އޭއެފްސީ ކަޕްގެ ޕްރިމިލިނަރީ ބުރުގައި އީގަލްސް ކުޅޭ މެޗަށް ވަގުތު ދިނުމުގެ ގޮތުން މާޒިޔާ މެޗު ފަސްކޮށްފި!

އެމްޑަބްލިއުއެސްސީ ދިވެހި ޕްރެމިއާ ލީގުގައި ރޭ މާޒިޔާއާއި ކުލަބް އީގަލްސް ވާދަކުރުމަށް ހަމަޖެހިފައި އޮތް މެޗު ފަހުގެ ތާރީޚަކަށް ފަސްކޮށްފި އެވެ.

އެފްއޭއެމް އިން މައުލޫމާތު ދޭގޮތުގައި ރޭގެ މެޗު ފަސްކުރެވުފައި ވަނީ އޭއެފްސީ ކަޕްގެ ޕްރިލިމިނަރީ ބުރުގައި ބަންގްލަދޭޝަގެ ޑާކާ އަބަހާނީ އާއި ދެކޮޅަށް ކުޅުމަށް ހަމަޖެހިފައިވާ މެޗަށް ބަންގްލަދޭޝަށް ދިއުމަށްޓަކައި ތައްޔާރުވުމުގެ ގޮތުން ކްލަބު އީގަލްސް އަށް ވަގުތު ދިނުމުގެ ގޮތުންނެވެ.

ޕްރިމިލިނަރީ ބުރުގެ ދެވަނަ ރައުންޑްގައި މި މަހުގެ 16 ވަނަ ދުވަހު ޑާކާ އަބަހާނީ އާއި އީގަލްސް ވާދަކުރާ މެޗުން މޮޅުވާ ޓީމެއް އޭއެފްސީ ކަޕް ސައުތު ޒޯނުގެ ޕްލޭއޮފް ގައި ވާދަކުރަންޖެހެނީ މި މަހުގެ 16 ވަނަ ދުވަހު އިންޑިޔާގެ މޯހަންބަގާން އާއި ނޭޕާލުގެ މަޗިންދްރާ އެފްސީ ވާދަކުރާ މެޗުން މޮޅުވާ ޓީމަކާއި ދެކޮޅަށެވެ. އެމެޗު ކުޅުމަށް ހަމަޖެހިފައިވަނީ މި މަހުގެ 22 ވަނަ ދުވަހު އެވެ.

ލީގުގައި މާޒިޔާ އާއި އީގަލްސް އެންމެ ފަހުން ކުޅުނު މެޗު 2-2 ގެ ނަތީޖާއަކުން ދެޓީމް އެއްވަރުވެފައި ވާއިރު، 7 މެޗުން ލިބުނު 19 ޕޮއިންޓާއެކު ލީގު ތާވަލުގެ އެއްވަނައިގައި މިވަގުތު އޮތީ މާޒިޔާ އެވެ. ދެވަނަގައި 8 މެޗުން ލިބުނު 18 ޕޮއިންޓާއެކު އޮތީ ސްޕަރ ޔުނައިޓެޑް ސްޕޯޓްސް އެވެ.

ކުލަބު އީގަލްސް ލީގުގައި ކުޅުނު 7 މެޗުގެ ތެރެއިިން ފަސް މެޗުން މޮޅުވެ ދެމެޗު އެއްވަރުވެފައިވާއިރު، ލީގު ތާވަލުގައި އެޓީމު މިވަގުތު އޮތީ ތިންވަނައިގައެވެ.