ފަނޑިޔާރުންނަށް ނުފޫޒް ފޯރުވައިގެން ރިޔާސީ އިންތިހާބެއް ކާމިޔާބު ނުކުރެވޭނެ: ރައީސް ނަޝީދު

ފަނޑިޔާރުންނަށް ނުފޫޒް ފޯރުވައިގެން ރިޔާސީ އިންތިހާބެއް ކާމިޔާބު ނުކުރެވޭނެ ކަމަށާ، އެކަން އެގޮތަށް ނުވާނެ ކަން 2018 ވަނަ އަހަރުގެ ރިޔާސީ އިންތިހާބުން އެނގޭނެ ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.

ފަނޑިޔާރުންނަށް ދޭ ލިވިން އެލަވަންސް ބޮޑުކޮށް، އެމީހުންނަށް ފުލެޓަށް ކުރިމަތިލެވޭ ގޮތަށް ދިވެހިރާއްޖޭގެ ފަނޑިޔާރުންނާއި ބެހޭ ގާނޫނަށް އިސްލާހު ހުށައެޅުމުގެ ބިލަށް ބަހުސް ކުރައްވަމުން ރައްޔިތުންގެ މަޖިލީހުގެ ނައިފަރު ދާއިރާގެ މެންބަރު އަހުމަދު ޝިޔާމް ވަނީ، އެ ބިލު މިފަދަ ދަނޑިވަޅެއްގައި ހުށަހަޅާފައި ވަނީ ކުރިއަށް އޮތް ރިޔާސީ އިންތިހާބަށާއި، ކުރީގެ ރައީސް ޔާމީން އަބްދުލްގައްޔޫމް ގެ ޝަރީއަތް ތަކަށް ނުފޫޒް ފޯރުވުމަށް ކަމަށެވެ.

"750 މިލިއަން ރުފިޔާ އެބަ ޕޮކެޓް ކުރޭ ރީޔާސީ އިންތިޚާބަށް ރައީސް އިބްރާހިމް މުހައްމަދު ޞާލިހު. މިއީ ހިނގާ ކަމެއް. އިއްޒަތްތެރި ރާއީސް ވެސް މިކަންތައް ތަންކޮޅެއް ގާތުން އެބަ ޖެހޭ ބައްލަވަން. އެހެންވީމާ އަޅުގަނޑު މި ދެންނެވީ މިކަންކަމުގައި ނެތޭ ރަނގަޅު ނިޔަތެއް. ފަނޑިޔާރުންނަށް ދޭކަށް ނޫން މިއުޅެނީ އިއްޒަތްތެރި ރައީސް. ފަނޑިޔާރުން ބޭނުންވާ ވަކި ބަޔަކަށް ދޭނެކަމަށް ޔަގީން ކަމެއް ދީގެން ރައީސް ޔާމީނާ ދޭތެރޭގައި ނުހައްގުން ހުކުމް ކުރުވަން ބޭނުންވަނީ. އެއް ކަމަކަށް. ދެވަނަ ކަމަކަށް ރިޔާސީ އިންތިހާބަށް ސަރުކާރުން ބޭނުންވާ އެއްބާރުލުމެއް ފަނޑިޔާރު ގެއިން އިންތިޒާމް ކުރެވޭތޯ މަސައްކަތް ކުރަމުން މިދަނީ އިއްޒަތްތެރި ރައީސް."

މެންބަރު އަހުމަދު ޝިޔާމް

މީގެ އިތުރުން ވެސް އެމްޑީޕީ ނޫނީ ފަނޑިޔާރަކު ރަހީނުކުރި ޕާޓީއެއް ނޯންނާނެ ކަމަށާ، ފަނޑިޔާރަކު ރަހީނު ކޮށްގެން ވެރިކަމުން ފައިބަން ޖެހުނު ޕާޓީއެއް އެމްޑީޕީ ނޫނީ ނޯންނާނެ ކަމަށްވެސް ޝިޔާމް ވިދާޅުވިއެވެ.

ޝިޔާމްގެ މި ވާހަކަ ތަކަށް ރައްދުދެއްވަމުން ރިޔާސަތުގައި އިންނަވައި ރައީސް ނަޝީދު ވިދާޅުވީ، ފަނޑިޔާރުންގެ ބިލަކީ ފަނޑިޔާރުންނަށާއި، ރިޔާސީ އިންތިހާބަށް ނުފޫޒް ފޯރުވުމަށް ހުށަހަޅާފައިވާ ބިލެއް ކަމަށް މެންބަރުން ފާހަގަ ކުރެއްވި ނަމަވެސް، ފަނޑިޔާރުންނަށް ނުފޫޒް ފޯރުވައި ތަކެތި ދީގެން ރިޔާސީ އިންތިހާބެއް ކާމިޔާބު ނުވާނެ ކަމަށް 2018 ވަނަ އަހަރުގެ ރިޔާސީ އިންތިހާބުން ރަނގަޅަށް އެނގިގެން ގޮސްފައިވާ ކަމަށެވެ.

އަޅުގަނޑު ހިތުން، އިއްޒަތްތެރި މެންބަރުންނަށް ވަރަށް ސާފުވެފައި އޮތީ 2018 ގެ ރިޔާސީ އިންތިހާބުގައި، ފަނޑިޔާރުންނަށް ނުފޫޒް ފޯރުވައިގެން، އަދި ތަކެތި ބަހައިގެން، އަދި ރިޝްވަތު ދީގެން އެއީ ވޯޓު ލިބޭ ކަމެއް ނޫންކަން. އިއްޒަތްތެރި މެންބަރު ފާހަގަކުރި ހުރިހާ ކަމެއް އަލިފުން ޔާ އަށް 2018 ވަނަ އަހަރުގައި ބާރަށް ހިނގަމުންދިޔަ. އެހެން ނަމަވެސް ރައްޔިތުންގެ ވޯޓެއް، އޭގެ ސަބަބުން ލިބުގެން އައި ތަނެއް ނުފެނޭ.

ރައްޔިތުންގެ މަޖިލީހުގެ ރައީސް މުހައްމަދު ނަޝީދު

އެހެން ކަމުން 2023 ވަނަ އަހަރުގެ ރިޔާސީ އިންތިހާބަށް ކުރިމަތިލައްވާ ބޭފުޅުން އަދި ޕާޓީތަކުންވެސް އެ ނުކުތާ ވަރަށް ރަނގަޅަށް ބަލައިގަންނާނެ ކަމަށް އުއްމީދު ކުރައްވާކަމަށްވެސް ރައީސް ނަޝީދު ވިދާޅުވިއެވެ.