މަޖިލީހަށް ސިފައިން ވައްދާނީ މަޖިލީހުގެ ރައީސް، އެއީ ރައީސުލްޖުމްހޫރިއްޔާ އާއި ބެހޭކަމެއް ނޫން: ރައީސް ނަޝީދު

ރައްޔިތުންގެ މަޖިލީހަށް ސިފައިން ވެއްދުމަކީ ރައްޔިތުންގެ މަޖިލީހުގެ ރައީސްގެ އިޚްތިޔާރުގައި އޮންނަ ކަމެއް ކަމަށާއި، އެއީ ރައީސުލްޖުމްހޫރިއްޔާ އެއްވެސް ހާލަތެއްގައި ބެހެން ޖެހިލައްވާނެ ކަމެއް ނޫން ކަމަށް މަޖިލީހުގެ ރައީސް މުޙައްމަދު ނަޝީދު ވިދާޅުވެއްޖެ އެވެ.

ނަޝީދު މިފަދައިން ވިދާޅުވެފައި ވަނީ، އެމަނިކުފާނު މަޖިލީސް ހިންގަވަމުންދާ ގޮތާއި ގުޅޭގޮތުން ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ފާޑުވިދާޅުވެފައިވާ ދަނޑިވަޅެއްގައި ކުރެއްވި ޓްވީޓެއްގަ އެވެ.

ރައީސް ޞާލިހުގެ ރިޔާސީ ކެމްޕޭނު ރަސްމީކޮށް ފެއްޓެވުމަށް ބޭއްވި ޖަލްސާގައި ވާހަކަދައްކަވަމުން ރައީސް ޞާލިހު ވިދާޅުވީ ކުރީ ސަރުކާރުގައި މަޖިލީހަށް ސިފައިން ވައްދާ މެމްބަރުން ބޭރުކޮށްފައި ވީ ނަމަވެސް މިއަދު އެފަދަ އެއްވެސް ކަމެއް ހިނގަމުން ނުދާކަމަށް ވިދާޅުވެފަ އެވެ. އަދި މަޖިލީސް ބޭނުންފުޅުވާ ގޮތަކަށް ހިންގެވުމުގެ ބާރު މަޖިލީހުގެ ރައީސްގެ އަތްޕުޅުގައި އޮންނާނެކަމަށް ރައީސް ޞާލިހު ވިދާޅުވި އެވެ.

އެކަމަށް އިޝާރާތް ކުރައްވާ ނަޝީދު ކުރެއްވި ޓްވީޓުގައި ވިދާޅުވީ ރައްޔިތުންގެ މަޖިލީހާއި ގުޅުންހުރި ކަންކަމަށް ސިފައިންގެ އެހީތެރިކަމަށް އެދުމަކީ ޤާނޫނީ ގޮތުން ރައީސުލްޖުމްހޫރިއްޔާ އާއި ބެހުމެއް އޮތް ކަމެއް ނޫން ކަމަށެވެ. އަދި އެ އިޚްތިޔާރަކީ ރައްޔިތުންގެ މަޖިލީހުގެ ރައީސްއަށް ލިބިގެންވާ އިޚްތިޔާރެއް ކަމަށެވެ.

"މަޖިލީސްގެ ކަންކަމަށް ސިފައިންގެ އެހީތެރިކަމަށް އެދުމަކީ ޤާނޫނީ ގޮތުން ރައީސުލްޖުމްހޫރިއްޔާ އާއި ބެހުމެއް އޮތް ކަމެއް ނޫން. މަޖިލީހަށް ސިފައިން ވެއްދުމާއި ނުވެއްދުމަކީ މަޖިލިސްގެ ރައީސް ގެ އިޚްތިޔާރުގައި އޮންނަ ކަމެއް"

ރައީސް މުޙައްމަދު ނަޝީދު

ރައީސް ނަޝީދުގެ މި ވާހަކަފުޅުން ކެމްޕޭނު ޖަލްސާގައި މަޖިލީހާއި ގުޅޭގޮތުން ދެވެރިކަން އަޅާކިޔުއްވާ ރައީސް ޞާލިހު ދެއްކެވި ވާހަކަފުޅުތަކަށް އެމަނިކުފާނު އެއްބަސްވެވަޑައި ނުގަންނަވާކަން އެނގެއެވެ.

އެމްޑީޕީގެ ޕާލަމެންޓްރީ ގުރޫޕުން ވަނީ ނަޝީދު މަޖިލީހުގެ ރައީސްގެ މަޤާމުން ދުރުކުރުމަށް އެމަނިކުފާނުގެ އިތުބާރު ނެތްކަމުގެ މައްސަލަ 54 މެމްބަރުންގެ ސޮޔާއެކު މަޖިލީހަށް ހުށައަޅާފަ އެވެ. އެއާއެކު މަޖިލީހުގެ ނައިބުރައީސްގެ މަޤާމުން އެމްޑީޕީން ވަކިވެވަޑައިގެތް ގަލޮޅު އުތުރު ދާއިރާގެ މެމްބަރު އީވާ އަބްދުالله ވަކިކުރުމަށް ވެސް ވަނީ ހުށައަޅާފަ އެވެ.

އެމްޑީޕީއަކީ މަޖިލީހުގެ މެޖޯރިޓީ ޕާޓީއަށް ވެފައި ގިނަ މެމްބަރުންގެ ސޮޔާއެކު ނަޝީދު އަދި އީވާގެ އިތުބާރު ނެތްކަމުގެ މައްސަލަ ހުށައަޅާފައިވާއިރު، މިއަދު މަޖިލީސް ކޮންޓްރޯލު ކުރައްވަނީ ރައީސް ޞާލިހުކަމަށް އިދިކޮޅުން މެމްބަރުން ދަނީ ބުނަމުންނެވެ.

އެމްޑީޕީގެ ޕްރައިމަރީގައި ރައީސް ޞާލިހުވެސް ވަނީ އެ މޭރުމުން ވިދާޅުވެފަ އެވެ. އެގޮތުން މަޖިލީހުގެ މެޖޯރިޓީ މެމްބަރުން ތިއްބެވީ އެމަނިކުފާނާއި އެކުގައިކަމަށް ރައީސް ޞާލިހު ވަނީ ވިދާޅުވެފަ އެވެ.