ދައުރުން ބޭރުން ޖަލްސާ ބާއްވައި، އެމްޑީޕީން ބޭނުންވި ގޮތަށް، ކޮމެޓީތައް އެކުލަވާލަން ފާސްކޮށްފި

އެމްޑީޕީގެ އެދުމުގެ މަތިން، ރައްޔިތުންގެ މަޖިލީހުގެ ދައުރުން ބޭރުގައި ޖަލްސާ ބާއްވައި، އެ ޕާޓީން ބޭނުންވި ގޮތަށް، މަޖިލީހުގެ ކޮމިޓީތައް އެކުލަވާލައިފިއެވެ.

މިއަދު މަޖިލިސް ޖަލްސާގައި އިދިކޮޅު ޕީޕީއެމް އާއި ޑިމޮކްރެޓްސްގެ މެންބަރުންވަނީ، މަޖިލީހުގެ ބައެއް ކޮމިޓީ ތަކުގައި އިދިކޮޅު ޕާޓީތަކުގެ މެޖޯރިޓީ ބޭއްވުމަށް އިސްލާހު ހުށަހަޅާފައެވެ.

އެގޮތުން، މަޑުއްވަރީ ދާއިރާގެ މެންބަރު އާދަމް ޝަރީފް އުމަރު ވަނީ ސަރުކާރުގެ މަސްއޫލިއްޔަތު ބަލާ ކޮމެޓީގައި އިދިކޮޅު މެންބަރުންނާއި އަމިއްލަ މެންބަރުންގެ އަޣުލަބިއްޔަތު ބޭއްވުމަށް އިސްލާހެއް ހުށަހަޅުއްވައިފައެވެ. އަދި އެ ކޮމިޓީގައި ސަރުކާރު ހިންގާ ޕާޓީއަށް އެއްވެސް ނުފޫޒެއް ނުފޯރުވޭ ގޮތަށް ބޭއްްވުމަށްވެސް ވަނީ އިސްލާހު ހުށަހަޅުއްވާ ފައެވެ. އެ އިސްލާހު ހުށަހަޅުއްވަމުން އޭނާ ވަނީ އެ ކޮމިޓީއަކީ ސަރުކާރު ޒިންމާދާރު ކުރުވުމަށް މުހިންމު ދައުރެއް އަދާ ކުރާ ކޮމިޓީއެއް ކަން ފާހަގަކުރައްވާފައެވެ. އަދި އެކަން ކުރެވޭނީ އިދިކޮޅަށް އެ ކޮމިޓީގެ އަގުލަބިއްޔަތު ލިބިގެން ކަންވެސް އޭނާ ފާހަގަކުރެއްވިއެވެ.

ސަރުކާރުގެ މަސްއޫލިއްޔަތު ބަލާ ކޮމިޓީގައި އިދިކޮޅުގެ އަގުލަބިއްޔަތު ބޭއްްވުމަށް މެދު ހެންވޭރު ދާއިރާގެ މެންބަރު ޢަލީ އާޒިމް ވެސް ވަނީ އިސްލާހު ހުށަހަޅުއްވާ ފައެވެ. އެހެން ނަމަވެސް އެއިން އެ އިސްލާހަށް އެމްޑީޕީ މެންބަރުންގެ ތާއީދެއް ނުލިބުނެވެ.

އޭގެ އިތުރުން މާލިއްޔަތު ކޮމެޓީ އާއި ޖުޑީޝަރީ ކޮމެޓީގެ އިތުރުން ސަލާމަތީ ހިދުމަތްތަކުގެ ކޮމެޓީގެ އަޣުލަބިއްޔަތު އިދިކޮޅު ފަރާތްތަކަށް އޮންނަ ގޮތް ހެދުމަށް ވެސް އިދިކޮޅު މެންބަރުން އިސްލާހު ހުށަހެޅިއެވެ. އަދި ބައެއް ކޮމިޓީ ތަކުގެ މުގައްރިރުންނަށް މިނިވަން މެންބަރުން ބޭތިއްބުމަށްވެސް ވަނީ އިސްލާހު ހުށަހަޅުއްްވާފައެވެ. ނަމަވެސް އެތަނުން އެއްވެސް އިސްލާހަކަށް އެމްޑީޕީީގެ މެޖޯރިޓީ އޮތް މަޖިލީހުގެ ތާއީދު ލިބިފައެއް ނުވެއެވެ.

މި އިސްލާހު ތަކާއި އެކު، ކޮމެޓީތައް އެކުލެވިގެންވާ ގޮތް ބަދަލު ކުރަން އިދިކޮޅު މެންބަރުން ދިހަ އިސްލާހެއް ހުށަހެޅިއެވެ. ނަމަވެސް އެހުރިހާ އިސްލާހަކަށް ވެސް ލިބުނީ 13 ވޯޓެވެ. އިސްލާހުތަކާއި ދެކޮޅަށް 33 މެންބަރުން ވޯޓް ދެއްވިއެވެ. ވުމާއެކު އެއްވެސް އިސްލާހެއް ފާހެއް ނުވިއެވެ.

އެމްޑީޕީން ބޭނުންވާ ގޮތަށް އެކުލަވާލާފައިވާ ކޮމެޓީ ތަކާއި ގުޅޭ މުޅި ރިޕޯޓް ފާސް ކުރުމަށް 35 މެންބަރުން ވޯޓް ދެއްވިއިރު ރިޕޯޓް ފާސްކުރުމާއި ދެކޮޅަށް 14 މެންބަަރުން ވޯޓް ދެއްވިއެވެ. އެހެންކަމުން، އެމްޑީޕީ ބޭނުން ގޮތަށް ކޮމިޓީތައް އެކުލަވާލައި މަޖިލީހުގެ ޖަލްސާ ވަނީ މިއަދަށް ނިންމާލާފައެވެ.

މަޖިލީހުގެ ދާއިމީ ކޮމިޓީތައް އެކުލަވާލުމުގެ މަސައްކަތާއި އެހެނިހެން ވެސް މުހިންމު މަސައްކަތްތައް ނުނިމު ހުރުމުން އެ މަސައްކަތް ނިމެންދެން ދައުރު ދަންމާލަން އެމްޑީޕީން އެދިފައި ވަނިކޮށް މަޖިލީހުގެ ރައީސް މުހައްމަދު ނަޝީދު ވަނީ ދައުރު ނިންމަވާލައްވާފައެވެ.

އެއާއެކު އެމްޑީޕީގެ 29 މެންބަރުން ސޮއި ކުރައްވައި، ދައުރުން ބޭރުގައި ޕާޓީގެ ޖަލްސާއެއް ބޭއްވުމަށް މަޖިލީހަށް ވަނީ ހުށަހަޅުއްވާފައެވެ. އެ އެދުމާއި އެއްގޮތަށް، 3 ޖުލައި 2023 ވީ އާދިއްތަ ދުވަހުވެސް ވަނީ ދައުރުން ބޭރު ޖަލްސާއެއް ބާއްވާފައެވެ.