މަޖިލީހުގެ ރިޔާސަތަކީ ވަކި މީހެއްގެ ތަރިކަ އެއް ނޫން: ސައުދު

ރައްޔިތުންގެ މަޖިލީހުގެ ރިޔާސަތަކީ ވަކި މީހެއްގެ ތަރިކައެއް ނޫން ކަމަށް ބުނެ މަޖިލީހުގެ ވިލިނގިލީ ދާއިރާގެ މެންބަރު ސައުދު ހުސައިން ރައްޔިތުންގެ މަޖިލީހުގެ ރައީސް މުހައްމަދު ނަޝީދަށާއި، ނާއިބު ރައީސް އީވާ އަބްދުالله އަށް ބަހުގެ ހަމަލާތަކެއް އަމާޒުކުރައްވައިފިއެވެ.

"އެޑްވާސް ކޯސް އޮން ޕާލިމެންޓަރީ އޯވަސައިޓް އެންޑް ލެޖިސްލޭޓިވް ސްކްރޫޓަނީ"ގެ ބައިވެރިންނާ ބައްދަލު ކުރައްވާ ވާހަކަ ދައްކަވަމުން އީވާ ވަނީ ރައްޔިތުންގެ މަޖިލީހުގެ ރައީސާއި ނާއިބު ރައީސްގެ އިތުބާރު ނެތް މައްސަލަ ހުށައަޅާ މަޖިލީސް ކުރިއަށް ނުގެންދެވޭނެ ހެން ޑެޑްލޮކް, މަރުތަޅު އަޅުވާ މަޖިލީސް ހުއްޓުމަކަށް ގެނެސްފައި އޮތީ ސަރުކާރުން ކަމަށާ އެއީ ރޭވުންތެރިކަމާއެކު ގަސްތުގައި ކުރިމަތި ކޮށްފައި އޮތް ހާލަތެއް ކަމަށް ވިދާޅުވެފަ އެވެ.

"މަޖިލީހުގެ ގަވާއިދުގަ ޖާގައެއް ނުދޭ ޑެޕިއުޓީ ސްޕީކާގެ ސްޕީކާގެ މޯޝަން އޮއްވައެއް ދެން މަަޖިލީސް ކުރިއަށް ދިއުމުގެ. އެއަކު ސްޕީކާ [ރައީސް ނަޝީދު] ކުރައްވާނެ ކަމެއް ނެތް، އަޅުގަނޑު ކުރާނެ ކަމެއް ނެތް، ނިއުޝާ [މަޖިލީހުގެ އަމީން އާންމު] ކުރައްވާނެ ކަމެއް ފިލްޒާ [ކަައުންސެލާ ޖެނެރަލް] ކުރައްވާނެ ކަމެއް،"

"އަޅުގަނޑު ގަބޫލުކުރަނީ ސަރުކާރު ހިންގާ ޕާޓީގެ މެޖޯރިޓީ އޮވެގެން ގަސްތުގައޭ ރިޔާސީ އިންތިހާބަށް ތިން މަސް ދުވަހަށް ވެފައި އޮއްވާ...މާދަމާގެ ފަހަށް ދެން އޮތީ ތިން މަސް.. ގަސްތުގައި ވިސްނައިގެން އެނގި ހުރެގެންނޭ ޕާލިމަންޓް އެ ޑެޑްލޮކަކަށް ގެންދިޔައީ،" އީވާ ވިދާޅުވި އެވެ.

އީވާގެ ވާހަކަތަކަށް ރައްދު ދެއްވަމުން ސައުދު ކުރެއްވި ޓްވީޓެއްގައި ވިދާޅުވީ، މަޖިލީހުގެ ރިޔާސަތު މަޖިލީހުގެ ރައީސް ނުވަތަ ނައިބު ރައީސްއަށް ނުބެލެހެއްޓޭނެ ހާލަތުގައި މަޖިލީހުގެ ރިޔާސަތު ބެލެހެއްޓޭނެ އިންތިޒާމު ހަމަޖައްސަން ޖެހޭ ޤާނޫނީ އިޖުރާއަތުތައް މަޖިލީހުގެ ޤަވާއިދުގަ ވަރަށް ސާފުކޮށް ބަޔާންކޮށްފައިވާ ކަމަށެވެ.

"މަޖިލީހުގެ ރިޔާސަތަކީ ވަކި މީހެއްގެ ތަރިކައެއްނޫން." ސައުދު ވިދާޅުވި އެވެ.

މަޖިލީހުގެ ރައީސް މުހައްމަދު ނަޝީދާއި، ނައިބު ރައީސް އަދި ގަލޮޅު އުތުރު މެންބަރު އީވާ މަގާމުން ވަކިކުރުމުގެ މައްސަލަ އޮތީ މަޖިލީހަށް ވައްދާފަ އެވެ. މަޖިލީހުގެ ރައީސާއި ނާއިބު ރައީސް އެކުއެކީ މަގާމުން ވަކިކުރުމަކީވެސް އުނދަގޫ ކަމެކެވެ. އެހެނީ، މަޖިލީހުގެ ގަވާއިދު ބުނާ ގޮތުން އެ މަޖިލީހުގެ ރައީސްގެ އިތުބާރު ނެތް ކަމަށް ހުށައެޅިއްޖެނަމަ އެ މައްސަލަ ކުރިއަށް ގެންދަވާނީ މަޖިލީހުގެ ނައިބު ރައީސް ރިޔާސަތުގައި އިންނަވައިގެންނެވެ. ނައިބު ރައީސްގެ އިތުބާރުގެ މައްސަލަ ނަމަ މަޖިލީހުގެ ރައީސް ރިޔާސަތުގައި އިންނަވައިގެންނެވެ.

މިހާލަތުގައި މަޖިލީހުގައި މަރުތަޅު އެޅުވިފައި އޮތް ކަމަށް ސަރުކާރާއި ދެކޮޅު ބައެއް ފަރާތްތަކުން ވިދާޅުވާއިރު، އެ ހާލަތުގައި ކަން ކުރަންވީގޮތް، މަޖިލީހުގެ ގަވާދުގައިވާ ކަމަށް އެމްޑީޕީން އަންނަނީ ބުނަމުންނެވެ.