އިމްތިޔާޒް ރައީސް ޞާލިހަށް: މަނިކުފާނު 5 އަހަރު ނިމެނީޔޭ! ކީއްހޭ ތި ކުރީ؟
ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ވެރިކަމަށް ވަޑައިގަތުމަށް ވީ ބޮޑެތި ވައުދުތައް ދައުރު ނިމެންދާއިރު ވެސް ފުއްދަވާދެއްވާފައި ނުވާނީ ރައްޔިތުންގެ މަޖިލީހުގެ މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީ ގިނަ ސުވާލުތަކެއް އަމާޒުކުރައްވައިފި އެވެ.
ހައުސް އޮފް ދަ ޑިމޮކްރެޓްސް ޖަގަހަ ހުޅުވުމަށް ބޭއްވި ރަސްމިއްޔާތުގައި ވާހަކަދައްކަވަމުން އިންތި ވަނީ ވެރިކަމަށް ވަޑައިގަތުމަށް ރައީސް ޞާލިހު ރައްޔިތުންނަށް ވީ ވައުދުތައް މަތިން ހަނދުމަފުޅު ނައްތަލާލެއްވުމަށްފަހު އަނެއްކާވެސް ދެވަނަ ދައުރެއްގެ ވާހަކަ ދައްކަވަމުންދާތީ ބޮޑެތި ފާޑުކިޔުންތަކެއް ވެސް އަމާޒުކުރައްވާފަ އެވެ.
އެގޮތުން އިންތި ވިދާޅުވީ ރައީސް ޞާލިހު ވެރިކަމަށް ވަޑައިގަތީ ކުރީ ސަރުކާރުގައި އެމްއެމްޕީއާރުސީ މެދުވެރިކޮށް ރަށްތަކާއި ފަޅުތައް ކުއްޔަށް ދޫކުރުމުގެ ނަމުގައި ހިންގާފައިވާ ކޮރަޕްޝަނުގެ މައްސަލަ ބަލާ އެކަމުގައި ޝާމިލުވާ ފަރާތްތަކަށް ފިޔަވަޅު އަޅުއްވާނެކަމަށް ވައުދުވެގެން ކަމަށެވެ.
ރައީސް ޞާލިހު ވިދާޅުވެފައިވަނީ ވެރިކަމަށް ހުވާކުރައްވާތާ ދެ އަހަރު ދުވަހުގެ ތެރޭގައި އެމްއެމްޕީއާރުސީގެ ޚިޔާނާތުގެ މައްސަލަ ބަލައި އެކަމުގައި ޝާމިލުވާ ހުރިހާ ފަރާތްތަކަށް ފިޔަވަޅު އަޅުއްވާ އެ ޚިޔާނާތުގެ ތެރެއިން ދައުލަތުން ގެއްލިގެން ދިޔަ ފައިސާ އަނބުރާ ހޯއްދަވާދެއްވާނެ ކަމަށެވެ.
އެކަމަށް އިޝާރާތް ކުރައްވާ އިންތި ވަނީ ފަސް އަހަރުގެ ދައުރެއް ނިމެންދާއިރު އެ ވައުދު ފުއްދާނުދެވުނީ ކޮން ސަބަކާއި ހުރެތޯ ސުވާލު ކުރައްވާފަ އެވެ.
"ތަބަކަށް ލާފައި ވެރިކަން ދެއްވީމާ 5 އަހަރު ދައުރު ނިމުނު އިރު ކީއްހޭ ކުރީ؟ ބޮޑު ވައުދު ކަމުގައިވާ ބަލަން އުޅުނު ޚިޔާނާތުގެ މައްސަލައަށް ކިހެނެއް ހޭ ހެދީ؟ 5 އަހަރު މިޔޮއް ދަނީ.. 5 އަހަރު ނިމިގެންދަނީ ބައި ސެންޓެއް ވެސް އަނބުރާ ތިޖޫރިއަށް ވެއްދުނުހޭ؟ ކީއްހޭ ތި ކުރީ؟"
މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީ
ވައްކަމާއި ކޮރަޕްޝަނަށް ދެއްވާނީ ޒީރޯ ޓޮލަރެންސްކަމަށް ރައީސް ޞާލިހު ވިދާޅުވެފައިވާއިރު، 5 އަހަރުގެ ދައުރެއްގައި ކޮރަޕްޝަންގެ މައްސަލަތައް ނުބެލުނީ ކޮން ސަބަބަކާއި ހުރެތޯ ވެސް އިންތި ވަނީ ސުވާލު ކުރައްވާފަ އެވެ.
އެގޮތުން ކުރީ ސަރުކާރުން އަޅާފައިވާ ދަރުމަވަންތަ ހޮސްޕިޓަލަކީ ބޮޑު ކޮރަޕްޝަނެއް އެކުލެވޭ މަޝްރޫއެއްކަމަށް ސިފަކުރައްވާ އެ މައްސަލަ ބަލާނެކަމަށް ރައީސް ޞާލިހު ވައުދުވި ކަމަށާއި، ވެރިކަމަށް އައިސް އެ މައްސަލަ ނުބެލުނުތާގައި، އެފަދަ އިމާރާތެއް އަޅާދެވިފައި ނުވާކަމަށް އިންތި ވިދާޅުވި އެވެ.
"އަޅުގަނޑު ހަނދާން އެބަހުރި.. ގާތްގަނޑަކަށް ހުރިހާ ދަތުރުތަކެއްގައި ރިޔާސީ އިންތިޚާބުގައި ބައިވެރިވެވުނު.. އޭރުގެ ރިޔާސީ ކެންޑިޑޭޓު (ރައީސް ޞާލިހު) ވިދާޅުވަމުން ދިޔައީ ތިމަންމަނިކުފާނު ނިސްބަތްވާ ކޮމެޓީއަކުންނޭ ދަރުމަވަންތަ ހޮސްޕިޓަލުގެ މައުލޫމާތު ލިބިވަޑައިގެންފަ އޭ ވަނީ. ދެގުނަ ބޮޑު ކޮރަޕްޝަނެއް ހިންގައިގެނޭ ދަރުމަވަންތަ ހޮސްޕިޓަލު ހަދާފައި އެވަނީ. ވެރިކަމަށް ވަޑައިގެން 5 އަހަރު ނިމެނީ އޭ ކޮރަޕްޝަނަށް ކިހެނެއްހޭ ހެދީ؟ ކޮރަޕްޝަންގެ މައްސަލައެއް ބެލުނީކީ ނޫން، ނުބެލުނުތާގައި އެފަދަ ހޮސްޕިޓަލެއް ވެސް ހެދުނީކީ ނޫން. ކީއްހޭ ބަލަ ތިކުރީ؟"
މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީ
އޭގެ އިތުރުން މި ސަރުކާރަކީ ގޮތް ނޭނގޭ މަރުތަކަށް އިންސާފު ހޯދައިދިނުމުގެ ވައުދުވެގެން ގެނައި ސަރުކާރަކަށް ވާއިރު، ގޮތް ނޭނގޭ މަރުތަކަށް އިންސާފު ހޯދައިދިނުމުގެ ވައުދު އޮތީ ކިހާ ހިސާބެއްގައިކަން ރައްޔިތުންނަށް ސާފުކޮށްދޭން ޖެހޭ ކަމަށާއި، އެ ވައުދުތައް ފުއދާ ނުދެވުނީ ކޮން ސަބަބަކާއި ހުރެތޯ އިންތި ވަނީ ސުވާލު ކުރައްވާފަ އެވެ.
"ގެއްލުވާލާފައިވާ މީހުނާއި މަރާލާފައިވާ މީހުންގެ އާއިލާތަކަށް ހޯދައިދިން ތަސައްލީއެއް ކޮބައިހޭ؟ ކީއްހޭ ތި ކުރީ؟ 5 އަހަރު ނިމިދަނީ ބަލަންތިއްބާ 5 އަހަރު ނިމިދަނީ"
މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީ
އެކަންކަން ފާހަގަކުރައްވާ އިންތި ވިދާޅުވީ ފެންނަ ފެނުމަށް އެމަނިކުފާނު ވެރިކަމުގެ 5 އަހަރުގައި ކުރެއްވި މައިގަނޑު ކަމަކީ ފޮޓޯފުޅު ނެންގެވުންކަމަށެވެ.
މި ވެރިކަން ރައްޔިތުން ބަދަލުކުރުމަށްފަހު އެމަނިކުފާނަށް ރައްޔިތުން ދެއްވާނީ ފޮޓޯގަނޑެއްގެ ބުރަދަން ކަމަށާއި، އެ ނޫން ގޮތަކަށް ކުރިއަށް އޮތް ތަނުގައި އެމަނިކުފާނުގެ ބޭނުމެއް މި ގައުމަކުން ނުހިފާނެކަމަށް އިންތިގެ ވާހަކައިގައި ވަނީ ވިދާޅުވެފަ އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
