ރައީސްކަމަށް ކުރިމަތިލާން ރައީސް ޞާލިހުގެ ޝަރުތު ހަމައެއް ނޫން: އަބްދުއްރަހީމް

ރައީސުލްޖުމްހޫރިއްޔާކަމުގެ މަޤާމަށް ކުރިމަތިލުމަށް ސަރުކާރު ހިންގާ މައި ޕާޓީ، އެމްޑީޕީގެ ކެންޑިޑޭޓު އިބްރާހިމް މުޙައްމަދު ޞާލިހު ޝަރުތު ހަމަވާކަމަށް ޤަބޫލު ނުކުރައްވާކަމަށް އިދިކޮޅު ކޯލިޝަން ވަގުތީގޮތުން ހިންގެވުމާއި ހަވާލުވެ ހުންނެވި ޕީއެންސީގެ ރައީސް އަބްދުއްރަހީމް އަބްދުالله ވިދާޅުވެއްޖެ އެވެ.

އަބްދުއްރަހީމް މިފަދައިން ވިދާޅުވެފައި ވަނީ ޕީޕީއެމް އޮފީހުގައި ބޭއްވި ޖަލްސާއެއްގައި ވާހަކަދައްކަވަމުން ނެވެ.

އަބްދުއްރަހީމް ވިދާޅުވީ ޕީޕީއެމްގެ ރިޔާސީ ކެންޑިޑޭޓު ރައީސް އަބްދުالله ޔާމީން އަބްދުލްގައްޔޫމަށް ރިޔާސީ އިންތިޚާބުގައި ވާދަކުރެއްވޭނެތޯ ނުވަތަ ނޫން ތޯ ސުވާލު އުފައްދަވާ ފަރާތްތަކުން އެ ކުރައްވަނީ ބޭކާރު ސުވާލެއް ކަމަށެވެ.

ޕީޕީއެމާއި އެ ސުވާލު ކުރުމުގެ ބަދަލުގައި އެ ސުވާލު ކުރައްވަން ޖެހިވަޑައިގަންނަވާނީ ރައީސް ޞާލިހާއި ކަމަށާއި، އެމަނިކުފާނު ރިޔާސީ އިންތިޚާބުގައި ވާދަކުރުމަށް ޝަރުތުވެސް ހަމަނުވާކަމަށް އަބްދުއްރަހީމް ވިދާޅުވި އެވެ.

"ގައުމުގެ ޤައްދާރަކަށް ގައުމުގެ ރައީސްކަމަށް ކުރިމަތިލެވިގެނެއް ނުވާނެ. ޤާނޫނު އަސާސީއާއި ޚިލާފުވީމަކާ ރައީސުލްޖުމްހޫރިއްޔާ ކަމުގެ މަޤާމަށް ކުރިމަތިލެވިގެނެއް ނުވާނެ، ޤައުމަށް ޚިޔާނާތްތެރިވީމަ އެ މައްސަލަ ބަލާ ތަހުގީގުކޮށް ފިޔަވަޅު ނާޅަނިސް ރައީސުލްޖުމްހޫރިއްޔާ ކަމުގެ މަޤާމަށް ކުރިމަތިލެވިގެނެއް ނުވާނެ. އެހެންވީމަ އަޅުގަނޑު މި ދަންނަވަނީ ސުވާލު އުފައްދަންވީ އިބްރާހިމް މުޙައްމަދު ޞާލިހަށް ކުރިމަތިލެއްވޭނެ ތޯ އޭ"

ޕީއެންސީގެ ރައީސް އަބްދުއްރަހީމް

އަބްދުއްރަހީމް ވިދާޅުވީ ރައީސް ޔާމިނުގެ ނަންފުޅު ރިޔާސީ އިންތިޚާބުގެ ވޯޓު ކަރުދާސްކޮޅުގައި އޮންނާނެ ކަމަށެވެ. އެކަމާއި ސުވާލު އުފެއްދުމުގެ ޖާގައެއް ވެސް ނެތްކަމަށް އޭނާ ވިދާޅުވި އެވެ.

މިއަހަރުގެ ރިޔާސީ އިންތިޚާބުގައި ވާދަކުރައްވާނެކަން އެންމެ ފުރަތަމަ އިއުލާނުކުރައްވާ ޕާޓީއަކުން އެންމެ ފުރަތަމަ ރިޔާސީ ޓިކެޓު ހަވާލުކުރެއްވި ބޭފުޅަކީ ރައީސް ޔާމިނުކަމަށް އަބްދުއްރަހީމް ވިދާޅުވި އެވެ.

އެމަނިކުފާނު މިވަގުތު ޖަލު ހުކުމެއް ތަންފީޒު ކުރައްވަމުން ގެންދެވި ނަމަވެސް، އެއީ ނުހައްގުން ކޮށްފައިވާ ހުކުމެއް ކަމަށާއި، އެ ހުކުމުން އެމަނިކުފާނު މިނިވަންވެ ވަޑައިގަންނަވާނެ ކަމުގެ ފުރިހަމަ ޔަގީންކަން އޮތްކަމަށް އަބްދުއްރަހީމް ވިދާޅުވި އެވެ.

އެއާއެކު އަބްދުއްރަހީމް ވިދާޅުވީ ރައީސް ޔާމިނު ރިޔާސީ އިންތިޚާބުގައި ވާދަކުރައްވާ އެއްބުރުން އިންތިޚާބު ކާމިޔާބުކުރައްވާނެކަމުގެ ޔަގީންކަން ވެސް އޮތް ކަމަށެވެ.