް ވިދާޅުވީ އެމަނިކުފާނުގެ ވެރިކަމެއްގައި ދައުލަތުގެ މުދަލުން ވައްކަންކޮށް ކޮރަޕްޝަން ހިންގަން ޖާގަ ނުދެއްވާނެ ކަމަށެވެ. އަދި ޚުދު އެމަނިކުފާނު ވެސް ދައުލަތުގެ ބައި ރުފިޔާއެއްގައި ވެސް ޖެހިވަޑައިގަންނަވާ ބޭފުޅަކު ކަމުގައި ނުވާނެކަމުގެ ޔަގީންކަން ދެއްވާކަމަށެވެ.

އެމަނިކުފާނުގެ ސަރުކާރު ވެގެންދާނީ މިހާތަނަށް ދިވެހިރާއްޖޭގައި އުފެދުނު ވައްކަމާއި ކޮރަޕްޝަނާއި އެންމެ ދުރު ސަރުކާރަށްކަމަށް ޤާސިމް ވިދާޅުވި އެވެ.

"الله އިރާދަފުޅާއެކު އަޅުގަނޑަށް ރާއްޖޭގެ ވެރިކަން ތިޔަބޭފުޅުން ދެއްވައިފިނަމަ ދިވެހިރާއްޖޭގެ ފަހުގެ ތާރީހެއްގައި ފެންނާނެ ކޮރަޕްޝަނާއި އެންމެ ދުރު ސަރުކާރުކަމުގައި އަޅުގަނޑުގެ ސަރުކާރު ވާނެ ކަމުގެ ޔަގީންކަން އަރުވަން"
ޖޭޕީގެ ލީޑަރު ޤާސިމް އިބްރާހިމް

ޤާސިމް ވިދާޅުވީ ދިވެހިރާއްޖޭގެ މާލިއްޔާއިން ލޯ ލާރިއެއްވެސް ގެއްލިނުދާނެ ގޮތަށް ވެރިކަން ކުރުމުގެ ތަޖުރިބާ އެމަނިކުފާނަށް ލިބިވަޑައިގެން ހުންނެވި ކަމަށެވެ.

"މިނިސްޓާ އޮފް ފިނޭންސް އާއި އެމްއެމްއޭގެ ގަވަރުނަރު ކަމާއި ރާއްޖެއިން ވޯލްޑް ބޭންކަށް ކަނޑައަޅާފައި ހުރި ގަވަރުނަރު ކަމާއި އައިއެމްއެފްއަށް ރާއްޖެއިން ކަނޑައަޅާފައި ހުރި ގަވަރުނަރުކަން ވެސް އަޅުގަނޑު ކުރިން"
ޖޭޕީގެ ލީޑަރު ޤާސިމް އިބްރާހިމް

ޤާސިމް ވިދާޅުވީ އެމަނިކުފާނު ބޭނުންފުޅުވަނީ ރައްޔިތުން އިތުބާރުކޮށް ފުރުސަތެއް ދެއްވުން ކަމަށެވެ.

ރާއްޖޭގައި އޮތް އެންމެ ބޮޑު ދެ ސިޔާސީ ޕާޓީއަށް ރައްޔިތުން ވެރިކަން ކުރުމުގެ ފުރުސަތު ދެއްވާ އަޖުމަ ބައްލަވައިފި ކަމަށާއި، މިހާރު ޓެސްޓު ނުކޮށް އޮތީ ޖުމްހޫރީ ފިކުރުކަމަށް އެމަނިކުފާނު ވިދާޅުވި އެވެ.

އެހެންކަމުން އަންނަ ރިޔާސީ އިންތިޚާބުގައި ޖޭޕީގެ އަޖުމަ ބަލާލުމުގެ ގޮތުން ވެރިކަން ކުރެއްވުމުގެ ފުރުސަތު ދެއްވުމަށް ޤާސިމް ވަނީ އެދިވަޑައިގަންނަވާފަ އެވެ. އަދި ވެރިކަން ލިބިވަޑައިގެންފި ނަމަ، ރައްޔިތުންގެ ކަންބޮޑުވުންތަކަށް ހާސްކަން ފިލުވާލުމަށް މަސައްކަތްޕުޅު ކުރައްވާނެކަމުގެ ޔަގީންކަން ޤާސިމް ވަނީ ދެއްވާފަ އެވެ.

ކޮމެންޓް ކުރޭ