ރައީސް ޞާލިހާއެކު ބައެއް މެމްބަރުންނާއި، ވަޒީރުންނާއި، އެމްޑީން ވެސް މަގުމަތިވާނެ: އީވާ

ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހުގެ ވެރިކަން ނިމޭއިރު ސަރުކާރަށް ވާގިވެރިވާ ރައްޔިތުންގެ މަޖިލީހުގެ މެމްބަރުންނާއި، މިހާރު ކެބިނެޓުގައި ތިއްބެވި ވަޒީރުންގެ އިތުރުން ސަރުކާރު ކުންފުނިތަކުގެ މެނޭޖިން ޑިރެކްޓަރުކަން ކުރައްވަމުން ގެންދަވާ ފަރާތްތައް މަގުމަތިވާނެ ކަމަށް ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ މެމްބަރު އީވާ އަބްދުالله ވިދާޅުވެއްޖެ އެވެ.

އީވާ މިފަދައިން ވިދާޅުވެފައި ވަނީ "ހައުސް އޮފް ދަ ޑިމޮކްރެޓްސް" ޖަގަހަ ހުޅުވުމަށް ބޭއްވި ރަސްމިއްޔާތެއްގައި ވާހަކަދައްކަވަމުން ނެވެ.

އީވާ ވިދާޅުވީ ކުރިއަށް މި އޮތް ރިޔާސީ އިންތިޚާބުގައި ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ބަލިވާނެކަމީ ޔަގީންކުރެވޭ ކަމެއް ކަމަށެވެ.

އެމަނިކުފާނު ވެރިކަން ކުރައްވަމުން ގެންދަވާ ގޮތުން ރައްޔިތުންގެ މެދުގައި އެމަނިކުފާނަށް އޮތް ތާއީދު ބޮޑު ތަނުން ދަށަށް ގޮސްފައިވާ ކަމަށާއި، އަމިއްލަފުޅު ޕާޓީގެ ގިނަ މެމްބަރުންގެ ވޯޓުތައްވެސް އެމަނިކުފާނަށް ގެއްލިގެންދާނެކަމަށް އީވާ ވިދާޅުވި އެވެ.

އެކަން ފާހަގަކުރައްވާ އީވާ ވިދާޅުވީ، މި ވެރިކަން ނިމިގެންދާއިރު، ރައީސް ޞާލިހާއެކު އެމަނިކުފާނުގެ އަރިހުގައި މިއަދު ތިއްބެވި ބައެއް މަޖިލީސް މެމްބަރުންނާއި، ވަޒީރުންގެ އިތުރުން ސަރުކާރު ކުންފުނިތަކުގެ އިސް މަގާމުތަކުގައި ތިއްބެވި ފަރާތްތައް ވެސް މަގުމަތިވެގެންދާނެ ކަމަށެވެ.

ރައީސް ޞާލިހުގެ އަރިހުގައި މިއަދު ތިއްބެވި ފަރާތްތަކަކީ ރައްޔިތުންގެ އިތުބާރު ގެއްލިފައިވާ، އަދި ކޮރަޕްޓު ބައެއްގެ ގޮތުގައި އީވާ ވަނީ ސިފަކުރައްވާފަ އެވެ.

"ވެރިކަން ނިމޭއިރު ދެން މަގުމަތިވާނީ ކޮންޓްރެކްޓަށް ނަފްސު ވިއްކާލި ރައްޔިތުންގެ މަޖިލީހުގެ މެމްބަރުން، ވެރިކަން ނިމޭއިރު މަގުމަތިވާނީ ރޯލެކްސް ގަޑިއަކަށް ކުންފުނީގެ ތިޖޫރި ޖަހާލި އެމްޑީން، ވެރިކަން ނިމޭއިރު ދެން މަގުމަތިވާނީ ފެނަކައިގެ ވައްކަމާއި އާރުޑީސީގެ ވައްކަމާއި ވެންޓިލޭޓަރު ވައްކަމާއި މަތިޖަހާދިން ނުވަތަ މަގުފަހިކޮށްދިން ވަޒީރުން"

މެމްބަރު އީވާ އަބްދުالله

އީވާ ވިދާޅުވީ ކުރިއަށް އޮތް ރިޔާސީ އިންތިޚާބަށް ފަހު ދެން ޔަގީނުން ވެސް އުފެދިގެންދާނީ ދަ ޑިމޮކްރެޓްސް ހިއްސާވާ، އަދި އެ ޕާޓީން ފުރިހަމަޔަށް ބަސްކިޔާ ވެރިކަމެއް ކަމަށެވެ.

މި ވެރިކަމަށް ފަހު ޔަގީނުންވެސް ދަ ޑިމޮކްރެޓްސްގެ މެމްބަރުން މަގުމައްޗެއް ނުވާނެ ކަމަށާއި، އެކަން ޔަގީންކުރައްވާކަމަށް އީވާ ވިދާޅުވި އެވެ.