އެފްއޭއެމް އިން މުސާރަ ނުދޭތީ ބައެއް މުވައްޒަފުން ވަޒީފާއަށް ނިކުންނަން ދެކޮޅު ހަދައިފި
ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ މުވައްޒަފުންނަށް އެތައް މަސްތަކެއް ވަންދެން މުސާރަ ލިބިފައިނުވާތީ ވަޒީފާއަށް ނިކުންނަށް ދެކޮޅު ހަދައިފިއެވެ.
އެގޮތުން އެފްއޭއެމް އިން މުވައްޒަފުންނަށް މުސާރަ ނުދޭތާ 5 މަސްދުވަސް ވެފައިވާ ކަމަށް އެ އެސޯސިއޭޝަންގެ ބޭފުޅަކު ވަނީ 'ވޮއިސް' އަށް ކަށަވަރުކޮށްދީފައެވެ.
އަދި މިއީ އެ އެސޯސިއޭޝަންގެ މަސައްކަތްތައް ފެށުމަށް އެފްއޭއެމްއިން ކުރަމުން އަންނަ މަސައްކަތަށް އެކަށީގެންވާ ކުރިއެރުމަށް ލިބިފައިނުވާތީ ކަމަށް ވެސް އެބޭފުޅާ ވަނީ ހާމަކުރައްވާފައެވެ.
މުސާރަ ލިބިފައިނުވާތީ ވަޒީފާއަށް ނިކުންނަން ދެކޮޅު ހަދާފައިވާ ފަރާތްތަކުގެ ތެރޭގައި އިދާރީ ހިންގުމާއި ހަވާލުވެފައިވާ މުހިންމު ފަރާތްތަކާއި އެކި ޑިޕާޓްމަންޓްތަކުގެ އިސް ފަރާތްތައް ވެސް ހިމެނެއެވެ.
މި މައްސަލަ ފެންމަތިވެފައި މިވަނީ ސާފް ޗެމްޕިއަންޝިޕްގައި ރާއްޖެ އަށް ކުރިމަތިވި ނާކާމިޔާބާ އެކު ރާއްޖޭގެ ފުޓްބޯޅަ ބަދަލު ކުރަން ޖެހޭ ކަމަށް ގޮވާލައި ސޯޝަލް މީޑިއާ އާއި ވައިބާ ގުރޫޕްތަކުގައި ކަންބޮޑުވުން ފާޅުކޮށް މަޝްރަހު ހޫނު ވެފައިވާ ވަގުތެއްގައެވެ.
އެގޮތުން މިކަމުގެ ތެރެއިން ވަނީ "ސޭވް އެފްއޭއެމް" ކެމްޕޭނެއް އުފަން ކޮށް މިދިޔަ ހޮނިހިރު ދުވަހު ބައްދަލުވުމެއްވެސް ބާއްވާފައެވެ.
ވޮއިސް އިން ލައިވްކުރި މި އިވެންޓުގައި ރާއްޖޭގެ ފުޓްބޯޅަ އާއިލާގެ ދުވަސްވީ ގިނަ މޫނުތަކެއް ފެނިގެންދިޔަ އެވެ. އޭގެތެރޭގައި ކުރީގެ ކުޅުންތެރިންނާއި ކޯޗުންގެ އިތުރުން ކުޅިވަރުގެ ނޫސްވެރިން މިބައްދަލުވުމުގައި ވަނީ ބައިވެރިވި ވެފައެވެ.
އެފްއޭއެމްގެ މާލީ ހާލު ގޯސްވެފައިވާ ކަމަށާއި މުވައްޒަފުންގެ އިތުރުން ކުޅުންތެރިންނަށް ފައިސާ ނުލިބޭ ކަމުގެ ވާހަކަ ދޭތެރެ ދޭތެރެއިން މީޑިއާގައި ދެކެވިގެން ދެއެވެ. ނަމަވެސް މިކަމަށް އެށޭނަ ހައްލެއް އަދި ލިބިފައެއް ނުވެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
