ނޮވެމްބަރު މަހުގެ ހުރިހާ އެވޯޑެއް ހޯދި ޔުނައިޓްޑް، އަމިއްލަ ދަނޑުގައި ބޯންމައުތު އަތުން ބަލިވެއްޖެ

އިގިރޭސި ޕްރެމިއާ ލީގުގައި ހޮނިހިރު ދުވަހުގެ ރޭ އަމިއްލަ ދަނޑުގައި ބޯންމައުތު އާއި ދެކޮޅަށް ކުޅުނު މެޗުން 3-0 ގެ ނަތީޖާއަކުން މެންޗެސްޓާ ޔުނައިޓެޑް ބަލިވެއްޖެ އެވެ.

މެންޗެސްޓާ ޔުނައިޓެޑްގެ ކޯޗުގެ މަގާމުގައި އެލެކްސް ފާގަސަން ހޭދަކުރި 27 އަހަރު ތެރޭގައި ޔުނައިޓްޑުގެ އަމިއްލަ ދަނޑުގައި އެކުލަބު ބަލިވެފައި ވަނީ 34 މެޗުން ނެވެ. ނަމަވެސް ބޯންމައުތު އަތުން ވީ ބައްޔާއެކު ފާއިތުވެދިޔަ 10 އަހަރު ތެރޭގައި އެޓީމު ވަނީ އަމިއްލަ ދަނޑުގައި 35 މެޗުން ބަލިވެފައެވެ. ނަމަވެސް މިމެޗަށް ޔުނައިޓްޑް ނުކުތްއިރު ފާއިތުވެދި ނޮވެމްބަރު މަހު ޕްރެމިއާ ލީގުގެ ހުރިހާ މުހިންމު އެވޯޑަކާއެކު އެޓީމު އޮތީ ވަރަށް ރަނގަޅު ފޯމެއްގައެވެ.

މެޗުގެ ފުރަތަަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ އިރު މި މެޗުގެ ވަރަށް ކުރީކޮޅު ބޯންމައުތުން ވަނީ ލަނޑެއް ކާމިޔާބުކޮށް މެޗުގެ ލީޑު ހޯދާފައެވެ. މިލަނޑު އެޓީމަށް ކާމިޔާބުކޮށްދިނީ އެޓީމުގެ އިގިރޭސި ފޯވާޑް ޑޮމެނިކް ސޮލަންކޭ އެވެ.

ބޯންމައުތުގެ ލަނޑަށްފަހު ފުރަތަަމަ ހާފުގައި ދެޓީމުން ވެސް ވަނީ ލަނޑުޖަހާނެ ރަގަޅު ފުރުސަތުތަކެއް ތަނަވަސްކޮށްފައެވެ. ނަމަވެސް ފުރަތަމަ ހާފު ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް އިތުރު ލަނޑެއް ކާމިޔާބު ނުކުރެވި 1-0 ގެ ނަތީޖާއަކުން ބޯންމައުތު ކުރީގައި އޮވެގެންނެވެ.

މެޗުގެ ދެވަަނަ ހާފުގައި ބޯންމައުތުން އިތުރު ދެ ލަނޑު ކާމިޔާބުކުރި އިރު، އެޓީމުގެ ދެވަނަ ލަނޑު މެޗުގެ 68 ވަނަ މިނެޓުގައި ކާމިޔާބުކޮށްދިނީ ދެވަނަ ހާފުގައި ބަދަލު ކުޅުންތެރިއެއްގެ ގޮތުގައި ކުޅެންނުކުތް ޑެންމާކްގެ މިޑްފީލްޑަރު ފިލިޕް ބިލިންގް އެވެ. އަދި އޭގެ ފަސް މިނެޓު ފަހުން އެޓީމުގެ ތިންވަނަ ލަނޑު ކާމިޔާބުކޮށްދިނީ އެޓީމުގެ އާޖެންޓީނާ ޑިފެންޑަރު މާކޯސް ސެނެސީ އެވެ. މިލަނޑާއެކު މެޗުގެ ކުޅުން ނިމިގެންދިޔައީ 3-0 ގެ ނަތީޖާއަކުން ބޯންމައުތު ކުރީގައި އޮވެގެންނެވެ.

މިމެޗުން ލިބުނު ތިން ޕޮއިންޓާއެކު ލީގުގައި ކުޅުނު 16 މެޗުން ބޯންމައުތު އަށް 19 ޕޮއިންޓް ލިބިފައިވާއިރު އެޓީމު މިވަގުތު އޮތީ ލީގު ތާވަލްގެ 13 ވަނައިގައެވެ. އަދި މިމެޗުން ބަލިވި މެންޗެސްޓާ ޔުނައިޓެޑަށް 16 މެޗުން ލިބުނު 27 ޕޮއިންޓާއެކު އެޓީމު މިވަގުތު އޮތީ ލީގު ތާވަލްގެ 6 ވަނައިގައެވެ.