ހެޔޮ ވެރިކަމެއް ކުރަން އެނގުމަކީ މުޅިން ވަކި ކަމެއް: ޢިމްރާން

ކާމިޔާބު ވެރިކަމެއް ކުރަން ފުރިހަމަވާންޖެހޭ ކަންކަން ސަރުކާރުގެ ހޯމް މިނިސްޓަރު އަދި ޢަދާލަތު ޕާޓީގެ ރައީސް އިމްރާން އަބްދުالله ކިޔައިދެއްވައިފިއެވެ.

ޢިމްރާން މިއަދު ކުރެއްވި ޓްވީޓެއްގައި ވިދާޅުވީ، ރިޔާސީ ކެންޑިޑޭޓެއްގެ ޝަރުތުތައް ހަމަވުމަކީ ވަކި ކަމެއް ކަމަށެވެ. އަދި ރިޔާސީ އިންތިޚާބަށް ކުރިމަތިލައި، ކެންޕެއިން ކުރުމަކީވެސް ވަކިކަމެއް ކަމަށެވެ. ހަމައެހެންމެ، އިންތިޚާބުގައި ވާދަކޮށް، ރައްޔިތުންގެ ވޯޓުން އެމީހަކު ވެރިކަމަށް ހޮވުމަކީވެސް ވަކި ކަމެއް ކަމުގައި އިމްރާން ވިދާޅުވި އެވެ.

މީގެ އިތުރުން ޢިމްރާން ވިދާޅުވީ، ރައްޔިތުން އެމީހަކު ވެރިކަމަށް އިންތިޚާބު ކުރުމުން، ހެޔޮ ވެރިކަމެއް ކުރުމަކީވެސް ވަކި ކަމެއް ކަމުގައިވާއިރު، ކާމިޔާބު ވެރިކަމެއް ކުރެވޭނީ އޭނާ އެ ދެންނެވި ހުރިހާ ކަމެއްވެސް ފުރިހަމަ ކުރެވިގެން ކަމަށެވެ.

ކާމިޔާބު ވެރިކަމުގެ ސިފަތައް ކަމަށް ވިދާޅުވެ ޢިމްރާން ޓުވީޓް ކުރައްވާފައި ވާއިރު, އިމްރާންގެ ޢަދާލުޕާޓީން ކުރިއަށް އޮތް ދައުރުގައި ވެރިކަމަށް ގެންނަން ބައިޢަތު ހިފާފައިވަނީ އެމްޑީޕީގެެ ކެންޑިޑޭޓް އަދި އަދުގެ ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުއެވެ.

އެގޮތުން އެ ޕާޓީން އެ ނިންމުން ނިންމާފައިވަނީ ރިޔާސީ އިންތިޚާބުގައި ވާދަކުރުމަށް ހުށަހަޅާ މެނިފެސްޓޯ އެކުލަވާލުމުގައި އިސްލާމީ އުސޫލުތަކާއި ހަމަތަކުގެ އިތުރުން ދެފުށްފެންނަ ފުރިހަމަ ލާމަރުކަޒީ އުސޫލުތަކަށާއި އާއިލާތަކުގެ ދުޅަހެޔޮކަމާއި އިޖުތިމާއީ ޢަދާލަތު ޤާއިމުކުރުމަށް އިސްކަން ދިނުމަށާއި، މެނިފެސްޓޯ އެކުލަވާލުމުގައި ޢަދާލަތު ޕާޓީގެ ބައިވެރިވުން ފުރިހަމަޔަށް ހޯދުމަށް ރައީސް ޞާލިހު އާއި އެކު އެއްބަސްވެފައިވާތީ ކަމަށްވެސް ބުނެފައިވެއެވެ.